Rusiya Təhlükəsizlik Şurasının sədr müavini Dmitri Medvedev bəzi dövlətlərin Cənubi Qafqaz ölkələrini parçalamağa və Rusiyanın Ermənistanla münasibətlərini pisləşdirməyə çalışdığını bildirib. O, bu açıqlamanı İran İslam Respublikasının Dövlət Televiziya və Radio Yayımları Şirkətinə verdiyi müsahibədə verib.
"Qafqaza gəldikdə isə, bəli, müəyyən dövlətlər hazırda orada vəziyyəti qarışdırmağa çalışırlar. Onlar Cənubi Qafqaz ölkələrini parçalamağa çalışırlar. Bu doğrudur. Biz bunu ehtiyatla izləyirik", - deyə Medvedev bildirib.
O, Qərbin Gürcüstanla münasibətlərini və Ermənistan ətrafındakı mövcud vəziyyəti nümunə kimi göstərib.
"Baxın. Əvvəlcə Qərb dünyası Gürcüstanı NATO-ya qoşulmağa dəvət etdi. Bundan yaxşı heç nə alınmadı. Gürcüstan hələ də NATO üzvü deyil. Onun hazırkı rəhbərliyi bunun yəqin ki, səhv yanaşma olduğunu başa düşür. Bütün bunlar münaqişəyə gətirib çıxardı. Hazırda Ermənistanla münasibətlərimiz sınaqdan keçirilir", - deyə Rusiya Təhlükəsizlik Şurasının sədr müavini bildirib.
Medvedev hansı dövlətlərin bu cür cəhdlər etdiyinə inandığını dəqiqləşdirməyib. Onun açıqlaması Cənubi Qafqaz ölkələrinin xarici siyasət istiqamətlərində davam edən dəyişikliklər fonunda verilib.
Tahir TAĞIYEV
