“Bugünkü iclasda iştirak edən ölkələrin sayı əvvəlkindən artıqdır.”
Bu fikirləri Prezident İlham Əliyev Cənub Qaz Dəhlizi Məşvərət Şurası çərçivəsində nazirlərin videokonfrans formatında keçirilən VII iclasındakı çıxışı zamanı deyib.
Ölkı başçısı Cənub Qaz Dəhlizi Məşvərət Şurasının ilk iclasını xatırladaraq bir sıra məqamlara toxunub: “O zaman biz birgə işimizə yeni başlamışdıq və bu gün keçmişə nəzər saldıqda mühüm nailiyyətlərin şahidi oluruq. Yeri gəlmişkən, hər il Bakıda toplaşarkən biz görülən işləri nəzərdən keçirir və gələcək addımlarımızı planlaşdırırıq. Şadam ki, bugünkü iclasda iştirak edən ölkələrin sayı əvvəlkindən artıqdır. Hazırda burada 18 ölkə, 19 şirkət və 5 aparıcı beynəlxalq maliyyə təsisatı iştirak edir. Biz vahid komanda olaraq çalışırıq və hesab edirəm ki, bu bizim uğurumuzun başlıca səbəbidir. Ötən ilin sonuncu günü əlamətdar olmuşdur. Cənub Qaz Dəhlizinin sonuncu seqmenti olan TAP layihəsinin yekunlaşdırılması tarixi nailiyyətdir. Əminəm ki, bizim birgə fəaliyyətimiz davam edəcəkdir, çünki yeni plan və ideyalarımız var”.
Azərbaycan diplomatiyasının uğurudur ki, bu cür böyük komanda formalaşdıra bilib. Komandada dünyanın aparıcı dövlətləri, təşkilatları və şirkətləri təmsil olunur. O baxımdan bunu ekspertlər necə dəyərləndirir?
“Diplomatik uğurun başında Prezident İlham Əliyevin apardığı məqsədyönlü siyasət dayanır”
Məsələyə münasibət bildirən şərqşünas Seyid Camal Əzimbəylinin sözlərinə görə, bu qədər çoxsaylı ölkə və şirkətin layihədə iştirakı ona olan böyük inamdan irəli gəlir: “Belə olmasaydı, o zaman CQD ilə bağlı keçirilən tədbirə qatılanların sayı artmazdı. Məhz layihənin perspektivinə olan inam və etimadın nəticəsidir ki, CQD belə tez tikilərək ərsəyə gətirildi. Hesab edirəm ki, bütün bunlar çox önəmli məqamlardır. Heç şübhəsiz, sözügedən diplomatik uğurun başında Prezident İlham Əliyevin apardığı məqsədyönlü siyasət dayanır. Azərbaycanın etibarlı tərəfdaş olması, yeridilən enerji siyasətinə beynəlxalq müstəvidə olan inamı hər keçən gün artırdı. Dünyada zəngin enerji qaynaqları olan ölkələr çoxdur. Elə ölkələr var ki, ehtiyatları Azərbaycandan qat-qat böyükdür. Ancaq həmin ölkələr uğurlu enerji tərəfdaşlığı qura bilməyib. Bunun müxtəlif səbəbləri var. Azərbaycan isə dünyaya nümunə olacaq uğurlu enerji strategiyası ortaya qoyub. Cənub Qaz Dəhlizi təhlükəsizlik baxımından da çox önəmli layihədir. Bu layihədə iştirakı olan tərəflər – həm istehsalçı, tranzit, həm də istehlakçı ölkələr regionda sülhün, təhlükəsizliyin olmasında maraqlıdır”.
Şərqşünasın fikrincə, bütün bunlar Azərbaycanın unikal uğur əldə etməsinin göstəricisidir.
Vidadi ORDAHALLI
