Məlum olduğu kimi, Tarif Şurasının qərarı ilə ötən ay Aİ-92 markalı benzin və dizel yanacağının qiyməti tənzimlənib. Şuranın qərarı ilə Aİ-92 markalı avtomobil benzininin pərakəndə satış qiyməti 1 litr üçün 1 manat, dizel yanacağının pərakəndə satış qiyməti isə 1 litr üçün 80 qəpik müəyyən edilib.
Qeyd edək ki, bu qərardan sonra avtomobillərin satış qiymətində dəyişikliyin olacağı gözlənilirdi. Ancaq bu gözləntilər özünü doğrultmadı. Ekspertlərin bildirdiyinə görə, avtomobil satışında azalma deyil, əksinə, canlanma müşahidə edilir.
“...maşınların satış qiyməti azalmaq əvəzinə, artdı”
Məsələ ilə bağlı fikir bildirən iqtisadçı-ekspert Kamran Məmmədli qeyd etdi ki, avtomobil bazarında qiymətlərin dəyişməsi mövsümlə bağlıdır: “Təbii ki, mövsum də bazara öz təsirini göstərir. Nəzərə almaq lazımdır ki, hər ilin müvafiq dövründə avtomobil bazarında canlanma müşahidə edilir. Onu da nəzərə almaq lazımdır ki, koronavirus pandemiyası ilə bağlı olaraq hökumət tərəfindən əhalinin sağlamlığı istiqamətində görülən işlər iqtisadi fəallığa təsir etdi. Danılmaz faktdır ki, əhali bir ildir ki, sosial həyatdan təcrid olunub. Karantin rejimi tam bitməsə də, bu sahədə yumşalmalar var. Karantin rejiminin yumşalması avtomobil bazarında müəyyən aktivliyə yol açır. Xüsusən əvvəlki dövrdən müəyyən vəsait toplayan şəxslər aktiv bazara geri dönürlər”.
Müsahibimiz əlavə edir ki, pandemiya əhaliyə yeni davranış tərzini aşıladı və şəxsi avtomobillərin daha təhlükəsiz olması təəssüratını formalaşdırdı: “Məlumdur ki, ictimai nəqliyyatda virusa yoluxma risqi daha yüksək olduğu üçün insanlar şəxsi avtomobildən istifadə etməyə üstünlük verirlər. Təbii ki, bu amil də avtomobillərin satış qiymətinə təsir göstərir. İnsanlar elə düşünürdülər ki, yanacağın satış qiymətinin dəyişməsi avtomobillərin satış qiymətinə təsir edəcək. Ancaq bu hal müşahidə edilmədi, əksinə, maşınların satış qiyməti azalmaq əvəzinə, artdı”.
Günel CƏLİLOVA
