“Birləşmiş Krallıqdan Azərbaycana qoyulan investisiyalar bizə ölkəni müasirləşdirməyə çox kömək edib”. Bunu Prezident İlham Əliyev Böyük Britaniyanın Avropa qonşuluğu və Amerika məsələləri üzrə dövlət naziri xanım Vendi Mortonu qəbul edərkən deyib.
Ölkə başçısının sözlərinə görə, bu investisiyalar əsasən enerji sektoruna yatırılıb: “Demək olar ki, 30 milyard dollardır. Bu, bizə iqtisadiyyatı şaxələndirmək üçün neft-qaz satışından əldə olunmuş gəlirlərdən müvafiq şəkildə istifadə etmək imkanını vermişdir. Ona görə də mən əminəm ki, qarşıdakı illərdə bizim diqqətimizi cəmləşdirəcəyimiz əsas sahə Azərbaycanın qeyri-enerji sektorunun inkişafı olacaq”.
Ölkə başçısı onu da qeyd edib ki, demək olar, 600 Britaniya şirkəti Azərbaycanda qeydiyyatdan keçib: “Bu, həqiqətən də iqtisadi tərəfdaşlığımızın şaxələndirilməsinin yaxşı göstəricisidir. İşğaldan azad edilmiş ərazilərdə yenidənqurma üçün böyük potensialımız var. Biz artıq Britaniya şirkətləri ilə təmaslara başlamışıq. Onlardan biri işğaldan azad edilmiş ərazilərdə şəhərsalmaya, infrastrukturun inkişaf etdirilməsinə cəlb olunub və mən ümid edirəm ki, onların sayı daha çox olacaq, çünki orada çox işlər görülməlidir. Hər şey dağılıb. Bərpa olunan enerji sahəsində böyük potensial var”.
Görünən odur ki, Azərbaycanın Böyük Britaniya ilə qeyri-neft sektorunda da əməkdaşlıq qurması ilə bağlı böyük potensial var. O baxımdan maraqlıdır, Britaniya şirkətləri qeyri-enerji sektorumuzun inkişafına yeni nə verəcəklər?
“Bu sahədə İngiltərə şirkətləri ilə sıx əməkdaşlıq qurmaq faydalı olar”
Məsələyə münasibət bildirən ekspert Rəsul Cahangirlinin sözlərinə görə, İngiltərə şirkətləri bu sahədə bir sıra işlər görə bilər: “Böyük Britaniya şirkətləri azad olunan ərazilərin bərpasında həm podratçı, həm də investor kimi iştirak edə bilərlər. Söhbət həm kənd təsərrüfatından, həm də sənaye və xidmət sektorundan gedir. Nəzərə almaq lazımdır ki, böyük ərazi işğaldan azad edilib. Azad edilən rayonlar müxtəlif zəngin təbii resurslara malikdir. Həmin resursların hasilatında, emalında Britaniya şirkətləri yaxından iştirak edə bilər. Nəzərə alsaq ki, işğaldan azad edilən rayonlarda görüləsi işlər yetərincə böyükdür, o zaman bu sahədə hansısa problem olmayacaq. Məsələn, Britaniyanın heyvandarlıq sahəsində ixtisaslaşmış şirkətləri var. Hesab edirəm ki, həmin şirkətlər dəvət edilməli və onlarla əməkdaşlıq qurulmalıdır. İşğaldan əvvəl Kəlbəcər, Laçın, Qubadlı və Zəngilan rayonlarının təsərrüfatında heyvandarlıq mühüm çəkiyə malik idi. Fikrimcə, yeni yanaşmalar çərçivəsində Britaniya şirkətləri heyvandarlığın müasir tələblərə uyğun inkişaf etdirilməsinə öz töhfəsini verə bilər. Bu zaman Azərbaycan həm sözügedən kənd təsərrüfatı məhsulları ilə özünü təmin edəcək, həm də məhsulların bir qismini dünya bazarına ixrac edəcək. Bu sahədə İngiltərə şirkətləri ilə sıx əməkdaşlıq qurmaq faydalı olar. Digər tərəfdən, işğaldan azad edilən ərazilərdə müxtəlif əlvan metallurgiyaya aid filiz yataqları və digər mineral resurslar mövcuddur. Britanıyanın həm də dünyanın böyük sənaye dövlətlərindən biri olduğunu nəzərə alsaq, sözügedən sahədə əməkdaşlığın qurulması Azərbaycanın qeyri-neft sənayesinin inkişafına ciddi təkan verə bilər. Eyni zamanda, İngiltərə şirkətləri infrastrukturun bərpasında və yenidən qurulmasında yaxından iştirak edə bilərlər. Bütün bu və digər işlər sənaye və xidmət sektorunun inkişafı deməkdir”.
Ekspert hesab edir ki, Britaniya şirkətlərini müxtəlif sahələrə sərmayə qoyuluşuna həvəsləndirmək üçün maksimum əlverişli mühit yaratmaq lazımdır.
Vidadi ORDAHALLI
