Xəbər verildiyi kimi, Azərbaycan Respublikasının Prezidenti İlham Əliyev “Əmək pensiyalarının sığorta hissəsinin indeksləşdirilməsi haqqında” Sərəncam imzalayıb. Sərəncama əsasən, Əmək və Əhalinin Sosial Müdafiəsi Nazirliyinə 2016-cı il üzrə istehlak qiymətləri indeksinə uyğun olaraq, 2017-ci ilin 1 yanvar tarixinə bütün növ əmək pensiyalarının sığorta hissəsinin artırılmasını təmin etmək, fərdi uçot sistemində fərdi hesabların sığorta hissəsində toplanmış pensiya kapitalı məbləğlərinin indeksləşdirilməsini həyata keçirmək, Nazirlər Kabinetinə bu sərəncamdan irəli gələn məsələləri həll etmək tapşırılıb.
Sərəncam Azərbaycan Respublikası Konstitusiyasının 109-cu maddəsinin 32-ci bəndini rəhbər tutmaqla, pensiyaçıların sosial müdafiəsini gücləndirmək məqsədilə və “Əmək pensiyaları haqqında” Qanunun 29.2-ci maddəsinə uyğun olaraq imzalanıb.
Qeyd edək ki, Prezidentin sərəncamı ilə yaşa görə əmək pensiyasının baza hissəsinin məbləği 2016-cı il fevralın 1-dən 110 manat müəyyən edilib. Bu isə o deməkdir ki, 190 manat əmək pensiyası alan şəxsin pensiyasının yalnız 80 manatlıq hissəsi (sığorta hissəsi) 2016-cı ildə qeydə alınan rəsmi inflyasiya səviyyəsində - 12,4 % həddində indeksləşdiriləcək. 80 manatın 12,4%-i 9 manat 92 qəpik etdiyindən, əvvəllər ayda 190 manat əmək pensiyası alan şəxsin pensiyası yanvarın 1-dən 199 manat 92 qəpik olacaq.
“...vətəndaşların sosial rifahına hesablanmış növbəti addımdır”
İqtisadçı Kamran Məmmədli qeyd etdi ki, “Əmək pensiyalarının sığorta hissəsinin indeksləşdirilməsi haqqında” Sərəncamın imzalanması vətəndaşların sosial rifahına hesablanmış növbəti addımdır: “Bu sərəncam pensiyaçıların sosial müdafiəsini gücləndirəcək. Onu da qeyd edim ki, pandemiya şəraitində ayrı-ayrı ölkələr sosial-iqtisadi inkişafla bağlı proqramlarını ixtisara salmaq məcburiyyətində qalıblar. Azərbaycan isə pandemiya şəraitində iqtisadi subyektlərə dəstək tədbirləri reallaşdırıb, həmçinin, təxminən 5 milyon insanı əhatə edən geniş sosial proqram həyata keçirib”.
Həmsöhbətimiz onu da əlavə etdi ki, pensiyası 300 manat olan vətəndaşın indiyədək aldığı məbləğin üzərinə 34 manat 20 qəpik əlavə olunacaq. 400 manat pensiya məbləğində isə 45 manat 60 qəpik artım olacaq: “Məlumat üçün bildirim ki, pensiya məbləği yüksəldikcə, məbləğin artımı da çoxalır. Hər bir pensiyaçı aldığı pensiya məbləğinin üzərinə 11,4 faiz gəlməklə pensiyasının nə qədər artdığını özü də hesablaya bilər”.
Günel CƏLİLOVA
