Azərbaycan Ermənistan üzərində hərbi üstünlüyünü artırır

Tarix: 05.05.2016 / 00:17
Bölmə: Gündəm

Azərbaycan ordusunun hərbi-texniki təhcizatında Rusiyadan alınan əsgəri məmulatların xüsusi yer tutduğu heç kimə sirr deyil. Ermənistan tərəfinin bu vaxta qədər bütün cəhdlərinə baxmayaraq, Rusiya Azərbaycana silah satışını dayandırmayıb. Aprelin əvvəllərində cəbhədə baş verənlərdən sonra rəsmi İrəvan bu məsələni daha qabarıq şəkildə gündəmə gətirsə də, Moskva heç də bu etirazları nəzərə almaq istəmir.

Məhz belə bir vaxtda bəlli olub ki, Azərbaycana Rusiyadan alınmış hərbi döyüş texnikasının gətirilməsi davam edir. O da bildirilir ki, bu, Bakı ilə Moskva arasında əldə olunmuş razılığa əsasən həyata keçirilir. Həmin razılaşmaya əsasən, Azərbaycana BMP-3-ün bazası əsasında hazırlanmış "Vena" adlı 120 millimetrlik özüyeriyən artilleriya qurğuları və BTR-80-in bazası əsasında yenilənmiş və ən müasir döyüş avadanlıqları ilə təchiz olunmuş BTR-82A maşınları göndərilir. Bundan başqa, Rusiya mütəxəssislərinin köməyi ilə hərbi maşınlara texniki yardım, onların təyinatı üzrə istifadə olunması, o cümlədən şəxsi heyətə zəruri vərdişlərin aşılanması üzrə təlim-məşğələlər keçilir.

Qeyd edək ki, Rusiya əvvəlcədən imzalanmış müqavilə çərçivəsində Azərbaycana piyadaların döyüş maşınlarının (BMP-3) çatdırılmasını 2016-cı ildə yekunlaşdıracaq. Həmin hərbi maşınların istehsalı ilə məşğul olan "Traktornıye zavodı" konserni bildirib ki, Azərbaycana müqavilədə nəzərdə tutulan sayda döyüş maşınlarının göndərilməsi məhz bu il tamamlanacaq. Xatırladaq ki, müqavilə 2010-cu ildə imzalanıb. Həmin müqavilə çərçivəsində isə ölkəmizə, BMP-3-lə yanaşı, T-90S tankları da çatdırılıb. Ümumiyyətlə, Rusiya Azərbaycanın 2010-cu ildə sifariş etdiyi hərbi texnikanın və silahların çatdırılmasını 2017-ci ilədək tam yekunlaşdıracaq. Həmin müqaviləyə 3 batalyonu silahlandırmağa bəs edəcək T-90S tankları, yəni 100 tank və eyni sayda BMP-3 daxildir. Həmçinin Azərbaycan Rusiyadan "Smerç" reaktiv yaylım atəşi sistemlərini, ağır odsaçan sistemləri və digər silahları alıb.

Onu da qeyd edək ki, müdafiə nazirinin təsdiq etdiyi hazırlıq planına əsasən, Raket və Artilleriya Qoşunlarının təlimləri başlayıb. Təlimlərdə yenə Rusiyadan alınaraq ölkəmizə gətirilən və qoşunların silahlanmasına yeni daxil olan "Msta S" özüyeriyən haubitsaların praktiki istifadəsi şəxsi heyət tərəfindən həyata keçirilir. Döyüş vəziyyətinə uyğun səhra şəraitində keçirilən təlimlərdə yüksək dağıdıcı qüvvəyə malik artilleriya sistemlərinin döyüş atışı vəziyyətinə gətirilməsi, digər qoşun növləri ilə uzlaşmada effektiv tətbiqi və hərbi elementlərin praktiki icrası təkmilləşdirilir. Təlimlərdə müxtəlif məsafələrdə yerləşən tək və cəm halında olan şərti hədəflərin pilotsuz uçuş aparatı vasitəsilə aşkarlanması, koordinatların təyin olunaraq məhv edilməsi üzrə tapşırıqlar da yerinə yetirilir.

Bütün bunlara paralel olaraq Azərbaycan belə güclü texnikaların alışını davam etdirir. Məsələn, Rusiya ilə imzalanmış müqavilələrin davamı olaraq Azərbaycan Rusiyaya daha 100 T-90S tankı sifariş verib. Bu vəziyyət Azərbaycanı Ermənistan qarşısında daha güclü hala gətirir. Düzdür, Ermənistan da Rusiyadan yeni silahlar almağa çalışır və bunu Kremlin ayırdığı 200 milyon dollarlıq güzəştli kredit hesabına edir. Amma maraqlıdır ki, bu müqavilə üzrə silahlar hələ də Ermənistana göndərilmir. Elə Ermənistan da Rusiyanın silah müqavilələrini yerinə yetirməməsindən narahatdır. Məsələ burasındadır ki, İrəvan və Moskva arasında 200 milyon dollarlıq kredit müqaviləsi 2015-ci ilin 26 iyununda imzalansa da, Ermənistana heç bir silah verilməyib. Ermənistanın "lragir.am" saytının iddiasına görə, həmin vaxt Rusiyanın qanunverici orqanı silah satışı barədə imzalanan kredit müqaviləsinin təsdiq etməkdə maraqlı olmayıb. Rəsmi Moskva öz müttəfiqi ilə bağlı müqaviləni yalnız 2016-cı ilin fevralında təsdiq edib. Ermənistan parlamenti isə müqaviləni 2015-ci ilin 2 iyulunda çox tələsik təsdiq edib. Lakin araşdırmalar nəticəsində məlum olub ki, Ermənistan bu günə qədər 200 milyon kredit əvəzində heç bir silah və hərbi təyinatlı hər hansı texnika almayıb. Həmçinin, Rusiyanın Ermənistana bu vaxta qədər çox köhnə silahlar satdığı məlum olub. Məsələn, əvvəl bağlanan müqavilələrə əsasən, Ermənistan 10 və ya 20 il əvvəl istehsal olunan istismara yararlı silahlar almalı idi. Amma rəsmi Moskva İrəvana 1960-1770-ci illərə aid silahları satmaqda daha maraqlı olub. Rusiya müdafiə sənayesindəki mənbələrə görə, Ermənistana modernizə olunmuş T-73B3 tankları, tank əleyhinə raket sistemləri, BMP-2 döyüş maşınları üçün modullar göndərilir.

Bu da o deməkdir ki, Ermənistana güzəştli qiymətə veriləcək silahlar Azərbaycanın son illərdə Rusiyadan aldığı və yeni sifariş etdiyi silahlarla həm döyüş imkanlarına, həm də miqdarına görə müqayisə oluna bilməz. İrəvanın Moskvadan kredit almaqda əsas məqsədi Azərbaycanın hərbi texnikasına cavab verə biləcək silahlar əldə etməkdir. Amma proseslər Ermənistanın bu istəyinin mümkünsüz olduğunu göstərir. Azərbaycan isə əksinə, Rusiyadan daha müasir hərbi texnika alışını davam etdirir.

Nahid SALAYEV

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Tarix: 22.10.2026 / 19:54

Orta Dəhliz Avropa ilə Asiya arasında ən təhlükəsiz marşrut seçildi...

Turizm regionlarımızın inkişaf mənbələrindən birinə çevrilir...