Üzeyir Şəfiyev: “Cəmiyyətdə özünü təsdiq etmək ehtiyacı var və insanlar bunu müxtəlif yollarla göstərməyə çalışırlar”
Məlum olduğu kimi, “iPhone 17” və “iPhone Air” seriyasının Azərbaycanda rəsmi satışlarına 26 sentyabrdan etibarən start verilib. Gecədən başlayaraq mağazaların önündə "iPhone 17" markalı telefonu əldə etmək üçün uzun növbələr yaranıb.
Məlumat üçün qeyd edək ki, "iPhone 17" markalı telefonun ən ucuzu 2340 AZN, ən bahalısı isə 5670 AZN-dən təklif olunur.
"iPhone 17" 256 gb 2340 AZN
"iPhone 17" 512 GB 2920 AZN
"iPhone 17 AİR" 256 GB 2920 AZN
"iPhone 17 AİR" 512 GB 3500 AZN
"iPhone 17 AİR" 1 TB 4040 AZN
"iPhone 17 PRO" 256 GB 3210 AZN
"iPhone 17 PRO" 512 GB 3790 AZN
"iPhone 17 PRO" 1 TB 4310 AZN
"iPhone 17 PRO MAX" 256 GB 3500 AZN
"iPhone 17 PRO MAX" 512 GB 4080 AZN
"İphone 17 PRO MAX" 1 TB 4580 AZN
"İphone 17 PRO MAX" 2 TB 5670
Qeyd etdiyimiz kimi, 26 sentyabr tarixindən etibarən adıçəkilən markalı telefon satışa çıxarılıb. Maraqlı məqam ondan ibarətdir ki, telefon satışa çıxarıldığı andan etibarən böyük izdihamla alınıb və hətta stokda belə bitib. Bu telefonda maraqlı nə var ki, gecə ilə insanlar onu əldə edib?
“Son model iPhone, bahalı aksesuarlar və ya özəl nömrələrdən istifadə etmək üstünlük və prestij kimi qəbul edilir”
Sosioloq Üzeyir Şəfiyev “Bakı-Xəbər”ə şərhində vurğuladı ki, insanlar həmişə dəbdə olan əşyalara böyük maraq göstərir: “Hətta bəzi ölkələrdə bizim ölkələrdə çox yüksək qiymətli avtomobillərdən və telefonlardan istifadə olunmur. Belə bir cəmiyyətdə şöhrətpərəstlik, yəni göstəriş xarakterli davranışlar geniş yayılıb. İnsanlarda “el gözünə” baxış anlayışı mövcuddur. Sanki cəmiyyətdə özünü təsdiq etmək ehtiyacı var və insanlar bunu müxtəlif yollarla göstərməyə çalışırlar. Məsələn, son model iPhone, bahalı aksesuarlar və ya özəl nömrələrdən istifadə etmək üstünlük və prestij kimi qəbul edilir. Borca girərək, kredit götürərək belə bahalı əşyaları almaqda tərəddüd etməmək də bu sosial təzyiqin göstəricisidir. Bu, sanki bir status yarışı, rəqabət xarakteri daşıyır. Halbuki, alınan əşyalar qısa müddətdə aktuallığını itirir və bazara yeni modellər təqdim olunur. Beləcə, ölkəmizin bazarına bu trendlər asanlıqla diqtə edilir. Bu da öz növbəsində cəmiyyətimizdə kütləvi psixologiyanın güclü olduğunun göstəricisidir”.
Həmsöhbətimiz ümid edir ki, gələcəkdə insanlar daha rasional və praqmatik düşünməyi bacaracaq, nəticədə isə belə ötəri, amma maliyyə itkisinə səbəb olan təşəbbüslərdən uzaq duracaq.
Günel CƏLİLOVA
