“Hayastan” parlament fraksiyasının deputatı Andranik Tevanyan Gənclər Forumunda çıxışı zamanı deyib ki, Ermənistan indi fiziki olaraq iki faktora görə mövcuddur – Rusiya və İran:
“9 noyabr 2020-ci il tarixindən sonra biz tamam başqa ölkədə yaşayırıq. Müharibə elə nəticələrə gətirib çıxarıb ki, Ermənistan artıq Qarabağın təhlükəsizliyinin təminatçısı deyil. Üstəlik, öz təhlükəsizliyininə təminat verə bilmir.
Ermənistan hazırda iki amil – Rusiya və İrana görə fiziki olaraq mövcuddur. Bu iki amil olmasaydı, Ermənistan və Qarabağ sadəcə mövcud olmazdı. İran Zəngəzur üstündə qarşıdurmaya girməyə hazırdır. Ermənistan-Türkiyə sərhədi rus qoşunları tərəfindən qorunur. Qarabağ isə Rusiya sülhməramlıları sayəsində qorunur.
Və bütün bunlarla Ermənistan hakimiyyəti Rusiya bizim düşmənimiz, Türkiyə isə dostumuz olduğunu təbliğ edir. Üstəlik, inandırmağa çalışırlar ki, biz Azərbaycanla münasibətləri tənzimləyə və sülh şəraitində yaşaya bilərik”.
Göründüyü kimi, Ermənistanın bir dövlət kimi yalnız formal adının olduğu vurğulanır.
Politoloq Elşən Mustafayev “Bakı-Xəbər”ə açıqlamasında bildirdi ki, Azərbaycanla bağlı olan məsələlərdə aralarında barışmaz mövqeləri olan bir sıra dövlətlərin mövqeləri üst-üstə düşə bilir: “Çox təəssüflər olsun ki, Azərbaycan məsələsi gündəmə gələndə Birləşmiş Ştatların, Rusiyanın və İranın mövqeləri üst-üstə düşür. Bunlar Azərbaycan məsələsində dərhal birləşə bilirlər. Qərbin Paşinyanı hakimiyyətə gətirməsində öz planları var. Hələ ki, Paşinyan Qərbin istəklərini doğrultmayıb. Bu gün Paşinyan bir əldə üç qarpız tutmaq istəyir və ona görə də axırda heç nəsiz qalacaq. Ermənistanın özünə dayaq axtardığı üç ölkə arasında kəskin ziddiyyətlər və fikir ayrılıqları var. ABŞ-ın İran və Rusiya ilə əlaqələri özünün heç də yaxşı dövrünü yaşamır. ABŞ İranı region üçün təhlükə kimi görür. Həm İrandakı molla rejimini qəbul etmir, həm də Rusiyaya PUA-lar verməsi ABŞ-ı bərk qəzəbləndirir. Hətta Azərbaycan sərhədində hərbi təlimlər keçirməsinə görə ABŞ Dövlət Departamentinin sözçüsü Ned Praysın "Biz İranın region üçün təhlükə olduğunu açıq şəkildə bildirdik” deməsi ABŞ-ın İrana münasibətinin açıq ifadəsidir. İranın Ermənistana silah verməsini də ABŞ yaxşı qarşılamır.
Buna baxmayaraq, Ermənistan Rusiya və İranın hesabına öz dövlətçiliyini zorla da olsa qoruya bilir”.
Ekspertin sözlərinə görə, İran-Rusiya əlaqələri SSRİ dağıldıqdan sonra inkişaf edərək çoxtərəfli xarakter alıb: “Belə ki, İran və Rusiya həm regional, həm də beynəlxalq səviyyədə ortaq maraqlara sahibdir və onların bölgədəki mənfəət anlayışları da bir-birinə çox bənzəyir. Bu iki ölkənin bəhs edilən ortaq maraqları nöqteyi-nəzərindən çıxış edərək, SSRİ dağıldıqdan sonra Rusiya-İran əlaqələrinin bir çox müşahidəçilər tərəfindən “strateji tərəfdaşlıq” və ya “strateji müttəfiqlik” kimi dəyərləndirildiyini deyə bilərik. Ancaq rəsmi Tehran və Moskva bu cür ifadələrin işlədilməsinə ehtiyatlı yanaşırlar. Bu baxımdan onların Ermənistanla bağlı da fikirləri və mövqeləri üst-üstə düşürdü. Hazırda Ermənistan hər iki dostunu satmaq üzrədir. Avropa missiyasını ölkəsinə dəvət etməklə, həm İranın, həm də Rusiyanın marağına qarşı getmiş oldu. Buna baxmayaraq, hər iki ölkə Ermənistanı tumarlamaqla onu əldə saxlamağa çalışırlar. Ancaq görünən budur ki, Ermənistan öz xislətinə uyğun olaraq, əzəli müttəfiqlərini Qərbə dəyişməyə hazırlaşır”.
Məhəmmədəli Qəribli
