Ənvər Çingizoğlu: “Düşünürəm ki, festival çərçivəsində bölgələrimizə daha çox turist axın edəcək və edir də”
Mədəniyyət hər bir xalqın tükənməz xəzinəsidir. Bu xəzinənin qorunması, nəsillərdən-nəsillərə ötürülməsi ən vacib məsələdir. Azərbaycanda dövlət səviyyəsində mədəniyyətin, folklor və etnoqrafiyanın, xalq yaddaşının qorunması, təbliğ edilməsi sahəsində davamlı layihələr həyata keçirilir.
Belə layihələrdən biri də ilk dəfə bütün bölgələrimizin eyni zamanda qatıldığı “Bölgələrdən bölgələrə” Yaradıcılıq Festivalıdır. Mədəniyyət Nazirliyinin təşəbbüsü ilə “100 illik tariximiz” şüarı altında keçirilən “Bölgələrdən bölgələrə” Yaradıcılıq Festivalı bu gün ölkəmizin müxtəlif bölgələrində davam edir.
Bildirək ki, Azərbaycan Xalq Cümhuriyyətinin 100 illiyinə həsr olunan layihənin əsas məqsədi zəngin dövlətçilik ənənələrinə malik olan xalqımızın mədəni irsinin təbliği, regionların mədəni potensialının nümayiş etdirilməsi, bölgələrarası mübadilənin gücləndirilməsidir. İyunun 25-də Masallı rayonunda başlanan festivalın növbəti tədbiri Mingəçevirdə, Ağdamın Quzanlı qəsəbəsində, Lənkəranda, Salyanda, Sabirabadda, Füzuli rayonunun Horadiz şəhərində, Göyçayda keçirilib və digər şəhərlərdə də davam etdirilir. Festivalda Mədəniyyət Nazirliyinin Sumqayıt, Gəncə, Xaçmaz, İsmayıllı, Şəki, Kürdəmir, Ağstafa, Şəmkir, Bərdə, Ağcabədi, Ağdaş, Sabirabad, Lənkəran, Masallı və Biləsuvar regional mədəniyyət idarələrinin hər birinin ekspozisiya çadırları qurulub, regionlar üzrə şəhər və rayonların mədəni irsini əks etdirən sənətkarlıq nümunələri, rəsmlər, suvenirlər və digər əl işləri nümayiş etdirilir.
“Bölgələrdən bölgələrə” Yaradıcılıq Festivalının bölgələrimizin təbliği baxımından böyük əhəmiyyətə malik olduğunu deyən etnoqraf-alim Ənvər Çingizoğlunun sözlərinə görə, ölkəmizdə mədəniyyət və incəsənətin inkişafına göstərilən dövlət qayğısı çox yüksəkdir. O qeyd etdi ki, bu festival ölkəmizin bütün regionlarını əhatə etməklə mədəni zənginlik, xalq sənətkarlığı irsi və incəsənət nümunələri ilə tanış olmaq imkanı yaradır. “Belə bir festivalın keçirilməsini yüksək dəyərləndirmək lazımdır. Bölgələrin qarşılıqlı mədəni, etnoqrafik və tarixi inteqrasiyasının həyata keçirilməsi, onların bir-birilə daha yaxın əlaqələr qurması baxımından bu festivalın əhəmiyyəti əvəzsizdir. Yaradıcılıq festivalında hər bir region üzrə folklor və rəqs qrupları, yerli incəsənət və bədii özfəaliyyət kollektivləri, aşıqlar öz istedad və bacarıqlarını nümayiş etdirirlər. Eyni zamanda da bölgələrin tarixi, arxeologiyası, adətləri, sənətkarlıq nümunələri insanlara təqdim edilir. Belə festivallar şəhərlərin, rayonların mədəni zənginliyini göstərmək, təqdim etmək imkanı yaradır” -deyə bildirən Ə.Çingizoğlunun bildirdiyinə görə, festivalın Cümhuriyyətin 100 illiyinə həsr edilməsi onun qiymətini, əhəmiyyətini daha da artırır: “Bu festival Müsəlman Şərqində ilk demokratik respublika olan Azərbaycan Xalq Cümhuriyyətinin 100 illiyinə həsr edilib. Bu olduqca əhəmiyyətli bir hadisədir. Bu həm də onu göstərir ki, Azərbaycan dövləti Cümhuriyyətin siyasi varisi və onun müqəddəs ənənələrini davam etdirən, yaşadan müstəqil bir ölkədir. Biz mədəni, mənəvi, tarixi dəyərlərimizə sahib çıxdıqca daha güclü oluruq. Bildiyim qədər, layihə ilk dəfə Azərbaycanın bütün regionlarını əhatə edir. Düşünürəm ki, bu, şəhər və rayonlara bir-birinin mədəni zənginliyi, sənətkarlıq irsi və incəsənəti ilə tanış olmağa imkan yaradacaq, bölgələr arasında mədəni körpü rolu oynayacaq və əlaqələri daha da gücləndirəcək”.
Mədəniyyət Nazirliyinin təşəbbüsü ilə Azərbaycan Xalq Cümhuriyyətinin 100 illiyinə həsr olunan “Bölgələrdən bölgələrə” Yaradıcılıq Festivalı çərçivəsində görülən işlərin əhəmiyyətindən birinin də bölgələrə turist axınının güclənməsi olduğunu deyən alimin bildirdiyinə görə, xarici ölkələrdən gələn turistlər də Azərbaycanın rəngarəng mədəni həyatı ilə yaxından tanış olacaqlar. “Bölgələrimizin rəngarəng mədəniyyəti, adət-ənənələri, sənət inciləri turistləri özünə cəlb edir. Düşünürəm ki, festival çərçivəsində bölgələrimizə daha çox turist axın edəcək və edir də” - deyə Ə.Çingizoğlu bildirdi.
İradə SARIYEVA
