Bəlkə də bu onun yeni zarafatıdır, heç əlli yaşı tamam olmur. Niyə mənə belə gəlir? Çünki 23 il bundan əvvəl necə görmüşdümsə, necə tanımışdımsa elə o şəkildə də qalıb. Üzünü bürüyən sirli təbəssüm yenə də yerindədir, səsi də, sözü də həmişəki kimidir-cəsarətli... Əvəzlə düz 23 il əvvəl elə avqust günlərində tanış olmuşam. Utancaq idi Əvəz, özü də çox utancaq. "Hürriyyət" qəzetində mədəniyyətdən yazırdım, Əvəz isə siyasətdən. Yeni tanış olmuşduq, Əvəz utancaq olsa da, mehriban idi. Uşaqlarla ünsiyyət qururdu. Bir gün uşaqlardan kimsə Əvəzin şeir yazdığını dedi, "özü də əruz vəznində, klassik ruhda, bəzən də Baba Pünhansayağı" yazır dedilər. Planlaşmadan sonra Əvəzlə şeirdən danışdıq, bir neçə satirik şeirini oxudu, açığı xoşum gəldi. Dedim Əvəz, sənin öz üslubun var, Baba Pünhanı yamsılamırsan. Şeirləri çox xoşuma gəldi, ondan savayı Əvəzin özü öz şeirlərini çox gözəl oxuyur. Elə obrazlı oxuyur ki, adam özünü o şeirin içində hiss edir. Əvəz yaxşı şeirlər yazırdı, amma onları üzə çıxarmağa, çap etdirməyə, ədəbiyyatın malı etməyə ya tərəddüd edirdi, ya da can atmırdı. Bu daha çox onun söz, şeir qarşısında daşıdığı məsuliyyətlə bağlı idi daha çox. Mən belə düşünürəm. Əvəzi şeirlərini mətbuatda, hətta kitab şəklində çap etdirməyə çox həvəsləndirdirdim. İstedadlı şair olduğu üçün onun ədəbiyyatda tanınmasını, öz yerini tutmasını istəyirdim. Çünki onun şeirimizə, sözümüzə lazım olduğunu hiss edirdim. Ədəbiyyatdan, şeirdən çox danışırdıq. Əvəz çox oxuyurdu, mütaliə edirdi, öyrəndiklərinə həssaslıqla yanaşırdı. Sözə məsuliyyəti də ən çox bundan irəli gəlirdi. Oxuduqları dəryayi-ümman idi... Əvəzlə dostluğumuzun binası 23 il əvvəl qoyulub. Xasiyyətcə bir - birimizin əksiyik, amma xasiyyətimiz də, sözümüz də tutur. Bir - birimizi yarım sözdən anlayırıq. Əvəz bir gün dedi ki, nəhayət ilk kitabımı çap edirəm. 2006-cı il idi. Kitabın məsləhətçisi mən oldum. "Təzə zarafat" qoymuşdu kitabının adını. Maraqlıdır, kitabın redaktoru görkəmli yazıçımız Əlbala Hacızadə, ön sözün müəllifi dəyərli tənqidçi, qiymətlimiz Əsəd Cahangir idi. Əsəd Cahangir də istedadın sərrafıdır. Səhv etmirəmsə, (yanıla da bilərəm ) Əvəzlə Əsəd Cahangiri mən tanış etmişdim. Hər halda yadında belə qalıb niyəsə. Mənə elə gəlir ki, Ə. Cahangirə Əvəzin şeirləri haqda danışmışdım. Əvəz sonradan təkcə şair kimi özünü təsdiq etmədi, həm də yazıçı, jurnalist, publisist kimi öz sözünü dedi. Bu gün 50 yaşını qeyd edən, əllinin əlli cür imtahanından üzü ağ, alnı açıq çıxan dostum Əvəz Qurbanlıdan danışıram... Deyirəm, bəlkə də heç 50 illik yubileyi deyil, bu onun yeni zarafatıdır. Sonra da düşünürəm ki, bu boyda zarafat olar? Dostumuz illərin belini qırıb gəlib əllinin taxtında oturub... Mübarək olsun! Yadımdan çıxmamış onu da deyim ki, Əvəzin bacısı Hicran Qurbanlı da jurnalist kimi mediamızda öz sözünü deyib. Onun sözünü bir növ Əvəz davam etdirib. Əvəz Qurbanlının şeirlərinə mahnı da yazılıb. Xatirə İslamın oxuduğu "Sənsizləmişəm" mahnısını çoxlarınız eşitmisiniz. Xatirə xanım bu mahnını Əvəzin toyunda da oxudu... Əvəzin toyu çox maraqlı keçdi. Köhnə dostları kimi məclisdə biz də vardıq... Onunla çox şirin zarafatımız, xoş münasibətimiz var. Bəzi şeirlərinin ilk oxucusu olmuşam, istəmişəm ki, Əvəzin satirik və lirik şeirlərini hamı oxusun. Yeri gəlmişkən, Əvəz Qurbanlı 1976-cı il avqust ayının 9-da Saatlı rayonunun Azadkənd kəndində dünyaya göz açıb. 1997–1999-cu illərdə Azərbaycan Respublikasının sərhəd qoşunlarının N saylı hərbi hissəsində həqiqi hərbi xidmətdə olub. İxtisasca iddiaçı hüquqşünasdır. 2000-ci ildən indiyə kimi Respublikanın bir çox mətbu orqanlarında jurnalist kimi fəaliyyət göstərir. Uzun müddətdir ki, bədii yaradıcılıqla məşğuldur. Şeir və nəsr, elmi və publisistik məqalələrin müəllifidir. Sözlərinə mahnılar bəstələnib. 2006-cı ildə "Təzə zarafat " adlı satirik və lirik şeirlər kitabı çapdan çıxıb. "Vahid", "Məcməüş-şüəra" ədəbi məclislərinin, o cümlədən Azərbaycan Yazıçılar Birliyinin üzvüdür. Bir çox yerli və beynəlxalq mükafatlara, o cümlədən 2008-ci ildə gənc yazarlar üçün Azərbaycan Respublikası Prezidentinin mükafatına layiq görülüb. 2009-cu ildə Azərbaycan Yazıçılar Birliyində keçirilmiş müsabiqə zamanı "İlin gənc şairi" seçilib. "Zastava, silaha!" adlı tammetrajlı bədii film ssenarisi, 2010-cu ilin avqust ayında Dövlət Sərhəd Xidməti tərəfindən təşkil edilən müsabiqənin qalibi olub. 2012-ci ildə "Canlı dirəklər" adlı hərbi vətənpərvərlik romanı çapdan çıxıb. 2014-cü ildə müəllifin sayca üçüncü kitabı — "Məzardan səngərə" şeirlər toplusu işıq üzü görüb. Müntəzəm olaraq dövri mətbuatda çap olunur. Ə. Qurbanlı, eyni zamanda ictimai fəaliyyəti ilə də tanınıb. 2005 və 2010-cu illərdə Azərbaycan Respublikası Milli Məclisinə keçirilmiş seçkilərdə deputatlığa namizədliyi irəli sürülüb. 2015-ci ilin iyul ayında Azərbaycan Prezidentinin Sərəncamı ilə "Tərəqqi" medalı ilə təltif edilib. Əvəzin ömürlüyünü ona görə təqdim etdim ki, onun bu illər ərzində nə qədər işlər gördüyünü siz də biləsiniz. Əziz dostum, həmkarım Əvəz, səni 50 illik yubileyin münasibətilə ürəkdən təbrik edirəm, uğurlar və cansağlığı arzulayıram.
İradə SARIYEVA
