Tariximizin ən parlaq səhifəsi olan 44 günlük haqq savaşımızda yağıya qarşı mərdliklə döyüşüb müqəddəs şəhidlik zirvəsinə ucalan minlərlə qəhrəmanlardan biri də Biləsuvar rayonu, Ağayrı kəndində boy-başa çatan Xəyal Şakir oğlu Nuridir. Ömrünün 23-cü ilində cismən bizi tərk edən bu Vətən sevdalısı Azərbaycan xalqının iftixar, qürur yerinə dönərək ürəklərdə yaşayır. Vətən və millət naminə canından keçib ölümsüzlüyə qovuşan igid oğlunu dövlət də “Cəsur döyüşçü”, “Vətən uğrunda”, Füzulinin, Cəbrayılın azadlığına görə medallara layiq görüb.
Həyatı əbədiyyət günəşinə bənzər, mərdliyi, qorxmazlığı, vətənsevərliyi gələn nəsillərə örnək olacaq Xəyal Şakir oğlu özünü biləndən erməni dığalarının Qarabağımızın işğalı hər şeydən çox düşündürüb. Orta məktəbi bitirən kimi ordu sıralarına yollanıb. Özü də belə bir vaxtda cəbhə bölgəsinin əsgəri olub doğma Azərbaycanın keşiyində durmağı ən şərəfli iş sayıb. İstəyinə uyğun olaraq Füzulidə əlinə silah alıb Vətən torpaqlarını qorumaqla bərabər, yağıdan qisas alacağı günə hazırlaşıb. Göstərdiyi nümunəvi xidmətə görə əsgərlərin, zabitlərin sevgisini, rəğbətini qazanıb. Ləyaqəti, saf vicdanı, dürüstlüyü, qeyrəti, eləcə də torpağına, xalqına sevgisi hərbi hissədə keçirilən bütün təlimlərdə ona yalnız uğur gətirib. Xəyal Qarabağı tezliklə azad görmək istəyi ilə hər bir çətinliyə dözüb. Ən çox təkrar etdiyi də bu məşhur misra olub: ”Torpaq, uğrunda ölən varsa, Vətəndir”...
Xəyal Aprel döyüşlərində iştirak etməklə dığalara qan qusdurub, ürəyincə qisas alıb. Lələtəpədə dalğalanan üçrəngli müqəddəs bayrağımıza qürurla baxıb, o gündən Böyük qələbə hissi düşüncəsinə hakim kəsilib, onun lap yaxında olmasına tam inanıb. Bu arzunun qanadlarında müddətli həqiqi hərbi xidmətidən Xəyal başıuca, qəlbə sevinci ilə evə dönüb. Bir iki ay təsərrüfatla məşğul olub. Amma Vətənə qeyrətli oğullar gərək olduğu vaxtda öz yerini yenidən səngərdə görüb. Elə ömrünü hərbiyə bağlamağı da ən şərəfli yol bilib. Odur ki, Xəyal valideynlərinin icazəsini alıb, ordu sıralarına qayıdıb, əvvəllər əsgər olduğu cəbhə bölgəsində hərbi qulluqçusu kimi xidmətə başlayıb. Məqamı gələndə yağı tapdağında qalan əzəli yurd yerimiz - Qarabağımız uğrunda can qoyub və son nəfəsinə qədər mərdliklə döyüşüb onu azad etmək Xəyalın əsas amalı olub. Xidmətdə olduğu müddətdə düşmənlə üz-üzə gələndə qəlbi qisas almaq istəyi ilə alışıb-yanıb.
2020-ci il sentyabrın 27-də erməni işğalçılarına qarşı başlanan müharibəyə Azərbaycan əsgərinin önündə Xəyal Şakir oğlu gedib. Ölümün gözünə dik baxaraq Vətənin qisasını almaq üçün özünü odun-alovun işinə atıb. 3 gün döyüşlər də olan Azərbaycanın qəhrəman oğlu ölüm-dirim savaşlardan hər dəfə zəfərlə çixib. Yağının kabusuna çevrilməklə, onu ağır itkilərə məruz qoyub. 29 sentyabrda Füzuli rayonunda sonucu dəfə dığalara öz gücünü layiqincə göstərib, çoxlu sayda canlı qüvvəsini, hərbi texnikasını məhv edib. Özü isə ürəyindən aldığı snayper gülləsi ilə şəhadətə yetişib. Vətən, torpaq naminə bu şərəfli ölüm Xəyalı bütün Azərbaycan xalqının qəhrəman övladı etməklə adını tarixin ən parlaq səhifəsinə yazıb.
Xəyalın ömrü qısa olsa da, o, xəyallara dönərək ürəklərdə yaşayacaq. Vətənin əbədiyyəti qədər...
Zəfər ORUCOĞLU Azərbaycan Jurnalistlər Birliyinin üzvü
