Rəşad Həsənov: “Ölkə başçısı tərəfindən imzalanan sərəncam ipəkçilik sahəsində mövcud olan müəyyən çatışmazlıqların aradan qaldırılması istiqamətində dəstək rolunu oynaya bilər”
Azərbaycanda ipəkçilik 1500 illik tarixə və şanlı ənənələrə malik olan bir sahədir. XX əsrin ikinci yarısında, xüsusən də 1970-ci ildən başlayaraq ölkəmizdə ipəkçiliyin inkişafı daha geniş vüsət almışdı. O dövrdə ildə 5-6 min ton barama, 500-550 ton ipək istehsal olunur, on milyonlarla kvadratmetr müxtəlif çeşidli ipək parçalar toxunurdu. İpəkqurdunun bəslənilməsi və barama istehsalı ilə 150 mindən çox insan məşğul olurdu. Azərbaycan SSRİ-də barama istehsalına görə 2-ci, baramanın və ipəyin keyfiyyətinə görə 1-ci yeri tuturdu.
Sovetlər Birliyinin dağılması və iqtisadi əlaqələrin qırılması səbəbindən, bir çox sahələr kimi, ipəkçilik də tənəzzülə uğradı.
Hazırda Prezident İlham Əliyevin rəhbərliyi ilə Azərbaycanın hərtərəfli inkişafında yeni mərhələ yaşanır. Dövlət başçısının həyata keçirdiyi iqtisadi siyasətin əsas xarakterik xüsusiyyətləri onun sosialyönümlü olması, habelə bütün problemlərin həllində iqtisadi aspektin mövcudluğunun ön plana çəkilməsidir. Dövlət proqramlarının, fərman və sərəncamların icrası ölkədə gedən iqtisadi inkişafın sürətləndirilməsini uğurla təmin edir, tərəqqi prosesində özəl sektorun payı və rolunu davamlı şəkildə artırır.
Prezident İlham Əliyev ipəkçiliyin inkişafı ilə bağlı növbəti sərəncam imzalayıb. Sərəncama əsasən, tut tinglərinin və barama toxumlarının tədarük edilməsi və məhsul istehsalçılarına əvəzsiz verilməsi məqsədilə Kənd Təsərrüfatı Nazirliyinə 1,05 milyon manat pul ayrılıb.
İqtisadçı ekspert Rəşad Həsənov “Bakı-Xəbər”ə açıqlamasında bildirdi ki, ənənəvi sahələrdən biri də ipəkçilikdir: “Hökümətin ipəkçiliyin inkişafı istiqamətində fəaliyyəti məhz buna söykənir. Müstəqiliyyin ilk 20 illiyində ipəkçiliyin mövcudluğu və infrastrukturunun dağıdılması prosesi baş verib. Bu gün regionlarda ipəkçiliyin inkişafı üçün müvafiq infrastruktur və imkanlar yoxdur. Hökumətin bu sahə üzərində nəzarəti artırması nəticəsində yerli icra qurumları vətəndaşların üzərinə müəyyən qədər ipək istehsalı qoyur. Və onlara barama tumları paylayır. Son nəticədə insanlar onun yemi ilə bağlı problemlər yaşayırlar. Pərakəndə istehsal əhalidə müəyyən dərəcədə narahatlığa səbəb olur. Hər hansı bir istiqamət üzrə müəyyən strategiya hazırlanarkən onun strukturunun formalaşdırılması əsas olaraq müəyyənləşdirilməlidir. Daha sonra onun üzərində istehsalı inkişaf etdirmək mümkündur. Bu baxımdan hesab edirəm ki, ölkə başçısı tərəfindən imzalanan sərəncam müəyyən çatışmazlıqların aradan qaldırılması istiqamətində dəstək rolunu oynaya bilər. Region əhalisinin imkanları uzunmüddətli dövr üçün tut ağaclarının əkilməsi istiqamətində yatırım etməyə yetərli deyil. Belə olan şəraitdə hökumətin öhdəlikləri öz üzərinə götürməsi ipəkçiliyin inkişafına müsbət təsir göstərə bilər”.
Günel CƏLİLOVA
