Rusiyada son bir ildə taxta materiallarının qiyməti ikiqat artıb. Artıq hökumət taxta ixracına qadağa qoymaq barədə düşünür. Qeyd edək ki, son bir ildə taxta materiallarının qiymətində azalma müşahidə edilirdi. Bu hal ölkənin daxili ilə yanaşı, xarici bazarlara da aiddir.
Rusiya taxta evlərin tikintisi assosiasiyasının həmsədri Yuliya Yurlova bildirib ki, hazırda taxta qıtlığı yaşanır. Qıtlıq bir neçə aydır ki, davam edir və bunun səbəbi dünya bazarlarında yaranmış böyük tələbatdır.
Yaranmış vəziyyətlə bağlı Rusiyada kobud emal olunmuş bir sıra ağac növlərinin ixracına qoyulan rüsumun məbləği 10% artırılıb və bu artım ilin sonunadək qüvvədə olacaq. Rusiya Baş nazirinin müavini Yuri Trutnev də bildirib ki, hökumət dəyirmi ağac materiallarının ixracına dair 2022-ci ildə qüvvəyə minəcək qadağanın ləğv edilməsi məsələsini nəzərdən keçirmir.
Dövlət Statistika Komitəsinin yaydığı məlumatda deyilirdi ki, 2021-ci ilin aprel ayında mart ayına nisbətən kəsilmiş taxtalar üzrə daha çox bahalaşma qeydə alınıb.
Məlumat üçün bildirək ki, kəsilmiş taxtanın bir kubmetrinin qiyməti bu ilin yanvar ayında 331.17 manata, fevral ayında 336.23 manata, mart ayında 339.79 manata, aprel ayında isə 353.89 manata olub. Aprel ayında ilin əvvəli ilə müqayisədə qiymət 22.72 manat bahalaşıb. Aprel ayında qiymət mart ayı ilə müqayisədə 14.10 manat, yaxud 4,15 faiz bahalaşıb.
Onu da qeyd edək ki, Azərbaycanda tikintidə əsasən Rusiyadan gətirilən taxtadan istifadə olunur. Maraqlıdır, qonşu ölkədə taxtanın satış qiymətinin qalxması və ixraca qoyulan rüsumun artması Azərbaycanın tikinti sektoruna necə təsir edəcək?
“Rusiyada taxtanın ixrac rüsumunun artırılması Azərbaycan bazarında da ciddi qiymət artımına səbəb ola bilər”
İqtisadçı-ekspert Natiq Cəfərli bildirdi ki, son bir neçə aydır ölkəmizdə taxtanın qiymətində ciddi artım var: "Mart ayından qiymət artımı daha ciddi hiss olunmağa başlayıb. Rusiyada taxtanın ixrac rüsumunun artırılması Azərbaycan bazarında da ciddi qiymət artımına səbəb ola bilər. Taxtanın bahalaşmasının fərdi tikililərin qiymətinə də təsiri olacaq. Fərdi tikililərin maya dəyərinin artması gözlənir".
Günel CƏLİLOVA
