Mayın 25-də Azərbaycan Respublikasının Qırğız Respublikasındakı Səfirliyi Respublika Günü münasibətilə "Damas" otelinin ziyafət salonunda rəsmi qəbul keçirib.
Qırğız Respublikası Prezident Aparatının, Hökumətin üzvləri, Jokorku Keneşin (Parlamentin) deputatları, digər yüksək vəzifəli şəxslər, ölkədə akkreditə olunmuş səfirlər, ziyalılar, diaspor fəalları, kütləvi informasiya vasitələrinin rəhbərləri və əməkdaşlarının iştirak etdiyi qəbulda əvvəlcə Azərbaycan və Qırğızıstan dövlət himnləri səsləndirilib.
Sonra Azərbaycanın Qırğız Respublikasında Fövqəladə və Səlahiyyətli səfiri Hidayət Orucov çıxış edib.
Səfir Hidayət Orucov çıxışında bildirib ki, 98 il əvvəl 28 may 1918-ci ildə müsəlman dünyasında ilk dünyəvi, demokratik respublika yaranıb. Lakin XX əsrin əvvəllərində dünyada və regionda yaranan çətin siyasi vəziyyət ölkəmizin müstəqilliyinin saxlanmasına imkan verməyib və cəmi 23 ay sonra Azərbaycan Xalq Cumhuriyyəti yeni yaranmış Sovet dövlətinin tərkibinə daxil olub.
Qısa tarixinə baxmayaraq, Azərbaycan Xalq Cumhuriyyəti bütün region üçün dünyəvi və demokratik dövlətin nümunəvi məktəbi olub. SSRİ dağılandan sonra, 1991-ci ildə Azərbaycan öz Dövlət müstəqilliyini bərpa edib.
Azərbaycan müstəqilliyinin bərpasından sonra Ermənistanın ölkəmizə qarşı təcavüzü ilə qarşılaşıb, ərazilərmizin 20% işğal edilib və 1 milyon insan öz doğma torpağında qaçqın və məcburi köçkün olub.
Aprel ayının əvvəllərində Ermənistan iri çaplı silahlardan istifadə edərək Ermənistan-Azərbaycan Silahlı Qüvvələrinin təmas xəttində yerləşən ərazilərimizi, dinc əhalimizi intensiv atəşə tutub.
Ordumuz ermənilərin layiqli cavabını verərək, 2000 hektardan çox ərazimiz, 21 strateji yüksəklik işğaldan azad olunub.
Azərbaycan Respublikasının Prezidenti, Ali Baş komandan İlham Əliyev Ermənistanın siyasi və hərbi işğalçı rejiminin rəhbərliyindən fərqli olaraq, hər zamankı kimi böyük humanizm göstərərək işğal olunmuş ərazilərimizdə yaşayan Ermənistan vətəndaşlarına atəş açmamağı əmr edib.
Hələ 1993-cü ildə BMT-nin Təhlükəsizlik Şurası Azərbaycan Respublikasının ərazi bütövlüyünü, suverenliyini dəstəkləyən, Ermənistan silahlı qüvvələrinin Azərbaycan ərazisindən qeyd-şərtsiz dərhal çıxarılması ilə bağlı dörd Qətnamə qəbul edib. Həmçinin BMT Baş Assambleyası, ATƏT, Avropa Şurası, İslam Əməkdaşlıq Təşkilatı və Qoşulmama Hərəkatı digər nüfuzlu beynəlxalq təşkilatlar analoji qərarlar qəbul ediblər. Onlar Azərbaycan ərazisinin bütövlüyünü və işğal edilmiş ərazilərin azad olunmasının vacibliyini təsdiq ediblər.
Təəssüf ki, bu günədək belə böyük beynəlxalq təşkilatların qərarları icra olunmur.
Hazırda Prezident İlham Əliyev tərəfindən aparılan siyasət - ulu öndər Heydər Əliyevin başladığı böyük işlərin davamı kimi, ölkədə demokratik islahatların həyata keçirilməsi, ölkənin sosial-iqtisadi inkişafı, ölkə vətəndaşlarının hüquq və azadlıqlarının qorunması, Azərbaycanın müstəqilliyinin daha da möhkəmlənməsinə xidmət edir.
Azərbaycanda bütün sahələrdə - siyasətdə, iqtisadi-sosial sahədə, demokratikləşmənin uğurlu inkişafında, dövlət və ordu quruculuğunda uzun illərdir müşahidə olunan inkişaf uğurların gözlə görünən bariz nümunəsidir.
Bu müvəffəqiyyətlər elmin, mədəniyyətin, təhsilin və idmanın bütün sahələrini əhatə edir. 2015-ci ildə Bakıda Birinci Avropa Oyunları yüksək səviyyədə keçirilib. Hazırda Bakıda keçiriləcək Formula-1 Avropa Qran Pri yarışlarının tamamlama işdəri gedir. Həmçinin, 2017-ci ildə Bakıda IV İslam Həmrəylik Oyunları keçiriləcək.
Azərbaycan və Qırğızıstan arasında əməkdaşlıq qarşılıqlı etibar, dostluq və qardaşlıq prinsipi ilə siyasi, ticari-iqtisadi, mədəni, humanitar və digər sahələrdə inkişaf edir.
Bizim ölkələrin potensialı, ölkələr arasındakı iqtisadi əlaqələri və mal dövriyyəsini dəfələrlə artırmağa imkan verir.
Bir çox beynəlxalq və regional məsələlərdə bizim mövqelərimiz tam üst-üstə düşür.
Azərbaycanla Qırğızıstan arasında bütün sahələrdə möhkəmlənən əməkdaşlıq əlaqələri iki qardaş xalqların başçıları - Azərbaycan Prezidenti İlham Əliyevin və Qırğızıstan Prezidenti Almazbek Atambayevin həyata keçirdiyi uğurlu siyasətin prioritet istiqamətləridir.
Sonra Qırğız Respublikasının Xarici işlər nazirinin müavini Emil Kaykiyev çıxış edib.
Nazir müavini çıxışında 90-cı illərdə Azərbaycan dövlətçiliyinin formalaşdırılmasında ümummilli lider Heydər Əliyevin rolunu xüsusilə qeyd edib və onun siyasətinin uğurlu davamçısı Prezident İlham Əliyevin nailiyyətləri haqqında danışıb.
Prezident Almazbek Atambayev və Prezident İlham Əliyev tərəfindən aparılan uğurlu siyasi kurs nəticəsində Qırğızıstan-Azərbaycan münasibətləri, strateji əməkdaşlıq mərhələsinə qədəm qoyub.
Nazir müavini Qırğızıstanın bu günkü Azərbaycanın nailiyyətlərini və beynəlxalq arenada nüfuzunu qürurla müşahidə etdiyini bildirib.
Emi Kaykiyev deyib: "Biz bir-birimizin ərazi bütövlüyünün və suverenliyin tanınması, dostluq və qarşılıqlı rəğbət əsasında inkişaf edən Qırğızıstan-Azərbaycan münasibətlərinin pozitiv dinamikasını yüksək qiymətlədiririk".
Qəbulda iştirakçılar Azərbaycanın tarixi, bu günü, sürətli inkişafını əks etdirən, Bakıda keçirilən Birinci Avropa Oyunları və həmçinin keçiriləcək Formula- Avropa Qran Pri haqqında video materiallara maraqla baxdılar, görkəmli incəsənət ustalarının canlı ifasında ecazkar Azərbaycan təranələrini dinləyib, Azərbaycan mətbəxinin nəfis təamlarından dadıblar.
Xəbər xidməti
