Prezident İlham Əliyev və xanımı Mehriban Əliyeva tarixdə ilk dəfə İstanbulda keçirilən Ümumdünya Humanitar Sammitində iştirak edirlər. "Trend"in məlumatına görə, sammit BMT-nin baş katibi Pan Gi Munun təşəbbüsü və BMT-nin Humanitar məsələlərin əlaqələndirilməsi idarəsinin dəstəyi ilə keçirilir. Sammitdə 177 ölkənin nümayəndəsi, 125 dövlət və hökumət başçısı iştirak edir.
Tədbir BMT-nin baş katibi Pan Gi Mun və Türkiyə Prezidenti Rəcəb Tayyib Ərdoğanın giriş nitqləri ilə başlayıb. Sammitdə Almaniya Kansleri Angela Merkel, Ukrayna Prezidenti Petro Poroşenko, Gürcüstan Prezidenti Georgi Marqvelaşvili, Makedoniya Prezidenti George İvanov, Mali Prezidenti İbrahim Bubakar Keyt, Küveyt Əmiri Sabah əl-Əhməd əl-Cabir əs-Sabah, Niderlandın Baş naziri Mark Ryutte, Livanın Baş naziri Tammam Salam, digər ölkələrin liderləri iştirak edir.
Sammitin gedişində humanitar yardım tədarüklərinin təşkili məsələlərinin müzakirə ediləcəyi yeddi "dəyirmi masa" iclası, 15 sessiya keçiriləcək.
Sammitə, həmçinin qeyri-hökumət təşkilatları, beynəlxalq humanitar strukturlar, özəl sektorun nümayəndələri dəvət edilib. Forumda ümumilikdə təqribən 6 000 nəfər iştirak edəcək.
Sammitin məqsədi beynəlxalq humanitar sistemi gücləndirməkdir.
İstanbulun sammitin keçirilmə yeri kimi seçilməsi təsadüfi deyil, çünki Türkiyə daha çox qaçqın qəbul edib.
Sammit 23-24 may tarixlərində keçiriləcək.
Sammitin nəticələri bütün dünyada humanitar böhrandan əziyyət çəkən insanların həyat səviyyəsinin yüksəlməsinə xidmət edəcək. Bunu Azərbaycan Prezidenti İlham Əliyev İstanbulda I Dünya Humanitar Sammitində çıxışında deyib.
Prezident bildirib: "Biz Azərbaycanda qaçqın və ya məcburi köçkün olmağın nə olduğunu çox yaxşı bilirik".
Dövlət başçısı xatırladıb ki, bir milyondan çox azərbaycanlı 20 ildən artıq müddət ərzində Ermənistanın hərbi təcavüzündən və işğalından əziyyət çəkir.
İlham Əliyev qeyd edib: "Bu təcavüz nəticəsində bizim beynəlxalq səviyyədə tanınmış ərazilərimizin 20 faizi işğal altındadır. Bir milyondan çox azərbaycanlı qaçqın və məcburi köçkün olub".
Azərbaycan Prezidenti diqqətə çatdırıb ki, Ermənistan azərbaycanlılara qarşı etnik təmizləmə və soyqırım törədib: "Ermənistanın 1992-ci ildə törətdiyi Xocalı soyqırımı 10-dan artıq ölkə tərəfindən tanınıb. Xocalı soyqırımı nəticəsində 613 mülki şəxs amansızcasına öldürülüb, onlar arasında 106 qadın, 63 uşaq, 70 nəfər yaşlı insan var. 1000-dən çox insan itkin düşüb".
Dövlət başçısı vurğulayıb ki, Ermənistan Azərbaycana qarşı təcavüz siyasətini davam etdirir: "2016-cı ilin aprelində Ermənistan dinc Azərbaycan vətəndaşlarına qarşı yeni hücuma başladı. Bu hücum nəticəsində əsgər və zabitlərimiz, eləcə də altı mülki vətəndaşımız öldürüldü. 30-dan artıq mülki şəxs yaralandı. Kəndlərimizin atəşə tutulması nəticəsində 500-dən çox evə zərər dəydi, 100-dən çox ev tamamilə dağıdıldı və yandırıldı".
Prezident həmçinin bildirib ki, Ermənistan ordusu Azərbaycanın mülki əhalisinə qarşı qadağan olunmuş silah növlərindən, xüsusilə də fosfor bombalarından istifadə edib: "Ermənistanın törətdiyi bütün hərbi cinayətlər sənədləşdirilib və beynəlxalq müşahidəçilərə təqdim olunub. Bizim mülki əhalini qorumaq üçün Azərbaycan Ordusu uğurlu əks-hücuma keçdi və yalnız bundan sonra təcavüzkar dayandı".
Dövlət başçısı xatırladıb ki, Ermənistan BMT Təhlükəsizlik Şurasının erməni qoşunlarının Azərbaycan ərazisindən qeyd-şərtsiz və dərhal çıxarılmasını tələb edən dörd qətnaməsinə məhəl qoymur: "Dağlıq Qarabağ və Azərbaycanın digər yeddi rayonu işğal olunub. Bəzi hallarda BMT Təhlükəsizlik Şurasının qətnamələri bir neçə gün ərzində, hətta bir neçə saata yerinə yetirilir. Lakin bu məsələyə gəldikdə, həmin qətnamələr 20 ildən artıqdır kağız üzərində qalır. Bu, Azərbaycana qarşı ikili standartlar siyasətidir. Ermənistan bu qətnamələri yerinə yetirməlidir, ya da ona qarşı sanksiyalar tətbiq olunmalıdır. Azərbaycanın ərazi bütövlüyü bərpa edilməlidir".
İlham Əliyev dünyanın diqqətini Ermənistanın "çirkli bomba" təhdidinə də yönəltdi
"Hazırda regionda digər böyük təhlükə Ermənistanın Metsamor Atom Elektrik Stansiyasıdır". Bu sözləri Azərbaycan Prezidenti İlham Əliyev İstanbulda keçirilən Dünya Humanitar Sammitində çıxışı zamanı deyib. O bildirib ki, Ermənistanın bu stansiyanın radioaktiv tullantılarından qanunsuz istifadə etməsi ilə bağlı məlumatlar var: "Hazırda regionda digər böyük təhlükə Ermənistanın "Metsamor" Atom Elektrik Stansiyasıdır. Ermənistanın bu stansiyanın radioaktiv tullantılarından qanunsuz istifadə etməsi ilə bağlı məlumatlar var. Ermənistanın parlament rəsmiləri, siyasətçiləri aprel ayında elan etdilər ki, ölkənin nüvə silahı - "çirkli bomba"sı var. Buna beynəlxalq ictimaiyyət tərəfindən reaksiya verilməlidir. Ermənistanın nüvə təhdidi dayandırılmalıdır".
Xəbər xidməti
