Ermənistanda kütlənin hakimiyyətə basqısı hər keçən gün artır. Ölkədə korrupsiya ilə mübarizənin ölü nöqtədən tərpənməməsi isə Avropa İttifaqının bu ölkəyə ayırmağı nəzərdə tutduğu 15 milyonluq yardımın verilməsi qərarından geri çəkilməsinə gətirib ki, bu da ölkədə onsuz da artmaqda olan narazılığın son həddə gəlməsinə səbəb olub.
Bu barədə antikorrupsiya konfransındakı çıxışında bu ölkənin Avropa İttifaqındakı nümayəndə heyətinin rəhbəri Pyotr Svitalski də bildirib. O deyib ki, Ermənistan hökuməti bir sıra mühüm sənədlər imzalayaraq antikorrupsiya şurası yaradıb. Avropa İttifaqı isə bu məqsədlə 15 milyon dollar ayırmağı vəd edib. Lakin bu istiqamətdə heç bir iş görülməyib. Mayın 12-də keçirilən hökumətin iclasında antikorrupsiya şurasına başçılıq edən baş nazir Ovik Abramyan da korrupsiya ilə mübarizənin yetərsiz olduğunu etiraf edib. Bu məqsədlə o, əhali arasında sosioloji sorğu keçirilməsini və məmurlardan hansının əhali arasında korrupsioner kimi qəbul olunduğunu müəyyən etməyi təklif edib.
Faktiki, hazırda Aİ Ermənistana ayırdığı 15 milyon dolları verməkdən imtina edir. Bu isə onsuz da ağır durumda olan ölkədə vəziyyətin daha da gərginləşməsinə gətirib. İndi bu ölkədə sadə vətəndaşlar hesab vaxtının gəldiyini düşünür və artıq dünəndən başlayaraq İrəvanda etirazçılar küçələrə axışaraq hakimiyyətdəki önəmli simaların istefasını tələb edir. Məsələ burasındadır ki, Ovik Abramyanın hökumətə sədrlik etdiyi müddətdə Ermənistanın xarici borcu görünməmiş dərəcədə artıb. Belə ki, təkcə son 6 ayda hökumət 1 milyard dollar xarici borc alıb və ümumiyyətlə son illərdə faktiki hökumətin bütün öhdəlikləri xaricdən alınan borcun hesabına qarşılanıb, ölkənin öz gəlirləri isə ayrı-ayrı məmurlar tərəfindən mənimsənilərək xarici banklara daşınıb. Bütün bunların nəticəsi olaraq isə Ermənistan artıq məngənə arasında qalmış kimi bir duruma düşüb. İndi bu ölkə hökuməti həm yuxarıdan, həm də aşağıdan təzyiqlərlə üz-üzədir: Avropa İttifaqı yardım ayırmayacağını bəyan edir, əhali ölkə gəlirlərinin və xaricdən alınan borcun hara sərf olunduğu barədə hesab tələb edir. Bütün baş verənlər fonunda isə artıq oliqarxların siçovulların gəmini tərk etdiyi kimi bir-bir bu ölkəni tərk etməsi barədə xəbərlər ölkə gündəmindən düşmür.
Belə bir vaxtda maraqlı olan hələ də Azərbaycan torpaqlarını işğalda saxlamaq üçün dirənən Ermənistan hökumətinin Qarabağda yaşayan ermənilərə hansı perspektiv vəd etdiyidir. Bəlli məsələdir ki, hazırda Ermənistan hökuməti öz başının hayındadır və Azərbaycan tərəfinə atdığı hər güllə onun xaici borcunu qətrə-qətrə artırmaqdadır. Görünən o ki, xaricə üz tutan oliqarx da, İrəvan küçələrində etiraz aksiyası keçirən sadə əhali də bunun fərqindədir. Bütün bunların fonunda ermənilərin hansı məntiqlə Azərbaycanla qarşıdurmada özləri üçün hansısa ürəkaçan perspektivə ümid etdiyi həqiqətən maraq doğurur. Bəlkə artıq həqiqətin gözünün içinə baxasız, "hay”?
Samirə SƏFƏROVA
