"Multikulturalizmə giriş" kitabında anti-Azərbaycan, ermənipərəst elementlər kimin əli ilə işlənib... Dəhşət!...

Tarix: 13.05.2016 / 01:12
Bölmə: Gündəm

"Ərəb işğallarından sonra Azərbaycan da Ermənistanla birlikdə Əl-Cəzirə adlı Xilafətin 4-cü əmirliyinin tərkibinə qatılıb". Dəhşət! Nə Ermənistan Xilafət dövründə? "Alban katalikosunun iqamətgahı Çoqay şəhərində yerləşirdi. 552-ci ildə iqamətgah Bərdəyə köçürülüb. İslam futuhatlarından, xüsusən də Alban məlikliyinin süqutundan sonra ölkədə xristianlığın rolu zəifləmiş, kilsələrdə ibadət erməni dilində aparılmış, alban dili sıxışdırılmışdı.

8-9-cu əsrlərdə Azərbaycan ərazisində müstəqil dövlətlər yarananda Alban kilsəsi yenidən avtokefal kilsə statusunu bərpa etdirmişdi".

Bu nədir? Dəhşətdir ki...VI-VII əsrdə Albaniyada erməni nə gəzirdi, erməni dili nə gəzirdi? Bu ki, sırf ermənipərəst mülahizədir. Elə ermənilər də iddia edir ki, biz Qafqazda hələ Albaniyanın dövründə mövcud olmuşuq. Çoqay şəhəri haradadır? Bəs biz əsaslı olaraq iddia edirik ki, ermənilərin Qafqaza gəlişi 1828-ci il Türkmənçay müqaviləsindən sonra başlayıb. Belədə kim və nə ağılla yazır ki, 7 və 8-ci əsrdə Albaniyada ermənilər var idi və hətta kilsədə erməni dili alban dilini sıxışdırmağa başlamışdı? Bu ki, Azərbaycana düşmənçilikdir... Bu kitabı kim, nə zaman yazıb? Elmi rəy alıbmı? Onu internetə kim yerləşdirib? Beləliklə, axtarışa başladıq.

unec.edu.az saytında yerləşdirilən "Multikulturalizmə giriş" mühazirələr toplusu haqqında araşdırma apararkən ilk üz tutduğumuz Bakı Beynəlxalq Multikulturalizm Mərkəzi oldu. Mərkəzin mətbuat xidmətinin əməkdaşı Sevinc Mürvətqızı "Bakı-Xəbər"ə açıqlamasında vəsaitdən xəbərsiz olduqlarını bildirdi. S.Mürvətqızı dedi ki, Beynəlxalq Multikulturalizm Mərkəzinin bu vəsaitin hazırlanmasında iştirakı yoxdur: "Bakı Beynəlxalq Multikulturalizm Mərkəzinin bu adda dərslik vəsaiti yoxdur. "Multikulturalizmə giriş"dən xəbərimiz yoxdur. Ancaq bu məsələni araşdıracağıq. Mərkəzin "Azərbaycan multikulturalizminin qaynaqları" seriyasından "Azərbaycan multikulturalizminin ədəbi-bədii qaynaqları" kitabının birinci hissəsi çap olunub. İkinci və üçüncü cild də çapa hazırlanır. Bizim qurumun vəsaiti alimlərin, tədqiqatçıların iştirakı ilə dərslik olaraq hazırlanıb".

Siyasi elmlər üzrə fəlsəfə doktoru Zaur Əliyev "Bakı-Xəbər"ə bildirdi ki, "Multikulturalizmə giriş"də əksini tapan məsələ kökündən yanlışdır: "Bilirsiz, ərəblərin Azərbaycana işğalçılıq müharibəsi başlanandan sonra tariximizə aid kütləvi saxta məlumatlar ərəbdilli mənbələrdən daxil olmağa başladı. Azərbaycanın tanınan tarixçiləri də ərəb mənbələrinə müraciət edərək o saxtakarlığın ölkəmizdə elmə gəlməsinə səbəb oldu. Ərəblər, etnik mənsubiyyətindən asılı olmayaraq, bütün xristianları, o cümlədən arami, hay və albanları "ərməni" adlandırırdı. Bu ənənə sonrakı dövrlərdə hakim olan müsəlman türk sülalələrinin zamanında da davam edib. "Hay" və "erməni" anlayışları tamamilə fərqli mahiyyət kəsb edir. "Ərmən" sözü "ər" və "mən" söz birləşməsindən əmələ gəlib, mənası "sıravi döyüşçü" deməkdir. Məsələ ondadır ki, 1828-ci ildə haylar Azərbaycana köçürülərkən xristian ərmən-qıpçaqlar din qardaşları olan rusların mövqeyindən çıxış edərək hayları özlərinə müttəfiq kimi qəbul etdilər. Ermənilər, daha dəqiq desək, ərmənlər Qafqazın yerli sakinləri olan xristian türkləridir. Nəticədə Ərməniyyə adlı türk dövləti hayların Ermənistanına çevrildi. Bu günün özündə də ermənistanlılar Qarabağdan olan erməniləri erməni, yəni hay hesab etmir, onları ikrahla "şurtvas" adlandırır ki, bu da "dönmə" mənasındadır. Apostollar tərəfindən əsası qoyulan Alban Apostol kilsəsi Qafqazın ən qədim kilsəsi olub, apostol qanunları ilə fəaliyyət göstərib, V əsrdən etibarən xristian dünyasında gedən kilsə mübahisələri onu diofizit və monofizit mənsəblərə bölüb ki, bu da albanlar arasında parçalanma yaradıb. Albanlarla xristian türk ərmənlər arasında bölünmə baş verib o dövrdə. IV əsrin ortalarına qədər olan dövrdə ərazidə hay, yəni bu gün erməni ola bilməzdi. Çünki bu dövrə qədər Qafqaz ərazisində ermənilərin hansısa ərazidə kompakt şəkildə yaşaması məlum deyil. Albanlarla narazılıq yaşayan isə sakların bir qolu olan sisaklardır ki, ərəblər onları ərmən adlandırır. 1841-ci ilə rus çarının fərmanı ilə Klikyanın (müasir Türkiyə ərazisi) Sus şəhərindən erməni Qriqoryan kilsəsinin Eçmiədzinə köçürülməsi və Alban ortadoks kilsəsinin onun tabeliyinə verilməsi başladı".

Z.Əliyevin qeyd etdiyinə görə, bizim bəlalar da ondan sonra yarandı, tariximizdə XVII əsr Hindistanda yazılan, saxtalaşdırılan qədim "erməni tarixçilərinin" əsərləri hegemonluq əldə etdi: "Təəssüf edirəm ki, bu gün də bizim bəzi tədqiqatçılarımız belə məsələlərə səthi yanaşır, ərəb-erməni-rus saxta məlumatlarına hələ də əsaslanırlar".

"Multikulturalizmə giriş"də yer alan "Ərəb işğallarından sonra Azərbaycan da Ermənistanla birlikdə Əl-Cəzirə adlı Xilafətin 4-cü əmirliyinin tərkibinə qatılıb" fikrinə, o cümlədən də qeyd etdiyimiz başqa məsələlərə münasibət bildirən AMEA-nın Tarix İnstitutunun yeni tarix şöbəsinin müdiri, tarixçi alim Hacı Həsənov "Bakı-Xəbər"ə dedi ki, bunların hamısı kökündən yanlışdır: "Bu çox-çox yanlış fikirlərdir. O dövrlərdə Ermənistan nə gəzirdi... Təəssüflənirəm ki, bəziləri Ərməniyyə ilə Ermənistanı qarışdırır. O çağlarda Ərməniyyə olub, o da Şərqi Romaya daxil idi, onun vilayətlərindən biri olub. O, Bizansla bağlı məsələdir. Bunun erməniyə heç bir aidiyyəti yoxdur. Ərməniyyənin də əhalisi əsasən bizanslılar olub, türklər də yaşayıb burada. Ərməniyyə sözünün mənşəyi də ermənilərlə bağlı deyil".

H.Həsənov vurğuladı ki, dərslik tərtib edilərkən alimlər bu məsələyə xüsusi diqqət yetirməlidir. O qeyd etdi ki, erməni o çağlarda Qafqazda olmayıb.

Əldə etdiyimiz qeyri-rəsmi və dəqiqləşdirə bilmədiyimiz məlumata görə, "Multikulturalizmə giriş" Azərbaycan Dövlət İqtisad Universiteti tərəfindən dərslik məqsədilə hazırlanıb. Vəsait ayrı-ayrı mühazirələrdən ibarətdir. Məsələni araşdırmaq üçün İqtisad Universiteti ilə bir neçə dəfə əlaqə yaratmağa cəhd göstərdik, lakin zəngimizə cavab verən olmadı. Sözügedən universitetlə əlaqə saxlayıb mövzu ilə bağlı məsələyə aydınlıq gətirəcəyik.