May ayının 6-da Muzey Mərkəzində Mədəniyyət və Turizm Nazirliyi və Azərbaycan Aşıqlar Birliyinin birgə təşkilatçılığı ilə Azərbaycan Respublikasının sabiq Prezidenti, mərhum Heydər Əliyevin anadan olmasını 93-cü ildönümünə həsr olunmuş "Heydər Əliyev və ozan-aşıq mədəniyyəti” mövzusunda elmi-mədəni tədbir keçirildi.
Tədbiri giriş sözü ilə Mədəniyyət və Turizm naziri Əbülfəs Qarayev açdı. Nazir qeyd etdi ki, son günlər respublikamızın hər yerində Heydər Əliyevin xatirəsinə həsr olunmuş tədbirlərin keçirilir. Nazir vurğuladı ki, bütün sahələrdə olduğu kimi, Heydər Əliyev hər zaman mədəniyyətimizin inkişafına böyük diqqət yetirib:”Ulu öndər bütün sahələrə böyük diqqət yetirirdi. Ulu öndər milli-mənəvi dəyərlərimizin qorunub saxlanılmasına önəm verirdi”. Nazir dedi ki, Prezident İlham Əliyev və Heydər Əliyev Fondunun rəhbəri Mehriban Əliyeva milli mədəniyyətimizin dünyada tanıdılmasında, dəyərlərimizin müdafiəsində böyük işlər görür.
Sonra AAB-nin sədri, Əməkdar Elm xadimi, professor Məhərrəm Qasımlı "Heydər Əliyev və Azərbaycan folkloru” mövzusunda məruzə edib. Folklorumuzun milli-mənəvi varlığımızın daşınmasında bənzərsiz və təkrarsız yerini qeyd edən professor onu xalqımıza məxsus tarixi-mental keyfiyyətlərin, əxlaqi dəyərlər sisteminin ana qaynağı adlandırıb və H.Əliyevin folklorumuza qayğısından danışıb: "1969-cu ildə baş verən tarixi dəyişiklik – Heydər Əliyevin Azərbaycan Respublikasının siyasi rəhbəri vəzifəsinə gəlməsi bir çox başqa sahələrlə yanaşı, mənəvi-humanitar istiqamətin, o cümlədən də milli mədəniyyətimizlə bağlı elmi və mədəni-təşkilati fəaliyyətin canlanmasına səbəb oldu. Yüzillərin qan yaddaşını daşıyıb gətirən tarixi-mənəvi dəyərlərə, o sıradan folklor qaynaqlarına göstərilən qayğı və diqqət bütün Azərbaycan miqyasında özünü tanıma, özünüdərk və özünəqayıdış proseslərini hərəkətə gətirdi. Əvvəlki onilliklər üçün yasaq olan "Dədə Qorqud”, "Oğuz”, "Oğuz yurdu”, "Ozan”, "Türk mədəniyyəti”, "Qan yaddaşı” anlayışları respublikada yaranmış münbit zəmindən nəşət taparaq elmi toplantılarda, ədəbi-məsəni yığıncaqlarda, kitablarda, mətbuatda, radio-televizya verilişlərində boy göstərdi”.
M.Qasımlı bildirdi ki, məhz Heydər Əliyevin böyük diqqət və qayğısı sayəsində İçərişəhər, Şuşa, Ordubad və Gəncə memarlıq komplekslərinin milli qoruq elan edilməsini, ”Xalça muzeyi”nin, "İrs”, "Atəşgah”, "Gülüstan”, "Yallı”, və s. kimi məşhur xalq kollektivlərinin, "Muğam” və "Dastan” teatrlarının yardılmasını qeyd edən M.Qasımlı onu da vurğuladı ki, Azərbaycan Aşıqlar Birliyi də bu böyük şəxsiyyətin ozan-aşıq sənətinə himayəsi və diqqətinin məntiqi nəticəsi kimi yaradılıb. Hələ ötən əsrin 70-ci illərində Aşıq Ələsgərin 150 illik yublieyi Moskvada yüksək səviyyədə qeyd olunub.
M.Qasımlı Heydər Əliyevin müstəqillik illərində Azərbaycana rəhbərliyi zamanı folklorumuza, milli-mənəvi dəyərlərimizə qayğısını da yüksək qiymətləndirib: "Heydər Əliyevin ötən əsrin 70-80-ci illərində milli-mənəvi sərvətlərimizə verdiyi qiymət, göstərdiyi qayğı və diqqət onun doxsanıncı illərdəki fəaliyyətinin də ayrılmaz tərkib hissəsi kimi qalırdı. Azərbaycan Respublikasının Prezidenti seçildikdən sonra o, həyatımızın digər sahələri kimi, mənəvi-mədəni dəyərlər istiqamətini də daim diqqət mərkəzində saxlayaraq bu sahənin perspektivi üçün sistemli tədbirlər həyata keçirdi. Müdrik rəhbərin folklor və klassik ədəbi irsə xüsusi maraq göstərməsi müstəqil Azərbaycana rəhbərliyin hər məqamında qabarıq şəkildə özünü göstərdi”.
"Milli-mənəvi sərvətlərimizin bənzərsiz himayəçisi” mövzusunda məruzə edən professor Qəzənfər Paşayev də Ümummilli lider Heydər Əliyevin xalqımızın milli-mənəvi sərvətlərinin qorunmasında və beynəlxalq aləmdə təbliğ olunmasında misilsiz xidmətlərindən danışdı, məhz onun qayğı və diqqəti sayəsində milli-mənəvi sərvətlərimizin, folklorumuzun, ozan-aşıq sənətinin həm də elmi baxımdan öyrənilməsi üçün geniş imkanlar açıldığını vurğuladı.
Ustad aşıqlardan Əməkdar İncəsənət xadimi, Prezident təqaüdçüsü Ədalət Nəsibov, Əməkdar Mədəniyyət İşçisi, Prezident təqaüdçüsü İsfəndiyar Rüstəmov, Prezident təqaüdçüsü Mahmud Məmmədov, Əməkdar Mədəniyyət İşçisi, Prezident təqaüdçüsü Ulduz Quliyeva və Əməkdar mədəniyyət İşçisi Əhliman Rəhimov da öz çıxışlarında Ulu öndərin mədəniyyətimizə, xüsusilə də ozan-aşıq sənətinə və bu sənətin daşıyıcılarına qayğısından söz açdılar.
Şairə Zöhrə Xəlilinin aparıcılığı ilə keçən tədbirin bədii hissəsində çıxış edən Gədəbəy aşıqlarının, Əməkdar Mədəniyyət İşçisi Gülarə Azaflının rəhbərlik etdiyi "Çeşmə” folklor qrupunun, Əli Tapdıqoğlunun rəhbərlik etdiyi "Qobustan” qrupunun, "Misri” qrupunun, eləcə də Solmaz Kosayeva, Əməkdar Mədəniyyət İşçisi Nemət Qasımlı, Haşım Qubalı, və Gözəl Kəlbəcərlinin çıxışları tədbir iştirakçıları tərəfindən rəğbətlə qarşılandı.
Sonda M.Qasımlı tədbir iştirakçılarına minnətdarlığını bildirdi.
İradə SARIYEVA
