80-ə yaxın diplomatik nümayəndəliklərin rəhbərləri və hərbi attaşelərin cəbhə xəttinə səfərinin təşkil olunmasının məqsədi təmas xətti boyunca mövcud vəziyyət barədə diplomatların təmsil etdiyi ölkələrə məlumatları obyektiv çatdırılmasının təmin edilməsidir.
Bu barədə baki-xeber.com-a Azərbaycan XİN-dən verilən məlumatda bildirilir.
Qeyd olunur ki, 2016-cı ilin aprel ayı ərzində Ermənistan silahlı qüvvələrinin qoşunların təmas xətti boyunca iri çaplı minaatanlar, ağır artilleriya və toplardan istifadə etməklə təmas xəttinə yaxın kəndlərdə sıx şəkildə yaşayan mülki Azərbaycan əhalisi, fərdi və dövlət mülkiyyətində olan obyektlər və Azərbaycan ordusunun mövqelərini intensiv atəşə tutmasının və dəymiş ziyanın humanitar və sosial nəticələri ilə yerindəcə tanış olmaq məqsədilə Xarici İşlər Nazirliyi tərəfindən Azərbaycanda akkreditə olunan diplomatik korpusun nümayəndələrinin cəbhənin Ağdam və Tərtər istiqamətinə səfəri təşkil olunub.
Diplomatik nümayəndəliklərin rəhbərləri və hərbi attaşelərin daxil olduğu 80-ə yaxın nümayəndənin səfərinin məqsədlərindən biri də qoşunların təmas xətti boyunca mövcud vəziyyətin diplomatların təmsil etdiyi ölkələrə obyektiv çatdırılmasının təmin edilməsidir.
Tərtər rayon İcra Hakimiyyətindən Trend-ə məlumat verilib ki, cəbhə bölgəsinə səfər edən diplomatik korpusun nümayəndələri Tərtər rayonunda olublar.
Məlumatda bildirilir ki, qonaqlar rayonun icra başçısı Müstəqim Məmmədovla görüşüblər. İcra başçısı diplomatlara aprel ayı ərzində erməni silahlı birləşmələrinin Tərtər rayonunun xəmas xəttindəki yaşayış məntəqələrini ağır artilleriyalardan atəşə tutması nəticəsində kəndlərə külli miqdarda ziyan dəyməsi barədə məlumat verib.
Görüşdən sonra diplomatik korpus nümayəndələri aprel ayı ərzində ermənilərin təxribatı nəticəsində Tərtər şəhərinin mərkəzi və təmas xəttindəki kəndlərdə dağılan evlər, inzibati binalar və ziyan çəkən əkin sahələrinə baxış keçiriblər.
Diplomatik korpus nümayəndələri Ağdam rayonuna da səfər ediblər. Ağdam rayon İcra Hakimiyyətindən verilən məlumata görə, səfər çərçivəsində Ağdam rayon İcra Hakimiyyətinin başçısı Raqub Məmmədovla görüşən diplomatlar erməni təcavüzü nəticəsində Ağdama dəymiş ziyan barədə maraqlanıblar.
İcra başçısı diplomatlara cəbhə xəttində baş verən son hadisələr barədə ətraflı məlumat verib.
R.Məmmədov bildirib ki, erməni silahlı birləşmələri aprelin 27-dən 28-ə keçən gecə təmas xəttində yerləşən kəndləri ağır artilleriyalardan atəşə tutublar: "Hadisələr nəticəsində Ağdamın kəndlərində 100-dən artıq fərdi yaşayış evi və inzibati bina dağıdılıb, iki mülki şəxs həlak olub, 6 nəfər isə ağır yaralanıb".
R.Məmmədov diplomatlara ermənilərin atəşə tutduğu Sarıcalı kənd orta məktəbi barədə də məlumat verib.
Görüşdən sonra diplomatlar adıçəkilən orta məktəbdə olub, məktəbin atəşdən sonrakı vəziyyətilə tanış olublar.
XXX
"Münaqişənin sülh yolu ilə həlli üçün səylərimizi sürətləndirməliyik”
Azərbaycanda akkreditə olunmuş diplomatik korpusun nümayəndələrinin cəbhənin Ağdam və Tərtər istiqamətinə səfəri başa çatıb. APA-nın Qarabağ bürosunun verdiyi məlumata görə, səfirlər ermənilərin intensiv atəşi nəticəsində dağıdılmış fərdi və dövlət mülkiyyətində olan obyektləri görüblər.
ABŞ səfirliyinin hərbi attaşesi, polkovnik Keys N. Felter Dağlıq Qarabağ münaqişəsinin tezliklə həllinin vacibliyini vurğulayıb: "Ümid edirəm ki, hər iki tərəf münaqişənin sülh yolu ilə həlli üçün bir yol tapacaq və biz bir daha belə səhnələri görməyəcəyik. Hər iki tərəf bu münaqişədən əziyyət çəkir. Ona görə də bunun qarşısını almaq üçün münaqişə sülh yolu ilə həllini tapmalıdır".
Avropa İttifaqının nümayəndəsi Toralf Pilz isə atəş altında yaşayan dinc əhalinin ərazini tərk etməməsini təəccüblə qarşılayıb. "Neçə ildir insanlar bu ərazidə təhlükə altında yaşayır. Buradan qayıtdıqdan sonra münaqişənin sülh yolu ilə həlli üçün səylərimizi sürətləndirməliyik. Yüksək rütbəli diplomatlara bu barədə məlumat verəcəyəm”, - deyə o vurğulayıb.
Öz növbəsində Kubanın Azərbaycandakı səfiri Omar Senon Medina səfər təşəbbüsünü yüksək dəyərləndirib: "Buraları bizə göstərdiyiniz üçün minnətdaram. Çox gözəl təşəbbüs idi”.
Türkiyənin Azərbaycandakı səfiri İsmayıl Alper Coşkun isə Azərbaycan torpaqlarının işğaldan tezliklə azad edilməsinin vacibliyini vurğulayıb. "Savaşı heç kim arzulamır. İşğal altında olan torpaqlar tezliklə Azərbaycanın ərazi bütövlüyü çərçivəsində geri qaytarılmalıdır. Azərbaycanlı qardaşlarımızla birliyimizi bu cür ifadə edirəm. Şəhidlərimizə Allahdan rəhmət diləyirəm".
Fransanın Azərbaycandakı səfirinin müavini Fabyen Drout-Lozinski isə açıqlama vermək istəməyib.
