Türkiyə Baş naziri Əhməd Davudoğlunun istefası Avropa İttiaqında narahatlıqla qarşılanıb. Qərb mətbuatında yer alan analitik yazılarda Avroittifaqın Ankarada yaşanan prosesləri təşvişlə izlədiyi və baş verənlərdən ciddi narahat olduğu bildirilir.
"Financial Times” özünün dünənki sayında yazır ki, Türkiyə Baş nazirinin istefası Avropa İttifaqı ilə Ankara arasında miqrasiya böhranı ilə bağlı əldə olunmuş razılaşmanı təhlükə altında qoyur. Nəşr xatırladır ki, razılaşmanın şərtlərinə görə, Yunanıstan adalarına kimi gəlmiş qeyri-leqal miqrantlar Türkiyəyə qaytarılacaq, əvəzində Aİ Türkiyə vətəndaşları üçün vizasız rejim tətbiq edəcəkdi. Hazırda isə Avroittifaq Əhməd Davudoğlunun gedişilə Ankaranın həmin razılaşmaya əməl etməyəcəyindən, yaxud şərtlərə yenidən baxacağından narahatdır.
Qəzetin yazdığına görə, elə Almaniya kansleri Angela Merkel də Davudoğlunun rəhbərlik etdiyi partiyanın Qərbyönümlü mövqelərinin möhkəmlənəcəyini düşünürdü, lakin son hadisələr proseslərin gözlənilən axarda gedəcəyinə şübhələr yaradıb.
Maraqlıdır ki, Türkiyənin özündə də Davudoğlunun özünün miqrant siyasətinin güdazına getdiyini düşünənlər çoxluq təşkil edir. Elə sözügedən qəzet də diqqəti məsələnin bu aspektinə çəkərək yazır ki, prezidenr Ərdoğan Davudoğlunun miqrant siyasətinə sıcaq baxmırdı. Hətta iki həftə öncə artıq sabiq Baş nazirin Angela Merkelə və digər rəsmi şəxslərə qaçqın düşərgələrini nümayiş etdirməsinin Ərdoğanın qəzəbinə səbəb olduğu və bu gün baş verənlərin ana xəttini məhz bu məsələnin təşkil etdiyi də səslənən versiyalar sırasındadır.
Bütün bunlardan sonra Rəcəb Tayyib Ərdoğanın Davudoğlunun beynəlxalq aləmdə nüfuzunun artmasını öz postuna ən böyük təhlükə kimi gördüyü, o üzdən də iki siyasətçi arasındakı münasibətlərə çat düşdüyü, bütün bunların isə bugünkü hadisələrin yaşanmasına gətirdiyi bildirilir.
Əhməd Davudoğlu isə, istefa sonrası verdiyi açıqlamada Cumhurbaşkanı ilə münasibətlərinin son yaşananlardan heç bir zərər görməyəcəyini bildirib. "Cumhurbaşkanı ilə şəxsi qardaşlıq hüququmuz var. Bu dostluğu hər şeydən önə aldım. Son nəfəsimə qədər onunla vəfa ilişkimi sürdürəcəyəm. Heç bir kimsə mənim ağzımdan Cumhurbaşkanı haqqında pis söz eşitməyəcək. Onun qüruru mənim qürurumdur. Onun ailəsi məni ailəmdir”- deyən eks baş nazir bununla da son iki gündə düşüncələrdə hakim olan "Ərdoğanla Davudoğlu arasında qırğınlıq varmı”sualını, qismən də olsa, ortadan qaldırıb.
Lakin hər nə qədər "vəfa borcu”, "qardaşlıq” kimi gəlişi gözəl sözlər dövriyyəyə buraxılsa da, bu istefanın arxasında çox ciddi səbəbin olduğu şübhəsizdir və zamanla onun üzə çıxmayacağına heç bir təminat yoxdur.
Samirə SƏFƏROVA
