Aprelin ilk günlərində yaşanan hərbi qarşıdurma çox maraqlı vəziyyəti ortaya çıxardı. Vaxtilə "arxalı köpək qurd basar” misalı himayədarı Rusiyanın əlilə torpaqlarımızı işğal edən Ermənistanda özünün məğlubedilməzliyilə bağlı yaranan mif cəmi bir neçə günün içində darmadağın oldu.
Maraqlıdır ki, torpaqlarımızı işğal edəndə özünün qalib ordusunu öyən Ermənistan son məğlubiyyətində Rusiyanı suçlamağa başlayıb. İstər bu ölkənin rəsmiləri, istər politoloqları, istərsə də hərbçiləri birmənalı şəkildə Rusiyanı ona dəstək verməməkdə, hətta Azərbaycana raket satıb, Ermənistana raketdən müdafiə sistemləri verməməkdə qınayır. Bu barədə Ermənistanın Qarabağ müharibəsi veteranı, kommandos adlandırdıqları Arkadi Ter-Tadevosyan dünən mətbuat konfransında etdiyi çıxışında bildirib. O deyib ki, Qarabağ ətrafında əsl səbəbi qaranlıq olan "çoxtərəfli böyük oyun” gedir. Ermənilərin bu gün üçün ən yaralı yeri olan Rusiyanın Azərbaycana silah satmasına toxunan erməni hərbçi Lavrovun Bakıda Ermənistanın işğal etdiyi ərazilərdən çəkilməli olduğu barədə fikirlərinə isə qıcıqla cavab verib:”Gəl indi anla ki, Rusiya kimin tərəfindədir. Biz hansısa əraziləri qaytarsaq, rəqiblərimizin bizə yaxınlaşmasına, beləliklə də gəlib bizim nəfəsimizi kəsməsinə yardımçı olarıq. Rusiya bunu çox yaxşı başa düşür, lakin bu ölkə (Azərbaycan) ilə iqtisadi maraqları olduğundan, öz maraqlarına üstünlük verir.”
Ermənistanın Lragir.am saytının siyası şərhçisi Naira Ayrumyan isə hesab edir ki, Azərbaycan Rusiyadan aldığı silahlarla təkcə erməni əsgərlərinə deyil, eyni zamanda "erməni-rus dostluğuna” atəş açıb. Özünün "Erməni-rus ittifaqının sonu” adlı məqaləsində erməni yazar diqqətə çatdırır ki, Rusiya Baş naziri Dmitri Medvedyevin İrəvana dünənki səfərində Sarkisyan ona iki məsələdə narazılıq bildirib: Rusiyanın Azərbaycana silah satması və KTMT-nin Baş nazirlərin i clasını İrəvanda keçirməsindən imtina etməsi. Maraqlıdır ki, o, Medvedyevin bu iradları sükutla qarşıladığını da bildirir. Yazarın bildirdiyinə görə, Rusiya Baş naziri yalnız ənənəvi dostluq barədə ümumi sözlər işlədib ki, hazırkı situasiyada bu deyilənlərin "çox axmaq” səsləndiyi onun özünə də aydın olub. Üstəlik, onun bildirdiyinə görə, Medvedyev təklif edib ki, "Rusiya ilə Ermənistan arasında sərhədlər qaldırılsın”, yəni Ermənistan Rusiya vətəndaşlarına bu ölkəyə daxili pasportla gəlmək imkanı yaratsın.
Erməni tərəfini qıcıqlandıran daha bir məsələ isə Rusiya Baş nazirinin hərbi-sənaye kompleksi üzrə müavini Roqozinin özünün Tvitter səhifəsində Medvedyevin başçılığı ilə nümayəndə heyətinin tərkibində Bakıya səfər edəcəyini yazması olub. Ermənistanın Poqozinin maraq dairəsində olmadığından İrəvanın adını çəkməməsinə diqqət çəkən yazar sarkazmla bildirir ki, bu təbiidir, çünki onun Bakıda " daha vacib işləri var”.
Sonda Azərbaycanın Rusiya silahları ilə təkcə erməni əsgərinə deyil, eyni zamanda erməni-rus münasibətlərinə atəş açdığını deyən yazar ölkəsinin Avrasiya İttifaqı və KTMT kimi təşkilatların tərkibində qalmasını da sual altına alır.
Bütün bunlar isə baş verənlərin Ermənistanda ruh düşkünlüyü yaratdığı barədə deyilənləri də təsdiqləyir. Təsadüfi deyil ki, hazırda sosial şəbəkələrdə istər Ermənistanda, istərsə də dünyanın müxtəlif ölkələrində yaşayan erməni gənclərin Qarabağın Azərbaycana aid olmasına dair etiraflarına və işğala son qoyulmasına dair çağırışlara getdikcə daha çox rast gəlinir.
Onlardan birini oxucularımıza təqdim edirik:
