“Nikol Paşinyan artıq seçkiqabağı kampaniya aparır. Bu aydındır. Lakin bu, mütləq növbədənkənar seçkilərin tezliklə keçiriləcəyi anlamına gəlmir. O, sadəcə olaraq kampaniya ilə məşğuldur”. Belə bir açıqlama ilə erməni politoloq Hakob Badalyan çıxış edib. onun sözlərinə görə, əslində, Paşinyan özü də seçkilərin zəruri olub-olmayacağını bilmir: "Bu, həm geosiyasi, həm də geoiqtisadi bir sıra xarici amillərdən asılıdır. Bu yaxınlarda Paşinyan həm hökuməti, həm hökumətyönlü dairələri, həm də Avroatlantik qüvvələri təcili seçkilərin ehtimalının az olduğunu bəyan etməklə sakitləşdirməyə tələsdi. Lakin cin artıq şüşədən çıxıb və Paşinyan özü bunu qəsdən edib”.
Ekspert qeyd edir ki, Nikol Paşinyanın mümkün növbədənkənar parlament seçkiləri barədə açıqlamasından sonra müxalifət daxilində "əsl" və ya yeni "aparıcı" müxalifətin mövqeyi uğrunda mübarizə dalğası başlayıb. Badalyanın sözlərinə görə, bu, təbii olaraq mövcud müxalifətə və onun liderlərinə qarşı şiddətli tənqidlərə gətirib çıxarır: "Təəssüf ki, Ermənistan artıq oxşar mərhələlərdən keçib və bütün əvvəlki presedentlər göstərir ki, bu cür yanaşmalar və proseslər, iştirakçılarının bunu istəməsindən asılı olmayaraq, sonda yalnız hakimiyyətin əlinə işləyir. "Təkrar edirəm: bunu praktiki presedentlər sübut edir. 2026-cı il seçki prosesindən əvvəl müxalifət daxilində güc balansı, metodologiya və fəaliyyət modelinin özü bir qədər dəyişib. Və bu, minimal olsa da, dərhal nəticə verdi: hakimiyyət konstitusiya çoxluğu yarada bilmədi. Bu minimal nəticədən yararlanmaq və əldə edilən uğura əsaslanmaq əvəzinə, biz "sıfırdan" başlamaq zərurəti barədə danışmağa başlayırıq. Mən bu yanaşmanı səmərəsiz hesab edirəm". O, istənilən siyasi prosesin faktiki güc balansına əsaslandığını vurğulayıb: “Əgər müzakirələr bu balansın rasional qiymətləndirilməsindən kənara çıxarsa, onlar müxalifət üçün heç bir faydası olmayan mücərrəd və süni söhbətlərə çevrilir”.
Tahir TAĞIYEV
