Rəsul Cahangirli: “Rusiyadan sonra Belarusun bu addımı atması Ermənistana növbəti iqtisadi təzyiqdir”
Daha bir Avrasiya İqtisadi İttifaqının üzvü Ermənistan istehsalı məhsula qadağa qoyub. Belarus Ermənistan istehsal olunan konyakın ölkədə satışına qadağa qoyub. Bu barədə Belarusun Dövlət Standartlaşdırma Komitəsi məlumat yayıb.
Qadağa Ermənistan istehsalı olan 7 illik “Arame” konyaklarına şamil edilib. Komitənin açıqlamasına görə, yoxlamalar zamanı məhsulda aşılayıcı maddələrin kütləvi konsentrasiyasının normadan aşağı olduğu müəyyən edilib. Bildirilib ki, bu göstərici məhsullara konyaka xas xarici görünüş və bəzi xüsusiyyətlər verildiyini, lakin onların keyfiyyət tələblərinə cavab vermədiyini göstərir. Həmin konyakların Belarus ərazisinə idxalı və satışı 2026-cı il oktyabrın 31-dən qadağan olunub.
Qeyd edək ki, bundan əvvəl Rusiya Ermənistan istehsalı olan bir sıra kənd təsərrüfatı məhsullarının ölkədə satışına qadağa qoyub. İndidə Belarus buna başlayır.
Sözügedən məsələni baki-xeber.com-a şərh edən ekspert Rəsul Cahangirlinin fikrincə, Belarusun qərarının arxasında hansısa sanitar qaydaların pozulması yox, siyasi motivlər dayanır: “Məlum olduğu kimi, Belarus daha çox Rusiyaya bağlı dövlətdir. Rusiya Ermənistanla bağlı hansı siyasət yeridirsə, Belarus da ona uyğun siyasətini qurur. Təsadüfü deyil ki, Ermənistanın Avropa İttifaqı ilə yaxınlaşmasını ən çox tənqid edən, buna öz etirazını bildirən Belarus prezidenti Aleksandır Lukaşenkodur. İstisna etmirəm ki, Kremldən gələn təlimatların bunda rolu olub. Aİİ Ermənistan kənd təsərrüfatı məhsullarının satışı üçün ən uyğun bazardır. Rusiyadan sonra Belarusun bu addımı atması Ermənistana növbəti iqtisadi təzyiqdir. Fikrimcə, bununla Belarus kifayətlənməyəcək. Növbəti mərhələdə Ermənistan istehsalı olan digər məhsullara oxşar məhdudiyyələr tətbiq edilə bilər. Ancaq düşünmürəm ki, mövcud Paşinyan iqtidarı bu təzyiqlər qarşısında geri çəkilsin. Tam əksinə, Avropa İttifaqı ilə əlaqələrini daha da gücləndirəcək. Nəzərə almaq lazımdır ki, Aİ Ermənistan məsullarının satışına razılıq verib”.
Vidadi ORDAHALLI
