İlham Əliyevlə Medvedyevin çox məzmunlu, ancaq hələlik "səssiz Qarabağ müzakirəsi"...

Tarix: 09.04.2016 / 01:12
Bölmə: Gündəm

İlham Əliyev: "Azərbaycan və Rusiya arasında enerji və nəqliyyat sahələrində əməkdaşlıq üçün böyük potensial var"

Baş nazir: "Rusiya Dağlıq Qarabağ münaqişəsinin həllində mühüm rol oynayır"

Aprelin 8-də Azərbaycan Respublikasının Prezidenti İlham Əliyevin ölkəmizdə rəsmi səfərdə olan Rusiya Federasiyası Hökumətinin sədri Dmitri Medvedyevlə məhdud tərkibdə görüşü olub (Trend). Azərbaycan Prezidenti İlham Əliyev Rusiya Hökumətinin sədri Dmitri Medvedyevi qarşılayıb və birgə foto çəkdiriblər. Daha sonra Prezident İlham Əliyevin və Dmitri Medvedyevin nümayəndə heyətlərinin iştirakı ilə geniş tərkibdə görüşü olub.

İlham Əliyev Dmitri Medvedyevi salamlayıb və qeyd edib ki, Azərbaycan və Rusiya arasında gündəlikdə geniş məsələlər var. Dövlət başçısı bildirib: "Səfəriniz Rusiya və Azərbaycan arasında dost, mehriban qonşuluq münasibətlərinin möhkəmlənməsinə xidmət edəcək. Çox dinamik inkişaf edən və strateji tərəfdaşlıq səviyyəsinə çıxan münasibətlərimizin müzakirəsi üçün olduqca geniş gündəlik mövcuddur".

İlham Əliyev deyib ki, D.Medvedyevin səfəri Ermənistan-Azərbaycan, Dağlıq Qarabağ münaqişəsi ətrafında vəziyyətin gərginləşdiyi bir vaxta təsadüf edir: "Təəssüf ki, uzun illər ərzində münaqişə öz həllini tapmadı. Vaxtaşırı olaraq Ermənistan tərəfindən silahlı təxribatlarla üzləşirik. Aprelin əvvəlində Ermənistan tərəfindən növbəti təxribat oldu. Azərbaycanın yaşayış məntəqələri atəşə tutuldu. 400-dən artıq ev zərər gördü, dinc sakinlər arasında da həlak olanlar var".

Dövlət başçısı qeyd edib ki, Azərbaycan tərəfi hərbi təxribatın qarşısını almaq və atəşkəs rejimini bərpa etmək üçün cavab tədbirləri görmək məcburiyyətində idi: "Vəziyyətin deeskalasiyası prosesi üzrə vaxtında göstərdiyi səylərə və fəaliyyətə görə Rusiya rəhbərliyinə minnətdarlığımı bildirmək istərdim. Rusiya Prezidenti Vladimir Putin mənə və Ermənistan prezidentinə zəng etdi. Həmçinin Rusiya Federasiyası Baş Qərargah rəisi iki ölkənin Baş Qərargah rəisləri ilə təmasda idi. Vasitəçilik səyləri nəticəsində sülh bərpa edildi, hərçənd, qarşı tərəf buna heç də həmişə riayət etmir".

İlham Əliyev əlavə edib: "Qeyd etmək istəyirəm ki, Azərbaycan Ermənistan-Azərbaycan, Dağlıq Qarabağ münaqişəsinin beynəlxalq hüququn norma və prinsipləri, BMT Təhlükəsizlik Şurasının və digər beynəlxalq təşkilatların müvafiq qərarları əsasında sülh və siyasi yolla nizamlanmasına sadiqdir".

Dövlət başçısı diqqətə çatdırıb ki, D.Medvedyevin səfəri, həmçinin, münasibətlərimizin gündəliyindəki digər məsələləri - ticarət-iqtisadi əlaqələri, enerji, nəqliyyat, humanitar sahələri - müzakirə etmək üçün yaxşı imkandır: "Bir daha demək istəyirəm ki, ölkələrimiz arasında münasibətlər çox yaxşı dinamika nümayiş etdirir və dostluğu, səmimiliyi ilə fərqlənir".

Prezident bildirib ki, Azərbaycan Rusiya Baş naziri Dmitri Medvedyevin səfərinə böyük önəm verir: "Əminəm ki, bu, Rusiya və Azərbaycan arasında strateji tərəfdaşlığın möhkəmlənməsi işinə xidmət edəcək. Biz sizinlə ayrıca söhbətdə əsasən Ermənistan-Azərbaycan, Dağlıq Qarabağ münaqişəsinin nizamlanması problemini müzakirə etdik. Vəziyyətin deeskalasiyası işində aktiv vasitəçiliyinə görə Rusiya Federasiyasına bir daha təşəkkür etmək istəyirəm" deyən Dövlət başçısının sözlərinə görə, Azərbaycan üçün Rusiya ilə münasibətlər böyük önəm kəsb edir: "Biz bu münasibətlərə dəyər veririk, onları qiymətləndiririk və genişləndirməyə, möhkəmləndirməyə çalışırıq. Ermənistan və Azərbaycan arasında münaqişənin nizamlanmasına gəlincə, təəssüf ki, münaqişə uzun illərdir öz həllini tapmır, uzun illərdir Azərbaycan torpaqları işğal altındadır, təkcə Dağlıq Qarabağ deyil, həm də Azərbaycanın ona bitişik yeddi rayonu 20 ildən artıqdır işğal altındadır. Oradan bütün Azərbaycan əhalisi çıxarılıb, bütün evlər, tarixi abidələr dağıdılıb. Təkcə münaqişə zonasından 700 mindən çox məcbur köçkünümüz var. Buna Ermənistandan 250 mindən çox qaçqını əlavə etsək, 1994-cü ildə barışığa nail olunanda adambaşına düşən qaçqın və məcburi köçkün sayına görə ən yüksək faiz göstəricilərindən birinə malik idik".

Dövlət başçısı qeyd edib ki, münaqişənin nizamlanması üçün mexanizmlər, BMT-nin Ermənistan Silahlı Qüvvələrinin Azərbaycan ərazisindən çıxarılmasını tələb edən 4 qətnaməsi mövcuddur, lakin təəssüf ki, onlar həyata keçirilmir.

Prezidentin sözlərinə görə, Rusiya ATƏT-in Minsk qrupunun həmsədri kimi münaqişənin nizamlanması işində vacib rol oynayır: "Bu rolu yüksək qiymətləndiririk. Ermənistan tərəfindən növbəti silahlı təxribat fonunda mövqelərimiz atəşə məruz qalanda, o cümlədən yaşayış məntəqələrinə zərər vurulanda bu rol özünü xüsusilə göstərdi. Qoşunların təmas xəttinə yaxın ərazilərdə 400-dən artıq ev zərər gördü, onlardan onlarla ev tamamilə dağıdıldı, qurbanlarımız var, o cümlədən də dinc əhali arasında".

Dövlət başçısı vurğulayıb ki, bu şəraitdə Rusiya tərəfi münaqişənin deeskalasiyası üçün təşəbbüs göstərdi: "Rusiya Prezidenti Vladimir Vladimiroviç Putin mənə və Ermənistan Prezidentinə zəng edərək narahatlığını, eləcə də vəziyyətin deeskalasiyası üzrə tərəflərə kömək etmək səyini bildirdi. Bütün bunları müsbət qəbul etdik. Moskvada Rusiya Federasiyası Baş Qərargah rəhbərinin iştirakı ilə üç ölkənin Baş Qərargah rəhbərləri arasında görüş keçirildi. Görüşdə hərbi fəaliyyətin dayandırılması barədə qərar qəbul olundu. Sözsüz ki, bu qərara əməl edirik və ümid edirik ki, erməni tərəfi də buna sadiq qalacaq".

Prezident bir daha vurğulayıb ki, Azərbaycan danışıqlar prosesinə sadiqdir: "20 il ərzində danışıqlar aparılır və Ermənistan tərəfdən Azərbaycanın eskalasiyanın təşəbbüskarı olması ilə bağlı bütün ittihamlar tamamilə əsassızdır. Çünki aprelin əvvəlində baş verən hərbi toqquşmaların xarakteri ondan xəbər verir ki, bizim irimiqyaslı hərbi əməliyyatlara başlamaqla bağlı heç bir niyyətimiz olmayıb və yoxdur. Biz sadəcə mövqelərimizi, vətəndaşlarımızın dinc həyatını qoruyurduq".

İlham Əliyev bildirib: "Buna görə də münaqişənin nizamlanması Azərbaycanın marağındadır və əminəm ki, Ermənistanın da marağındadır, eləcə də Rusiya münaqişənin tezliklə nizamlanmasında maraqlıdır. Danışıqlar prosesini davam etdirəcəyik. Bu yaxınlarda regiona səfər edən ATƏT-in Minsk Qrupunun həmsədlərinin təşəbbüsünü alqışlayırıq və ümid edirik ki, Minsk Qrupunun status-kvonun dəyişdirilməli olduğuna dair çağırışları Ermənistanda da eşidiləcək. Status-kvonun dəyişməsi, Azərbaycan torpaqlarının işğalından imtina etmək münaqişənin irimiqyaslı nizamlanması üçün əsas şərtdir. Bu baş verən kimi regionda sülh, əminamanlıq, əməkdaşlıq bərpa olacaq və bundan regionun bütün ölkələri qazanacaq".

Gündəliyin digər məsələsinə toxunan İlham Əliyev diqqətə çatdırıb: "İqtisadi problemləri, ticarət-iqtisadi münasibətləri, enerji, nəqliyyat və humanitar əməkdaşlıq sahəsində münasibətləri ətraflı müzakirə etdik. Bütün istiqamətlər üzrə yaxşı dinamika var. İstiqamətlər üzrə böyük səmərəliliklə konkret işləyən hökumətlərarası komissiya aktiv çalışır. Rusiya ilə münasibətlərə strateji xarakterli münasibətlər kimi baxırıq və eyni münasibəti Rusiya rəhbərliyindən, Rusiya tərəfdən görürük. Dmitri Anatolyeviçin səfəri bu münasibətlərin xarakterini bir daha təsdiq edir və əməkdaşlığımızn möhkəmləndirilməsinə böyük töhfə verir. Sizə ən xoş arzularımı bildirirəm. Rusiya xalqına dərin hörmətimi ifadə etmək istəyirəm, Rusiya dövlətinə uğurlar və çiçəklənmə arzulayıram".

Dövlət başçısı qeyd edib: "Bizim bir çox istiqamətlər üzrə çox yaxşı dinamikamız mövcuddur. Obyektiv səbəblərə görə əmtəə dövriyyəsinin bir az azalmasına baxmayaraq, ticari-iqtisadi sahədə əməkdaşlığın genişləndirilməsi üçün potensial var, enerji, nəqliyyat sahələrində böyük potensial mövcuddur".

Azərbaycan Prezidentinin sözlərinə görə, şübhəsiz ki, humanitar sahədə də ənənəvi əməkdaşlıq mövcuddur, bu sahədə çox yaxşı perspektivlər və yaxşı nəticələr var: "Bu, ümumiyyətlə münasibətlərimizin əsasıdır. Buna görə də ümid edirəm ki, həmkarlarımızla ticari-iqtisadi və siyasi əlaqələrimizin konkret məsələlərini ətraflı müzakirə edəcəyik. Bir daha xoş gəlmisiniz".

Medvedyev isə qeyd edib ki, Azərbaycan və Rusiya bir sıra istiqamətlər üzrə strateji tərəfdaşdır. Baş nazir bildirib: "Allaha şükür, münasibətlərimizin palitrası, əlaqələrimiz yalnız problemlərdən keçmir, münasibətlərimizin böyük təbəqəsi var və burada bizim çox irəli getmiş əməkdaşlığımız, strateji təərfdaşlığımız var, eləcə də iki ölkə iqtisadiyyatının daha sinxron işləyərək yaxşı effektə çatması üçün əlavə səylər göstərmək imkanı mövcuddur".

Rusiyalı Baş nazir qeyd edib ki, ötən il iki ölkə arasında mal dövriyyəsinin həcmi azalıb. Lakin onun sözlərinə görə, bu, ölkələrin bir-birinə tədarük etdiyi malların qiymətlərindəki dəyişikliklə bağlı olub: "Bununla belə, bir sıra layihələri canlandırmaq mümkündür".

D.Medvedyev Azərbaycan Prezidenti İlham Əliyevə bu məsələni, eləcə də humanitar məsələləri müzakirə etməyi təklif edib.

Baş nazir bildirib ki, Rusiya ATƏT-in Minsk Qrupunun həmsədr ölkəsi kimi Dağlıq Qarabağ münaqişəsinin həllində mühüm rol oynayır. Rusiyalı Baş nazir Dağlıq Qarabağ münaqişəsinin nizamlanması prosesində iştirak etdiyini vurğulayıb.

D.Medvedyev bildirib: "Mən özüm də vaxtilə buna xeyli səy göstərdim və qeyd etmək istərdim ki, bütün bunlar boşuna getmədi, itmədi. Hər halda, şübhə etməyə bilərsiniz ki, Rusiya Federasiyası bunun üçün bizdən asılı olan hər şeyi edəcək".

Baş nazir əlavə edib ki, səfər zamanı, həmçinin, Azərbaycan və Rusiya arasında müzakirə ediləcək bir çox müxtəlif birgə layihələr var.

Rusiya Baş naziri Dmitri Medvedyevin Bakıda Azərbaycan Prezidenti İlham Əliyevlə görüşünün yekunu üzrə mətbuat üçün bəyanatında isə qeyd edilir ki, Rusiya Azərbaycanla qarşılıqlı münasibətlərinin səviyyəsini yüksək qiymətləndirir.

Dmitri Medvedyev bildirib: "Biz Azərbaycanla qarşılıqlı münasibətlərin belə səviyyəsini, dostluq ənənələrini, qarşılıqlı anlayışı yüksək qiymətləndiririk. Bunlar əsrlər ərzində formalaşıb və hazırda öz yaxşı bəhrələrini verir".

Baş nazirin sözlərinə görə, görüşdə tərəflər gündəliyin bütün məsələləri üzrə müzakirə aparıb.

Xəbər xidməti

DİGƏR XƏBƏRLƏR

Tarix: 30.10.2026 / 06:41

Yəhudilər erməni monastırına tüpürdülər

Tarix: 29.10.2026 / 17:00

Bir Millət, İki Dövlət, Bir Ürək: Türkiyə Cümhuriyyətinin 103-cü ildönümü münasibətilə İctimai Nəzarət Təşkilatının Təbrik Bəyannaməsi

Tarix: 28.10.2026 / 12:51

ROZA TÖREKULOVNA AYTMATOVANIN ƏZİZ XATİRƏSİNƏ

Tarix: 28.10.2026 / 08:35

Türkiyədəki “sərmayə olayı” Pasifik Holding-i də vurdu - aktivləri donduruldu

Tarix: 28.10.2026 / 06:26

Türkiyədə səs-küylü “Starlink əməliyyatı” - 85 nəfər saxlandı

Tarix: 27.10.2026 / 13:54

"Bakı bu cür beynəlxalq forumlar vasitəsilə mədəniyyətlərarası dialoqa mühüm töhfə verə bilər" - Ozodbek Nazarbekov

Tarix: 27.10.2026 / 13:30

Penitensiar Xidmətə yeni rəis təyin edildi

Tarix: 27.10.2026 / 10:28

Dubay məhkəməsi Rusiya neftinin satışından 700 milyon dollardan çox vəsaiti dondurub - işin içində azərbaycanlılar da var…

Tarix: 26.10.2026 / 06:58

Vuçiç seçkidə məğlubiyyətini rəsmən bəyan etdi

Tarix: 24.10.2026 / 08:38

Serbiyada etirazlar pik həddə - gənclər Vuçiçi devirməyə qərarlıdır

Tarix: 22.10.2026 / 15:01

44 günün fövqündə: milli iradənin və tarixi yaddaşın təntənəsi

Tarix: 20.10.2026 / 22:19

İran XİN sözçüsü Azərbaycana tövsiyə verməyə qalxdı - həm də insan haqları mövzusunda…

VİDEO

Tarix: 17.10.2026 / 17:10

Aydın Quliyev Mətbuat Şurasında seçkilərə qatılmamasının səbəblərini qurultayda açdı... - VİDEO

Tarix: 27.11.2025 / 11:10

Biri ermənini öpür, biri sovet bayrağı qaldırır... Günümüzə baxın! - VİDEO

Tarix: 12.11.2025 / 11:05

Lavrov işdən kənarlaşdırılır, yoxsa oyun qurulur? - VİDEO

Tarix: 02.11.2026 / 23:02

Bunu səfir Birol Akgünə açıq məktubum kimi də oxuya bilərsiniz - Aydın QULİYEV yazır...

Tarix: 29.10.2026 / 17:35

Məhkəmə hakimlərinin yeni "Etik Qaydaları"nda bir vacib məqam unuduldu...

Tarix: 29.10.2026 / 17:05

Ramiz Mehdiyevin təltiflərdən məhrum edilməsinin hüquqi mexanizmləri var...

Turizm regionlarımızın inkişaf mənbələrindən birinə çevrilir...