Aprelin 2-dən 5-dək erməni hərbi birləşmələrinin cəbhə xəttində törətdiyi təxribat zamanı Tərtər rayonunda 3 mülki şəxs həlak olub. Bu barədə Trend-ə Tərtər rayon İcra Hakimiyyətinin başçısı Müstəqim Məmmədov məlumat verib.
İcra başçısı bildirib ki, bu şəxslər ermənilərin kəndləri ağır artilleriya atəşinə tutması nəticəsində həlak olan dinc sakinlərdir: "Həlak olanlardan 2 nəfəri Tərtər, 1 nəfəri isə Gəncə şəhər sakinidir. Hadisə nəticəsində 6 nəfər Tərtər sakini isə müxtəlif dərəcəli xəsarətlər alaraq xəstəxanaya yerləşdirilib. Yaralılardan biri uşaq, ikisi isə qadındır".
Ağdam rayon İcra Hakimiyyətinin başçısı Raqub Məmmədov məlumat verib ki, aprelin 2-dən 5-dək cəbhə xəttində erməni hərbi birləşmələrinin törətdiyi təxribat nəticəsində 1 nəfər mülki şəxs həlak olub.
İcra başçısının sözlərinə görə, həmin şəxs ermənilərin atdığı mərminin məscidə düşməsi nəticəsində həlak olub: "Mərmi rayonun Əhmədağalılar kəndindəki məscidə düşüb və orada olan kənd sakini, 1954-cü il təvəllüdlü Dadaşov Qaraş Şahlar oğlu aldığı xəsarətdən hadisə yerində dünyasını dəyişib. Erməni təxribatı nəticəsində Ağdam rayonundan 7 mülki şəxs isə müxtəlif bədən xəsarətləri ilə xəstəxanalara yerləşdirilib".
Icra başçısı erməni silahlı birləşmələrinin cəbhə xəttində törətdiyi təxribat nəticəsində Ağdam rayonuna dəymiş ziyanın müəyyənləşdirildiyini deyib. İcra başçısı deyib ki, dünən Azərbaycan və Ermənistan arasında hərbi əməliyyatların dayandırılması ilə bağlı razılıq əldə ediləndən sonra rayona dəymiz ziyanın müəyyənləşdirilməsinə başlanıb: "Hazırda komissiya ərazidədir və əhaliyə, evlərə dəymiş ziyanın məbləği müəyyənləşdirilir. Komissiya ziyanı müəyyənləşdirəndən sonra nəticələr aidiyyəti qurumlara göndəriləcək".
İcra başçısı qeyd edib ki, erməni silahlı birləşmələrinin təxribatı zamanı Ağdam rayonu ərazisində 8 ev təmamilə dağılıb: "Bu hadisələrdə ziyan çəkən evlərin sayı daha çoxdur və hazırda həmin evlərin siyahısı və vəziyyəti ilə bağlı məlumatlar hazırlanır. Bütün ziyan çəkən evlərin foto və video çəkilişləri aparılır. Materiallar toplanandan sonra akt tərtib ediləcək və müvafiq qurumlara müraciət olunacaq".
R.Məmmədov deyib ki, erməni təxribatları nəticəsində kəndlərin sıradan çıxan elektrik enerjisi və qaz xətləri isə tam bərpa olunub, bütün kəndlər fasiləsiz elektrik enerjisi və qazla təmin edilib.
Artıq Ağdam və Tərtər rayonlarının orta məktəblərində tədris prosesi də bərpa olunub. Ağdam rayon İcra Hakimiyyətinin başçısı Raqub Məmmədov bildirib ki, artıq bu gündən etibarən rayonun bütün kəndlərində orta məktəblərdə dərslərə başlanılıb: "Təmas xəttindəki kəndlərdə qadın və azyaşlı uşaqlar öz evlərinə qaytarılıb, şagirdlər normal qaydada dərslərinə davam edirlər".
Tərtər rayon İcra Hakimiyyətinin başçısı Müstəqim Məmmədov isə Trend-ə deyib ki, cəbhə xəttindəki vəziyyətlə bağlı təmas xəttində yerləşən cəmi 3 kənddə orta məktəblər fəaliyyətini dayandırmışdı: "Aprelin 6-dan etibarən həmin məktəblərdə də tədris bərpa edilib".
