Erməni hərbi birləşmələri Tərtər rayonunda cəbhəyanı kəndləri ağır artilleriya atəşinə tutmaqda davam edir. Ermənilərin yaşayış məntəqələrini artilleriya zərbələri ilə atəşə tutması nəticəsində 16 yaşlı qız həlak olub. Bu barədə Trend-ə Tərtər rayon İcra Hakimiyyətinin başçısı Müstəqim Məmmədov məlumat verib.
İcra başçısı bildirib ki, hadisə bu gün səhər saatlarında Tərtər rayonunun Həsənqaya kəndində baş verib. Ermənilərin ağır artilleriyadan atəşi nəticəsində kənddə eüvlərdən birinə mərmi düşüb. Hadisə nəticəsində evdə olan Kəlbəcər rayonundan olan məcburi köçkün , 2000-ci təvəllüdlü Həsənova Turanə Kamandar qızı həlak olub.
Kəlbəcər rayonundan məcburi köçkün olan Həsənovlar ailəsi Həsənqaya kəndində məskunlaşıb.
İcra başçısı bildirib ki, ermənilərin təxribatı nəticəsində aprelin 2-dən bu günə qədər 160 evə ziyan dəyib: "Hazırda təmas xəttində yerləşən kəndlərimiz atəşə tutulub. Bu günə qədər 160 evə ciddi ziyan dəyib. Həmin evlərdən 7-si tamam dağılıb, qalanları isə qismən dağılıb".
M.Məmmədov deyib ki, ermənilərin təxribatına baxmayaraq, əhali normal yaşayış və iş şəraitində həyat tərzini davam etdirir.
11 kəndi işıqsız qoydular
Ermənilərin ağır artilleriyadan açdığı atəş nəticəsində Ağdam rayonunun 11 kəndini elektrik enerjisi ilə təmin edən elektrik yarımstansiyasının bir hissəsi sıradan çıxıb. Bu barədə Trend-ə Ağdam rayon İcra Hakimiyyətinin başçısı Raqub Məmmədov məlumat verib.
İcra başçısı bildirib ki, dünən axşam saatlarında baş verən hadisə nəticəsində bir neçə kəndə elektrik enerjisinin verilişində fasilə yaranıb: "Gecə saatlarında rəhbərliyimlə əraziyə baxış keçirildi, dəymiş ziyan müəyyənləşdirildi və hazırda bərpa işləri gedir. Yaxın saatlarda yarımstansiyanın digər hissəsindən kəndlərin elektrik enerjisi ilə təminatı bərpa ediləcək".
R.Məmmədov bildirib ki, Ağdam sakinləri hazırda mənzillərində yaşayırlar, çünki atəş səsləri onları qorxutmur: "Bütün işlər öz qaydasında davam edir. Əhali Azərbaycan Ordusunun qələbəsinə hazırlaşır".
Ağdama edilmiş 5 hücumla bağlı cinayət işi başlandı
Ağdam rayonunun bir sıra yaşayış məntəqələri, o cümlədən Sarıçoban, Əhmədağalı, Orta Qərvənd, Qaradağlı və Səfərli kəndləri aprelin 4-də erməni silahlı birləşmələri tərəfindən növbəti dəfə artilleriya qurğularından intensiv atəşə məruz qalmışdır.
Baş Prokurorluğun Mətbuat Xidmətindən baki-xeber.com-a verilən məlumatda bildirilir ki, həmin tarixdə saat 16:00 radələrində rayonun Sarıçoban kəndinin ərazisinə düşmüş 3 ədəd mərminin partlaması nəticəsində kənd sakini, 1968-ci il təvəllüdlü Cəfərov İlqar Hidayət oğlu qəlpə yarası xəsarəti alaraq xəstəxanaya yerləşdirilmişdir.
Saat 17:00 radələrində rayonun Əhmədağalı kəndinin ərazisində yerləşən məscidin yaxınlığına düşmüş mərminin partlaması nəticəsində orada qoyun otaran kənd sakini, 1954-cü il təvəllüdlü Dadaşov Qaraş Şahmar oğlu qəlpə yarası xəsarətləri alaraq hadisə yerində ölmüş, 30-a qədər qoyun-quzu tələf olmuşdur.
Rayonun Orta Qərvənd kəndinin ərazisinə atılmış mərminin partlaması nəticəsində kənd sakini, 1989-cu il təvəllüdlü Heydərov Rəşad Qulu oğlu və 1968-ci il təvəllüdlü Heydərov Fərhad Lənkəran oğlu qəlpə yarası xəsarətləri alaraq xəstəxanaya yerləşdirilmişlər.
Saat 20:00 radələrində rayonun Qaradağlı kəndinin ərazisində mərminin partlaması nəticəsində yanmış ev rayon dövlət yanğın mühafizə hissəsinin işçiləri tərəfindən söndürülərkən həmin yerə atılmış digər mərminin partlaması nəticəsində yanğını söndürən rayon dövlət yanğın mühafizə hissəsinin manqa komandiri, 1974-cü il təvəllüdlü Mustafayev Akif Musa oğlu qəlpə yarası xəsarətləri alaraq xəstəxanaya yerləşdirilmişdir.
Rayonun Səfərli kəndinin ərazisinə düşmüş mərminin partlaması nəticəsində kənd sakini, 2000-ci il təvəllüdlü Məhərrəmova Pakizə Fərman qızı qəlpə yarası xəsarəti alaraq xəstəxanaya yerləşdirilmişdir.
Hər beş fakt üzrə Ağdam rayon prokurorluğunda Cinayət Məcəlləsinin müvafiq maddələri ilə cinayət işi başlanmış, istintaq aparılır.
Tərtərdə 16 yaşlı qızın həlak olması ilə bağlı cinayət işi başlandı
Tərtər rayonunun cəbhəyanı zonaya yaxın bir sıra yaşayış məntəqələri, o cümlədən Həsənqaya kəndi növbəti dəfə düşmən atəşinə məruz qalmışdır.
Baş Prokurorluğun Mətbuat Xidmətindən baki-xeber.com-a verilən məlumatda bildirilir ki, aprelin 5-də saat 11:00 radələrində Həsənqaya kəndində məskunlaşmış Kəlbəcər rayon sakini, 2000-ci təvəllüdlü Həsənli Turanə Kamandar qızı, yaşadığı evə atılmış mərminin partlaması nəticəsində çoxsaylı qəlpə xəsarətləri alaraq hadisə yerində vəfat etmişdir.
