Fransanın Azərbaycana bu ədalətsiz və mənfi münasibəti təsadüfi deyil. Bunu Prezident İlham Əliyev Məsim Məmmədovu Prezidentin Laçın rayonunda xüsusi nümayəndəsi təyin olunması ilə əlaqədar qəbul edərkən çıxışı zamanı deyib.
Ölkə başçısının sözlərinə görə, beynəlxalq vasitəçilər - ATƏT-in ovaxtkı Minsk Qrupu danışıqların aparılması ilə faktiki olaraq bu işğalı möhkəmləndirməyə çalışırdı: “İndi hər şey aydın oldu - Fransanın Azərbaycana bu ədalətsiz və mənfi münasibəti təsadüfi deyil. Sadəcə olaraq, işğal dövründə bunu müəyyən dərəcədə pərdələmək istəyirdilər, sadəcə olaraq, bizi çaşdırmaq istəyirdilər. Amma baxın, müharibədən - İkinci Qarabağ müharibəsindən keçən iki il yarım ərzində bizə qarşı hansı çirkin əməllər törədilir, hansı əsassız ittihamlar irəli sürülür. Yəni, bütün bunlar göz qabağındadır, o cümlədən Avropa Parlamentinin Azərbaycana qarşı qəbul etdiyi bir sıra qətnamə yenə də ermənipərəst, rüşvətxor və anti-Azərbaycan qruplaşmanın məhsuludur və burada aparıcı rolu Fransa deputatları oynayır. İşğal dövründə də biz bunu təbii ki, hiss edirdik, amma bu dərəcədə yox. Təsəvvür edə bilməzdik ki, ölkələr bu dərəcədə riyakar, yalançı ola bilərlər. Adamın üzünə baxıb bir söz deyə, arxada başqa iş görə bilərlər”.
Məlum olur ki, Azərbaycanın Avropanın enerji təhlükəsizliyinin təmin edilməsi istiqamətində etdiklərinin müqabilində bütün Avropanı Azərbaycana qarşı düşmənə çevirən məhz Fransadır. Maraqlıdır, belə ədalətsizliyə Avropanın Fransa xaric mütərəqqi ölkələri niyə susur və reaksiya vermirlər? Niyə Fransanı boykot edib bu ölkəyə öz yerini göstərmirlər?
“Aİ-nin bir sıra ölkələri zəif iqtisadiyyata və siyasi təsir imkanına malik olduğu üçün Parisə qarşı getməkdən çəkinir”
Məsələyə münasibət bildirən Yeni Yol Partiyasının sədri Ramil Hüseynov Avropa ölkələrinin Fransanın bu ədalətsizliyinə susmasını bir sıra faktorlarla əlaqələndirdi: “Bunun müxtəlif səbəbləri var. Səbəblərdən biri onunla əlaqədardır ki, Azərbaycanın əsas tərədaşı olan Böyük Britaniya 2016-cı ildə Avroittifaqı tərk edib. Bu o deməkdir ki, İngiltərə Avropa İttifaqının bir sıra təsisatlarında, o cümlədən Avropa Parlamentində təmsil olunmur. Fikrimcə, Böyük Britaniya Aİ-ni tərk etməsəydi, Fransaya dur deyəcəkdi. Digər tərəfdən, Aİ-nin 27 üzvi olsa da onların bir çoxu iqtisadi və siyasi baxımdan elə də güclü dövlət deyil. Avroittifaqın əsas aparıcı lokomotivi Almaniya və Fransadır. Ancaq əfsuslar olsun ki, Almaniya da zaman-zaman Azərbaycana ədalətsiz münasibət göstərib. Xüsusən də Almaniyanın bir sıra media resurslarında ölkəmizlə bağlı əsassız tənqidi yazılar yer alır. Başqa bir tərəfdən, Aİ-nin bir sıra ölkələri zəif iqtisadiyyata və siyasi təsir imkanına malik olduğu üçün Parisə qarşı getməkdən çəkinir. Hesab edirlər ki, bu, həmin ölkələrin Fransa ilə münasibətlərinə mənfi təsir edəcək. Çünki Fransa Avropa qurumlarında çox güclü təsir imkanlarına malikdir. Başqa bir tərəfdən fikirləşirlər ki, Azərbaycanın Avropanın qaz təchizatında payı 1,5 faiz olduğu üçün bu, elə də böyük rəqəm deyil. Ancaq istənilən halda bu, Avropa dövlətlərinin susmasına bəraət qazandırmır. Məsələ ondadır ki, Macarıstan Avroittifaqda yetərincə müstəqil mövqe ortaya qoyur. Həmçinin, bu dövlət Türk Dövlətləri Təşkilatında təmsil olunur. Hesab edirəm ki, Macarıstan sözügedən məsələdə Fransaya öz etirazını bildirə bilər. Əfsuslar olsun ki, Macarıstan nədənsə Fransaya etiraz etmir. Bununla yanaşı, Azərbaycanın ən böyük qaz alıcısı İtaliyadır və Avroittifaqda iqtisadi çəkisinə görə 3-cü dövlətdir. Hesab edirəm ki, İtaliya bu məsələdə daha aktiv olmalıdır. Ancaq bizə hələ ki, məlum olmayan səbəblərdən İtaliya Fransaya etiraz etmir. O da ola bilər ki, Avropa qurumlarının qərarları tövsiyə xarakterli olduğu üçün bir sıra dövlətlər Fransanın Azərbaycana qarşı canfəşanlığına ciddi yanaşmır”.
Vidadi ORDAHALLI
