Avropa Parlamenti yaxın günlərdə növbəti dəfə Azərbaycana qarşı obyektivlikdən və reallıqdan uzaq, böhtan xarakterli qətnamə qəbul etməyə hazırlaşır. Bu bir daha burada ölkəmizə münasibətdə necə düşmən mövqedə dayanıldığını sübut edir.
Bu qərəzli qətnamə layihəsinin ilkin mətnində Azərbaycanın guya Ermənistana hərbi təcavüz etməsi, Laçın yolunun guya “blokada”da olması kimi iddialar, eləcə də gorbagor olmuş “Minsk Qrupu”, “status”, “Dağlıq Qarabağda və ətrafında” kimi keçmiş, sərsəm və gündəlikdə umumiyyətlə olmayan məsələlər qeyd edilib.
Maraqlıdır ki, Avropa Parlamenti bilir ki, onun qəbul edəcəyi qərəzli qətnamələrin Azərbaycan üçün heç bir hüquqi-siyasi təsir mexanizmi yoxdur. Yəni belə bir qətnamələrdən sonra Azərbaycana sanksiya tətbiq edilmir, hər hansı formada real təzyiq imkanları əldə olunmur. O halda belə sənədlər yığını ilə Avropa Parlamenti nəyə nail olmaq istəyir?
Böyük Dayaq Partiyasının sədri Mirkazım Seyidov “Bakı-Xəbər”ə açıqlamasında bildirdi ki, Qarabağ münaqişəsinin artıq iki ildir ki, tarixin arxivinə atıldığı, bölgədə dayanıqlı sülhün, təhlükəsizliyin təmin olunması, Azərbaycanla Ermənistanın münasibətlərində yeni səhifənin açılması üçün bu iki Cənubi Qafqaz ölkəsi arasında sülh müqaviləsinin imzalanması istiqamətində səylərin göstərildiyi bir zamanda Avropa Parlamentinin belə qərəzli, necə deyərlər, erməni dəyirmanına su tökən qətnamə qəbul etməyə maraq göstərməsi bu qurumun qərəzli niyyətlərindən xəbər verir:
“Birmənalı vurğulamaq olar ki, Ermənistanın Azərbaycanın ərazi bütövlüyünü və suverenliyini tanımasından sonra Avropa Parlamentinin belə bir mövqeyi nəinki artıq xeyli müddətdir davam edən sülh prosesinə zərbə vurur, həm də işğalçı ölkədə hər vəchlə suyu bulandırmağa çalışan revanşist qüvvələri ruhlandırır. Qurumun qəbul etdiyi biabırçı qətnamələrdə 30 ildən artıq müddətdə Ermənistan tərəfindən Qarabağ bölgəsinin və ətraf rayonlarımızın işğalda saxlanmasının acı nəticələrini yaşamış Azərbaycan heç bir real fakta əsaslanmadan bu ölkəyə qarşı hərbi təcavüzdə ittiham edilir. Avropa Parlamenti kimi məqsədi, məramı sülhə mane olmaq olan beynəlxalq qurumlar unudurlar ki, Azərbaycan 44 günlük İkinci Qarabağ müharibəsində tarixi Qələbəsi ilə ölkəmizə qarşı 30 il sürən bütün qərəzli yanaşmalara son qoydu. Ermənistana və ona havadarlıq edən dövlətlərə, beynəlxalq təşkilatlara tarix, hüquq dərsi keçdi. Tarixi faktları, real həqiqətləri inkar etməklə nəyəsə nail olmağın mümkünsüzlüyü 44 gündə 30 ilin işğalına son qoyulması ilə bir daha təsdiqləndi. 30 il ermənilərin Azərbaycana qarşı hərbi təcavüzünə göz yumub işğalçıya problemin sonadək bu şəkildə davam edəcəyi barədə ümidlər verən dünyanın bəzi aparıcı dövlətlərinin, nüfuzlu beynəlxalq təşkilatların qərəzinin göstəricisidir. Görünür, Avropa Parlamenti bu yanaşması ilə tamamilə başqa bir məqsəd üçün çalışır ki, bu da hadisələrin inkişaf xronologiyasında özünü aydın şəkildə büruzə verir. Avropa Parlamenti nə üçün Ermənistanı öz ordusunu 35 il bundan əvvəl zəbt etdiyi və hələ də işğal altında saxladığı Azərbaycanın 8 kəndindən geri çəkilməyə səsləmir? Niyə Zəngəzur dəhlizinin açılmasını tələb etmir? Bütün bunlar bir daha deməyə əsas verir ki, qəbul ediləcək qərəzli qətnamələrin bizə heç bir təsiri olmayacaq. Belə qərəzli mövqe yalnız qurumun öz reputasiyasını zədələyir və ona inamı azaldır”.
Məhəmmədəli QƏRİBLİ
