Avropa Parlamentinin Azərbaycan barədə qətnamə qəbul etməyə hazırlaşdığına dair məlumatlar var və hətta həmin qətnamənin məzmunu da yayılıb, daha doğrusu, mətbuata sızıb. Qərar layihəsində Avropa Parlamenti Azərbaycana çağırış edir ki, Azərbaycan da Ermənistan kimi Avropa Birliyinin (Aİ) mülki missiyasını öz ərazisinə buraxsın.
Halbuki, bütün dünya, o cümlədən də Avropa Parlamenti bilir ki, Azərbaycan Ermənistandan fərqli olaraq, tam müstəqil dövlətdir və heç vaxt qurumun bu çağrışına əməl etməz, amma yenə də təkid edirlər. Bunu bildikləri halda bunlar Aİ-nin mülki missiyasının Azərbaycana gəlişi üçün niyə bu qədər təkid edirlər? Niyə bunu Azərbaycana qəbul etdirmək istəyirlər? Məqsəd nədən ibarətdir?
“Avroparlamentin Aİ missiyasını öz ərazisinə buraxması üçün Azərbaycana təkid etməsinin səbəbinə gəlincə, burada məqsəd Rusiyanı oyundan, danışıqlar prosesindən çıxarmaqdır”
SƏS Media Qrupunun rəhbəri, fəlsəfə üzrə fəlsəfə doktoru Bəhruz Quliyev bizimlə söhbətində bildirdi ki, ümumiyyətlə biz Avropa Parlamentinin (AP) Azərbaycana qarşı qərəzli yanaşmasını uzun illərdir müşahidə etmişik. “Avropa Parlamentinin qəbul edəcəyi növbəti qətnamədə də tamamilə qərzli və əsassız anti-Azərbaycan fikirləri yer alıb və bu qətnamə Azərbaycan ictimaiyyətində haqlı narazılıq doğurub. Avropa Parlamenti kimi bir qurumun belə yalan və uydurmalarla dolu qətnamə qəbul etməsi bir daha bu qurumun qeyri-ciddiliyini, qərəzliliyini və ermənilərin əlində alətə çevrildiyini göstərir. Əlbəttə ki, bu qərəzli və uydurma qətnamənin təşəbbüskarları ermənipərəst Avropa parlamentariləridir. Onlar öz şəxsi maraqları naminə beynəlxalq hüququ və qanunları ayaqlar altına atıblar”.
Media Qrupunun rəhbərinin sözlərinə görə, Azərbaycanın 30 il ərzində torpaqları işğal altında qaldı, 1 milyona yaxın qaçqın və məcburi köçkün öz yurd-yuvasından didərgin düşdü. Əgər biz beynəlxalq hüquqdan danışırıqsa, onda nəyə görə AP Azərbaycan insanının haqqını müdafiə etmədi? AP hələ də dörd mindən çox əsir və itkin düşmüş həmyerlilərimizin aqibəti haqqında müzakirə aparıb qərar qəbul etməyib.
“Əlbəttə, Azərbaycan öz ərazisində Avropa İttifaqının mülki missiyasının iştirakına qarşıdır, bunu yolverilməz sayırıq. Azərbaycan müstəqil dövlətdir və belə qurumların şərtlərini, çağırışlarını qəbul etməz. Avroparlamentin Aİ missiyasını öz ərazisinə buraxması üçün Azərbaycana təkid etməsinin səbəbinə gəlincə, burada məqsəd Rusiyanı oyundan, danışıqlar prosesindən çıxarmaqdır və tamamilə Avropa İttifaqını bu işə cəlb etməkdir. Eyni zamanda burada Avropa İttifaqının missionerlik fəaliyyətini əldə etməkdir. Sözsüz ki, biz Avropa İttifaqının hər hansı formadasa sülh danışıqlarına töhfə verməsinin tərəfdarıyıq. Amma mülkü missiyanın bizim daxilimizdə fəaliyyət göstərməsi və Azərbaycana diqtə etməsi, bizimlə diqtə dili ilə danışması yolverilməzdir. Heç zaman Azərbaycana kənar qüvvələrin bu şəkildə diqtə dili ilə danışmasına icazə verməyəcəyik. Bu missiya da yalnız birtərəfli qaydada Ermənistan tərəfdən fəaliyyət göstərir, adı “sülhməramlı” missiya olsa da, amma burada sülhməramlılıqdan söhbət getmir. Burada söhbət Ermənistanın maraqlarının müdafiəsi məramından gedir, onlar bundan çıxış edir. Ona görə də, bu yolverilməzdir, qəbuledilməzdir…
Əgər həqiqətən də Avropa İttifaqı və Avropa Parlamenti Azərbaycan və Ermənistan arasında problemin həllinə nail olmaq istəyirsə o zaman obyektiv yanaşma sərgiləməlidir. Azərbaycan sülhün əldə olunması yollarını çox yaxşı bilir. Biz 30 ildən sonra Azərbaycan vətəndaşının hüququnu bərpa etməyin də yolunu bildik.
Ümumilikdə, beynəlxalq qanunları nəzərə alsaq, Azərbaycanla bağlı qətnamə qəbul etmək Avropa Parlamentinin səlahiyyətlərinə daxil deyil. Buna görə də bu qətnamənin qəbulu yersizdir və suveren bir dövlətin daxili işlərinə müdaxilədir. Bu qərəzli qətnamə erməni diasporunun və lobbisinin təsirinin nəticəsidir. Avropa Parlamentinin özü korrupsiyaya bulaşmış bir qurumdur. Bu qurumun üzvlərinin nə ilə məşğul olduqları hamımıza çox yaxşı məlumdur”.
Avropa Parlementi indi də yenidən ATƏT-in Minsk Qrupu məsələsini gündəmə gətirdiyini dilə gətirən Bəhruz Quliyev bildirib ki, Minsk Qrupunun fəaliyyəti 30 ildə bizə tam məlum oldu: “Həmsədr dövlətlər açıq şəkildə mövqeyini ortaya qoydu və bu prosesi uzatmaqla onun həllinə mane oldular. Digər tərəfdən Avropa Parlamenti Azərbaycan millətinə, torpağına qarşı olan terroru heç vaxt müzakirə etməyib. Eyni zamanda, AP bir dəfə belə olsun, Azərbaycanın təbii sərvətlərinə qarşı olan eko-terroru müzakirəyə çıxarmayıb. Amma bugünkü gündə onlar Ermənistan tərəfdən çıxış edirlər. AP sanki Ermənistan parlamentinin komitəsinə çevrilib və Ermənistan Xarici İşlər Nazirliyi tərəfindən göndərilən layihələri notarius kimi təsdiqləyir. Bu artıq xristian klubunun hücuma keçmək mövqeyidir. Təbii ki, bu da bizi qane etmir. 30 il ərzində BMT-nin Azərbaycanla bağlı dörd qətnaməsi qəbul olunmadı. Ona görə də bizə bu cür təzyiqlər və ya AP-nin qəbul etdiyi qətnamələr lazım deyil. Əgər Avropa Parlamenti düzgün mövqe tutmaq və sülhə nail olmaq istəyirsə, o zaman Ermənistana bəyannamənin şərtlərinə uyğun hərəkət etməsi üçün təzyiq göstərsin. Əks halda bu, iki tərəf arasında münaqişəni qızışdırmaq məqsədi daşıyır və Avropa Parlamenti özünün birtərəfli mövqeyini ortaya qoymuş olur”.
Leyla QARAXANLI
