Azərbaycan beynəlxalq tədbirlərin keçirildiyi və sülhün, əminamanlığın təmin edildiyi bir ölkə kimi dünyanın diqqət mərkəzindədir. Bütün dünyada sülhün bərqərar olması bizim dövlətin əsas niyyətlərindən biri kimi diqqəti çəkir. Prezident İlham Əliyevin himayəsi altında və Nizami Gəncəvi Beynəlxalq Mərkəzinin təşkilatçılığı ilə martın 9-da işə başlayan və martın 11-də başa çatan “Dünya bu gün: Çağırışlar və ümidlər” mövzusunda X Qlobal Bakı Forumunda 60 ölkədən 350 nəfər iştirakçı təmsil olunub.
Prezident İlham Əliyev Forumun açılış mərasimindəki çıxışında Azərbaycanın böyük şairi Nizami Gəncəvi barədə də danışıb :"... Mən Nizami Gəncəvi Beynəlxalq Mərkəzinə adını daşıdığı dahi Azərbaycan şairi Nizami Gəncəvinin xatirəsinə və irsinə olan dərin hörmətlə bağlı təşəkkürümü bildirmək istəyirəm. Nizami Gəncəvi Azərbaycanın qədim şəhərlərindən olan özünün doğma Gəncə şəhərində dünyaya göz açıb, yaşayıb, orada vəfat edib və dəfn olunub. Onun müdrikliyi və istedadı Azərbaycan xalqının istedadını və müdrikliyini təcəssüm etdirir..."
Qeyd edək ki, Prezident İlham Əliyev martın 9-da BMT-nin İnsanın İmmunçatışmazlığı Virusu/Qazanılmış İmmun Çatışmazlığı Sindromu üzrə Birgə Proqramının (UNAIDS) icraçı direktoru Vinni Byanyimanı qəbul edərkən də Nizami Gəncəvi Beynəlxalq Mərkəzinin ilk fəaliyyətinin dahi Azərbaycan şairi Nizami Gəncəvinin ana yurdu olan qədim Gəncə şəhərindən başladığını bildirib, sonrakı illərdə bu Mərkəzin daha da inkişaf etdiyini və bu il artıq ölkəmizdə X Qlobal Bakı Forumunun keçirildiyini vurğulayıb.
Azərbaycan paytaxtında keçirilən “Dünya bu gün: Çağırışlar və ümidlər” mövzusunda X Qlobal Bakı Forumu ilə bağlı müxtəlif ölkələrin aparıcı KİV-lərində silsilə məqalələr dərc olunub.
Məqalələrdə Bakının onuncu dəfə təşkil etdiyi bu mötəbər tədbirə qatılan nüfuzlu siyasətçilərin, dövlət və hökumət başçılarının, sabiq prezidentlərin, beynəlxalq təşkilatların rəhbərlərinin dünya gündəminin ilk sıralarında yer alan mühüm məsələlər barədə müzakirələr apardıqları, müasir çağırışlarla bağlı həll yollarını araşdırdıqları qeyd olunub.
X Qlobal Bakı Forumu bütün dünyaya səs salıb və tədbir çərçivəsində bir sıra vacib qlobal məsələlərə toxunulub, geniş müzakirələr aparılıb. Bu Forum çərçivəsində Prezidentin Nizami Gəncəvi barədə xüsusi danışması, onun Azərbaycan şairi olmasını, Gəncədə doğulduğunu, burada vəfat etdiyini vurğulaması molla rejiminə agır bir zərbə oldu.
"Forumda Prezident İlham Əliyevin çıxışı mədəni irsimizə, o cümlədən Nizami milli kimliyinə molla rejiminin saxta iddialarına beynəlxalq müstəvidən birbaşa verilən ən mükəmməl cavab oldu"
“Türk Dünyası İnfo” İctimai Birliyinin rəhbəri Dəyanət Osmanlı bizimlə söhbətində bildirdi ki, X Qlobal Bakı Forumunun bütün dünya üçün böyük əhəmiyyəti var və burada səsləndirilən mesajlar Azərbaycan dövlətinin sülh tərəfdarı olduğunu bir daha sübut edir. Bunun həm də molla rejiminə kəskin cavab olduğunu deyən müsahibimiz hesab edir ki, rejim bundan nəticə çıxarmalıdır: "İran fars rejimi tarixən açıq-aşkar Azərbaycan torpaqlarına, milli-mədəni irsinə, ədəbiyyatını özününküləşdirmək siyasəti yürüdüb. İran özünün xaricdə mədəniyyət mərkəzləri adı altında yaratdığı örgütlər vasitəsi ilə Azərbaycana qarşı güclü kampaniya aparıb. Onlar məhz türk düşmənçiliyi, işğalçılıq xislətinə görə ermənilərlə doğma münasibət sərgiləyirlər. Ədəbiyyat sahəsində də eyni təcavüzkar həmlələr səngiməyir. Bu gün də molla rejimi Azərbaycan klassikləri, o cümlədən Nizami Gəncəvi barədə İran sahiblik iddialarını davam etdirirlər. Onların əsas istinad nöqtəsi Nizami Gəncəvinin əsərlərini fars dilində yazmasıdır. İran Nizaminin fars şairi kimi tanıdılması təbliğatına xeyli sərmayə qoyub. Saxta arqumentlərə əsaslanan elmi araşdırma əsərləri yazdırıblar, dünya dillərinə tərcümə edərək yayıblar. Ancaq buna baxmayaraq Nizami Gəncəvi dünyada Azərbaycan şairi kimi tanınır.
Fars-molla rejimi Nizami Gəncəvi haqqında danılmaz tarixi reallıqları nəzərə almadan saxtakarlığa varır: Birincisi, Nizaminin doğulduğu və dəfn edildiyi məkan onun Azərbaycana məxsus olduğunu ifadə edir. İkincisi, Nizaminin dövründə İran adlı dövlət olmayıb. Üçüncüsü, fars dili o zamanlar bütün şərqdə poetik (şeir dili) dil olaraq qəbul olunurdu. Fars dili, hətta şahların saraylarına da sirayət etmişdi. Ona görə də klassiklər yayılma arealını, dil tələblərini nəzərə alıb, əksərən fars dilinə müraciət etmişlər".
D.Osmanlının sözlərinə görə, Sövet dönəmində Azərbaycan ədəbiyyatşünaslığında Nizami irsi barədə kifayət qədər sanballı tədqiqatlar aparılıb, əsərlər yazılıb. O qeyd etdi ki, ancaq üzərindəki müəyyən basqılar səbəbindən həmin əsərlər çox zaman yerli səviyyədə qalıb. İranın Azərbaycanın güclənməsini istəməməsinin səbəbləri çoxdur. Onlardan biri də odur ki, İran yaxşı görür, Azərbaycanın nüfuzu artıqca dünyada yaşayan soydaşlara milli himayədarlığı, bütövlükdə onların haqlarının bərpasına ideoloji dəstəyi təmin etmək üçün səylərini də artırır.
Azərbaycan təşəbbüsü ilə Nizami Gəncəvi Beynəlxalq Mərkəzinin yaradılması və bugünkü səviyyəyə qalxması fars hökumətini çox məyus edir. Mərkəzin təşkilatçılığı ilə X Qlobal Bakı Forumunun keçirilməsi isə dünya mediasının diqqətinə bir daha Azərbaycan həqiqətlərini bu mədəniyyət platformasından təqdim elədi. Forumda Azərbaycan Prezidenti Cənab İlham Əliyevin çıxışı mədəni irsimizə, o cümlədən Nizami milli kimliyinə molla rejiminin saxta iddialarına beynəlxalq müstəvidən birbaşa verilən ən mükəmməl cavab oldu.
Proseslər onu göstərir ki, İran mill-mədəni irsimizə, ərazisindəki 40 milyonluq soydaşlarımızın haqlarına sayğı göstərməli, eləcə də bölgədə gərginlik yaradan səylərinə son qoyub gerçəklə hesablaşmalıdır"-deyə D.Osmanlı vurğuladı.
İradə SARIYEVA
