Ermənistanın baş naziri Nikol Paşinyan növbəti dəfə yerli medianın hədəfinə tuş gəlib. Bu dəfə baş nazirin korteji ilə bağlı qalmaqallı görüntülər yayılıb.
Bildirilir ki, baş nazirin korteji hökumət binasına daxil olan zaman insident yaşanıb. Belə ki, polis həmin anda yoldan keçən iki nəfərə hücum edərək onları "zərərsizləşdirib".
Məlum hadisə sosial şəbəkələrin erməni seqmentində ölkə rəhbərinə qarşı sui-qəsd cəhdi kimi müzakirə olunur.
Xatırladaq ki, bu, Nikol Paşinyanın korteji ilə bağlı ilk qalmaqallı hadisə deyil. Ötən il korteji müşayiət edən polis maşını İrəvanın Paronyan küçəsində yolu keçən hamilə bir qadını vuraraq öldürmüşdü.
Paşinyana doğrudan da sui-qəsd cəhdi olur, yoxsa bu da Ermənistan hakimiyyətinin növbəti blefidir?
Təhlükəsizlik məsələləri üzrə ekspert, xüsusi xidmət qurumlarının sabiq əməkdaşı Elşən Həsənov “Bakı-Xəbər”ə açıqlamasında bildirdi ki, görünür, Ermənistan kimi “demokratik və azad fikirli” cəmiyyətə malik dövlətdə hər hansı fərqli baxışlara malik fərd dövlətin rəhbər vəzifəli şəxsinə hansısa məsələyə dair etirazını bu şəkildə bildirməyə üstünlük verib:
“Ümumiyyətlə, ilk növbədə, Ermənistan adlandırılan dövlətdə bu tip hadisənin yaşanması bizə qəribə gəlməməlidir ki, bunun da izahı çox sadədir – istər xarici, istərsə də daxili siyasətdə baş verən hadisələrə münasibət hər hansı bir halda dalana dirənərsə, burada erməni genetikasının mühüm elementi olan terror adlı mexanizm işə düşür. Dünyanın, terrora bağlı olan təşkilatlarının böyük əksəriyyətinin məhz erməni millətinin “maraqlarına xidmət” etdiyi heç kəs üçün sirr deyil. Xarici dövlətlərə qarşı keçirilən terror aktlarının təşkilatçı və icraçısı olan erməni terror təşkilatlarının öz metodikalarının tətbiqinə daxili siyasət məsələlərinin həllində də rəvac verməsi tam mümkün olan hadisə ola bilər.
Çox uzaq tarixə baş vurmaq istəməzdim. 1999-cu ildə Ermənistan parlamentində baş vermis terror aktı buna bariz nümunədir. Elə o vaxtlar da ölkənin daxili və xarici siyasi xəttini qəbul etmək istəməyən, onu yanlış sayan, erməni terror təşkilatına bağlı olan terrorçular parlament binasına daxil olaraq, prezidiumda və zalda əyləşmiş deputatlara atəş açaraq qətlə yetirdilər. Nəticə hamımıza məlumdur. Parlamentin rəhbər vəzifəli şəxslərinin, eləcə də deputatların qətli, nazirlərin girov götürülməsi, Ermənistan rəhbərliyinin istefasına qədər aparıb çıxaran proseslərə bu yolla start verilməsi.
Görünür, indiki halda da Ermənistan daxilində qüvvələr arasında gedən siyasi mübarizənin nəticəsi olaraq baş verməsi mümkün sayıla bilən bənzər hadisə törədilməsinə cəhd edilib. Hər halda, Ermənistanın mövcud hakimiyyəti tərəfindən yürüdülən daxili və əsas da xarici siyasət, Paşinyanın müxtəlif məsələlərlə bağlı atdığı fərqli addımlar hansısa daxili və yaxud xaricdən idarə olunan qruplaşmaya sərf etmir. Belə addım həmin qruplar tərəfindən həyata keçirilə bilər ki, bu da mövcud ziddiyyətli durum fonunda tam mümkün görünür”.
Ekspert hesab edir ki, Ermənistan-Rusiya münasibətləri fonunda variant olaraq Rusiyanın, Ermənistan siyasi rəhbərliyinin bu yolla neytrallaşdırılması və regionda Rusiya maraqlarına birmənalı şəkildə xidmət göstərəcək yeni siyasi qüvvələrin hakimiyyətə gətirilməsi məsələsi nəzərdən keçirilə bilər:
“Çünki yuxarıda Ermənistan parlamentində törədilmiş terror hadisəsi ilə bağlı çəkdiyim misalda da hadisənin baş vermə səbəbi kimi ilkin versiya Rusiya maraqlarının təminatı olaraq nəzərdən keçirilmişdi.
Yəqin ki, tarix təkrar olunur. Ermənistan öz siyasətinin əsiridir Düşünürəm ki, elə bu siyasətin nəticəsi olaraq biz zaman-zaman bu tip hadisələrin şahidi ola bilərik ki, bu da ermənisayaq siyasətin təzahürü sayıla bilər”.
Məhəmmədəli QƏRİBLİ
