Ermənistanın baş naziri Nikol Paşinyanın bu günlərdə Almaniyaya səfərindən sonra erməni mediasında, sosial şəbəkələrdə, ekspert dairələrində Qarabağda qalan ermənilərlə bağlı bəzi cəfəng fikirlər səslənməyə başlamışdı. Belə ki, ermənilər Almaniyanın kansleri Olaf Şoltsun Qarabağ sakinlərinin öz müqəddəratını təyinetmə hüququnu nəzərdə tutan dinc həllinə tərəfdar olmasına dair açıqlama verdiyini iddia edərək, bunu az qala toy-bayram kimi qeyd edirdilər.
İddiaya əsasən, kansler martın 2-də Almaniyada səfərdə olan Nikol Paşinyanla görüşündən sonra aşağıdakıları qeyd edib: “Ermənistan-Azərbaycan sərhədində sabitsizlikdən və Qarabağda humanitar vəziyyətin pisləşməsindən narahatıq. Status-kvo davam edə bilməz və xalqın xeyrinə uzunmüddətli həllə ehtiyac var. Ermənistan və Azərbaycanın ərazi bütövlüyü və Qarabağ vətəndaşlarının öz müqəddəratını təyinetmə hüququnu nəzərə alan dinc həll yolu tapılmalıdır. Bu prinsiplər bərabər tətbiq oluna bilər”. Azərbaycan rəsmiləri daha öncəki bəyanatlarında birmənalı olaraq Qarabağın erməni sakinlərinin ölkənin bütün vətəndaşları ilə eyni hüquqlara malik olduğunu bildirib. İndi “armenianreport” portalı yazır ki, əslində, Olaf Şoltsun dedikləri təhrif edilib və alman kanslerin mövqeyi daha çox Azərbaycanın mənafeyinə uyğundur. Bu xüsusda qeyd edilir: “Ermənistanın baş naziri Nikol Paşinanın Almaniyaya olan son səfəri, bu müddət ərzində Almaniyanın kansleri Olaf Şolts ilə görüşü bir anda böyük məmnunluq yaratmışdı. Birincisi, Almaniya Avropa İttifaqında ən böyük iqtisadiyyata malik ölkədir və onunnla dost olmaq kiçik Ermənistana ən azı iqtisadi cəhətdən tövsiyə olunur. İkincisi, Berlin xarici siyasətdə siyasi müstəqillik qazanmağa çalışır və Almaniyanın bölgədəki vəziyyətə düzgün münasibətə sahib olması Ermənistan üçün son dərəcə vacibdir. O cümlədən təhlükəsizlik məsələsində. Bu çərçivədə qeyd etmək lazımdır ki, Aİ-nin Ermənistandakı uzunmüddətli missiyasının əsas sütununu almanlar və fransızlar təşkil edir. Xatırladaq ki, Ştutqartdakı Federal Polis İdarəsinin keçmiş rəhbəri Markus Ritter missiyanın rəhbəri təyin edilib. Bundan əlavə, Almaniya vəziyyəti sabitləşdirmək üçün Ermənistanın sərhəd bölgələrinə daha çox müşahidəçi göndərmək niyyətindədir. Lakin Federal Hökumətin başçısının qorxaqlığına görə Ermənistanın istədiyi bir irəliləyiş və nəticə əldə edilmədi. Bildiyiniz kimi, Paşinyan ilə birgə mətbuat konfransı zamanı Şoltsun aşağıdakı açıqlmanı verməsi iddia edilmişdi: “Ermənistan və Azərbaycanın ərazi bütövlüyü və Qarabağ vətəndaşlarının öz müqəddəratını təyinetmə hüququnu nəzərə alan dinc həll yolu tapılmalıdır. Bu prinsiplər bərabər tətbiq oluna bilər”. Əvvəlcə bu açıqlama Ermənistanda böyük coşquya səbəb oldu. Ancaq tezliklə bu coşqunu məyusluq əvəzlədi, çünki Berlin birdən-birə mövqeyindən geri çəkildi. Alman hökumətinin internet saytında Qarabağdakı ermənilərin öz müqəddəratını təyinetmə hüququ barədə heç bir söz yox idi. Almaniya hökumətinin nümayəndəsi Volfqanq Buşer alman kanslerinin ifadəsini düzəltmişdi. Berlinə azərbaycanlıların və türklərin bu məsələdə təzyiqlər etməsi aydındır. Bəli, bu təzyiqlər o qədər çoxdur ki, Şolts sözlərini geri götürdü. Ancaq Almaniya indi aktiv və nüfuzlu geosiyasi oyunçular klubuna girməyə çalışır. Berlin təkcə Avropada deyil, həm də sərhədlərindən kənarda, məsələn, postsovet məkanında, o cümlədən Cənubi Qafqazda aktivdir.
Bundan əlavə, Rusiya-Ukrayna müharibəsi fonunda Almaniya hərbi büdcəsini xeyli artırdı. Bəs bunların sonunda nə görürük? Berlin hələ də İkinci Dünya müharibəsindən sonra onilliklər ərzində oynadığı ABŞ-ın kiçik qardaşı rolundan çıxa bilməyib. Razılaşın, Almaniya lideri sözlərini bir neçə saat sonra Bakı və Ankaranın təzyiqi altında geri götürürsə, dünyada Almaniya ilə heç kim hesablaşmayacaq. Onun liderinin sözlərinin isə ən kiçik bir dəyəri yoxdur. Belə sözlər boş yerə deyilir. Nə təəccübləndik, nə də qəzəbləndik. Avropa enerji təhlükəsizliyini, öz maraqlarını daha üstün tutur. Ermənistanın əsas müttəfiqi olan, mövqeyi Qərbdə nəzərə alınan Fransa da bəyannamə qətnamələrdən daha irəli getmədi. Paris heç bir sanksiya tətbiq etmir və ya Bakıya ən azı minimum təzyiq göstərmir. Ya istəmir, ya da edə bilməz. Ya da bəlkə də hər ikisi. Fransızlar erməniləri yalnız növbəti seçkilər ərəfəsində xatırlayacaqlar. Almaniya haqqında nə deyə bilərik, bu ölkənin də neft və qaza ehtiyacı var. Boğulan adamın qurtuluşu boğulan adamın özünün işidir. Qərb, Rusiya, İran və ya digər ölkələrdən heç nə gözləməyin. İndiyə qədər geosiyasi oyunlarda Ermənistan çox da yaxşı ifaçı olmayıb. Hələ ki, bu məsələni yaxşı bacarmırıq”. Bunlar fonunda ermənilər etiraf edir ki, Azərbaycan enerji təchizatında mühüm tərəfdaş kimi Avropada öz mövqelərini daha da möhkəmləndirir. Azərbaycan karbohidrogen resurslarını şaxələndirilmiş kəmərlər vasitəsilə ixrac edir. Eyni zamanda, bu məsələdə tranzit ölkə rolunu oynayır. Azərbaycan Cənub Qaz Dəhlizi vasitəsilə İtaliya, Yunanıstan və Avropa İttifaqının bir neçə digər ölkəsinə qaz ixrac edir. Bununla yanaşı, digər Şərqi Avropa ölkələri də bu gün Azərbaycandan “mavi yanacaq” almaq niyyətini irəli sürür. Digər müstəvilərdə də uğurlu əməkdaşlıq Ermənistanı Qərbdə arxa plana atır.
Nahid SALAYEV
