Azərbaycan torpaqlarını 30 ilə yaxın işğalda saxlayan Ermənistan ərazilərimizi dağıtmaq, talan etməklə yanaşı, həm də kütləvi şəkildə minalarla çirkləndirib. 44 günlük Vətən müharibəsində öz torpaqlarını azad edən Azərbaycan mina terroru ilə üz-üzədir. İnsanlarımız az qala hər gün mina qurbanına çevrilir, sağlamlıqlarını itirir.
Prezident İlham Əliyev martın 2-də Birləşmiş Millətlər Təşkilatı (BMT) Baş Assambleyasının 77-ci sessiyasının prezidenti Tsaba Korosini qəbul edərkən bu məsələyə toxunub. Dövlət başçısı qeyd edib ki, müharibənin başa çatmasından sonra - 2020-ci il noyabrın 10-dan indiyədək 300-ə yaxın vətəndaşımız mina partlaması səbəbindən həlak olub və ya yaralanıb.
“Beynəlxalq təşkilatlar, ayrı-ayrı ölkələrin parlamentləri, insan haqlarının müdafiəsi ilə məşğul olan qurumlar Azərbaycana qarşı qəddarcasına davam etdirilən mina terroruna biganə qalmamalıdırlar”
Mövzu ilə bağlı fikir bildirən siyasi şərhçi Azər Həsrət “Bakı-Xəbər”ə açıqlamasında qeyd etdi ki, 2020-ci il noyabrın 10-dan indiyədək 300-ə yaxın vətəndaşımızın mina partlaması səbəbindən həlak olması və ya yaralanması faktının səslənməsi vacibdir: “Məlumdur ki, ermənilər bizə qarşı təbliğat aparır, Azərbaycana böhtan atır. Əsassız informasiya ilə ictimai rəyi, diqqəti yayındırmaq istəyirlər. Azərbaycan tərəfi isə heç bir yalana ehtiyac duymadan əlində olan faktları təqdim etməklə istənilən nəticəni əldə edə bilər”.
Həmsöhbətimizin sözlərinə görə, ermənilərin bu cür faktlar törətməsi tirajlanmalıdır: “Ermənistan 30 il işğal altında saxladığı Azərbaycan torpaqlarında əsl vandalizm törədib. Ermənilərin hərbi cinayətlərinin sayı-hesabı yoxdur. Bu cinayətlər sırasında ərazilərin minalanması da əsas yerlərdən birini tutur. 44 günlük Vətən müharibəsi nəticəsində torpaqlarımız işğaldan azad olunsa da, Ermənistan tərəfindən hərbi işğal dövründə Qarabağ torpaqlarının dağıntılara məruz qalması və minaların basdırılması keçmiş məcburi köçkünlərin evlərinə təhlükəsiz qayıtmasına çox böyük əngəldir. Ermənistan ölkəmizə minalanmış ərazilərin qeyri-dəqiq xəritəsini verib, verilmiş xəritələrin dəqiqliyi isə cəmi 25 faizdir. Onlar dəqiq xəritəni verməkdən imtina edirlər. Erməni hökuməti onlarda dəqiq xəritənin olduğunu etiraf etsə də, vermir və bunu siyasi şantaj predmetinə çevirir. Bu, Ermənistanda terrorizmin dövlət səviyyəsində dəstəkləndiyinin bariz nümunəsidir".
A.Həsrət hesab edir ki, beynəlxalq təşkilatlar, ayrı-ayrı ölkələrin parlamentləri, insan haqlarının müdafiəsi ilə məşğul olan qurumlar Azərbaycana qarşı qəddarcasına davam etdirilən mina terroruna biganə qalmamalıdırlar. Onlar bu məsələ ilə bağlı Ermənistana çağırış və təzyiqlər etməlidirlər. Çünki müharibənin bitməsindən xeyli vaxt keçməsinə baxmayaraq, çoxlu sayda insan mina qurbanı olub. Minaların qurbanları isə daha çox dinc sakinlərdir. Bu bir daha sübut edir ki, döyüş meydanında məğlub olan Ermənistan dinc sakinlərə qarşı müharibəni davam etdirir. Ona görə də beynəlxalq birlik bu məsələdə Ermənistana ciddi təpkilər göstərməlidir.
Günel CƏLİLOVA
