Xəbər verildiyi kimi, Milli Məclisin deputatı Ramin Məmmədov Azərbaycan Respublikasının Qarabağ bölgəsində yaşayan erməni sakinlərlə təmaslar üzrə məsul şəxs qismində müəyyən edilib.
Martın martın 1-də Ramin Məmmədov Xocalı şəhərində, Azərbaycan Respublikası ərazisində müvəqqəti yerləşdirilmiş Rusiya Federasiyası sülhməramlı kontingentinin qərargahında Azərbaycan Respublikasının Qarabağ bölgəsində yaşayan erməni sakinlərin təmsilçiləri ilə görüşüb. Görüşdə Ekologiya və Təbii Sərvətlər Nazirliyi, İqtisadiyyat Nazirliyi yanında Əmlak Məsələləri Dövlət Xidməti və “AzerGold” Qapalı Səhmdar Cəmiyyətinin mütəxəssislərindən ibarət təbii sərvətlərin qanunsuz istismarını araşdıran monitorinq qrupunun rəhbəri Məsim Məmmədov də iştirak edib. Qarabağ bölgəsində yaşayan erməni sakinlərlə növbəti müzakirələr Bakıda, Gəncədə və yaxud Ağdamda da baş tuta bilər.
“Fransa və İran bu prosesdə Paşinyan hakimiyyətinin pozucu fəaliyyət göstərməsi üçün əlindən gələni edir”
Bu və digər məsələlərlə bağlı politoloq Tural İsmayılova bir sıra suallar ünvanladıq:
- Qarabağ bölgəsində erməni sakinləri ilə damışıqlar sonadək uğurlu gedə biləcəkmi, nə kimi risqlər var?
- Əvvəla, Azərbaycan bir çox istiqamətlər üzrə normallaşma prosesini təşviq edir və davam etdirir. Nəzərə almaq lazımdır ki, ölkəmiz 44 günlük Vətən müharibəsindən sonra regionda sülh və sabitliyin əldə edilməsinin həm qlobal əhəmiyyətini vurğulayır, həm də ölkəmizin bu prosesdə aparıcı və öncül mövqeyini daim təşviq edir. O baxımdan normallaşma prosesi həm sərhədlərin delimitasiyası və demarkasiyası üzrə işçi qrupların danışıqları səviyyəsində, həm Ermənistan tərəfindən bölgəyə ediləcək növbəti demarşların qarşısının alınması şəklində özünü göstərəcək. Eyni zamanda, Qarabağda yaşayan erməni vətəndaşlarımızla təmasların qurulması müsbət haldır. Azərbaycanın növbəti siyasi-diplomatik qələbələrindən biri Qarabağa heç bir aidiyyəti olmayan Ruben Vardanyanın oyundan kənarlaşdırılması idi. Azərbaycan Prezidentinin qətiyyətli siyasəti sayəsində Vardanyan prosesdən kənarlaşdırıldı. Digər tərəfdən, Azərbaycana qarşı son dövrlərdə müxtəlif məsələlər üzrə bir çox imperialist dairələrə bağlı olan QHT-lər və media quruluşları tərəfindən informasiya hücumları həyata keçirilir. Laçın yolunda ekoloji tələblərlə bağlı aksiya keçirən ekoaktivistlərin tələblərinə göz yuman, bununla bağlı fəallıq göstərməyən xarici QHT-lər və mediaların Qarabağda etnik ermənilər üzərində siyasi maskarad qurmasının şahidi oluruq. Həmin təsisatlar Qarabağdakı erməni vətəndaşlarımızla təmasların qurulmasına diqqət ayırmadılar.
- Sözügedən məsələdə rəsmi İrəvan pozuculuq edəcəkmi?
- Hesab edirəm ki, hazırda Ermənistan hakimiyyəti özü prosesdə pozuculuqda o qədər də maraqlı görünmür. Çünki bunun fəsadları Ermənistan üçün böyük olacaq. Sərhədlərin, yolların açılması bu məsələnin həllindən keçir. Üstəlik, Ermənistan hakimiyyəti anlayır ki, separatizmə son qoyulmasa, Rusiya Qarabağda qalmağa çalışacaq. Ancaq Ermənistanın havadarları, xüsusən də Fransa və İran bu prosesdə Paşinyan hakimiyyətinin pozucu fəaliyyət göstərməsi üçün əlindən gələni edir.
- Qərbdən və Rusiyadan prosesə gələcəkdə hansı təsir perspektivləri var?
- Rusiyanın və Qərbin prosesi pozmaq ehtimalı çox yüksəkdir. Ancaq Azərbaycan qlobal müstəvidə önəmli güc mərkəzi olaraq tanındığı üçün buna imkan verməz. O baxımdan Rusiya və Qərbin bütün sabotajçı fəaliyyətinin qarşısı alınacaq. Onu da qeyd edim ki, Lavrovun Bakıya səfərinin Qarabağdakı erməni sakiləri ilə təmaslara heç bir dəxli yoxdur. Çünki ölkəmiz dəfələrlə Qarabağda yaşayan Azərbaycan vətəndaşı olan ermənilərin, digər vətəndaşlarımızla eyni hüquqlara malik olduğunu bəyan edib. Azərbaycana qarşı cinayət törətmiş şəxslər istisna olmaqla, Xankəndi və ətrafında yaşayan ermənilər dövlətimizə inteqrasiya olmalıdır. Bununla bağlı ilk görüş kifayət qədər uğurlu addımdır və növbəti görüşlərin digər şəhərlərimizdə baş tutması ehtimalı çox böyükdür. Xocalıda baş tutan birinci görüş bundan sonra digər şəhərlərimizdə davam edəcək.
- Prosesin uğurla nəticələnməsinə nail olmaq üçün əlavə hansı addımların atılmasına ehtiyac var?
- Hesab edirəm ki, qarşılıqlı etimad gücləndirilməlidir. Bu çox önəmli faktorlardan biridir. Etimad nə qədər güclü olsa, bu bir o qədar təmasların effektivliyinə müsbət təsir edəcək.
Vidadi ORDAHALLI
