“Sülh müqaviləsində Qarabağ probleminə dair hər hansı müddəa olmamalıdır”. Bunu jurnalistlərə müsahibəsində Ermənistan parlamentinin sədri Alen Simonyan deyib.
Onun sözlərinə görə, tərəflər arasında müəyyən məsələlərlə bağlı konsensus var: “Ermənistan və Azərbaycan arasında sülh sazişi ilə bağlı İrəvan və Bakının bir sıra təklifləri üzrə konsensus əldə olunub. Mən detalları səsləndirə bilmərəm. Çünki bu, prosesə mane ola bilər. Amma deyə bilərəm ki, bunlar beynəlxalq səviyyədə qəbul olunmuş prinsiplərdir. Məsələn, bizim bəzi ölkələrlə sülh sazişlərimiz var və onlar orada qeyd olunur. Bunlar ümumi müddəalardır. İrəvan birmənalı olaraq sənədin mətninə Ermənistanın dövlətçiliyinə, suverenliyinə və ərazi bütövlüyünə təhlükə yarada biləcək “bombalar”ın daxil edilməsinin əleyhinədir. Sülh müqaviləsində Qarabağ probleminə dair hər hansı müddəa olmamalıdır. Onu başa düşməliyik ki, “Arsax” haqqında hər hansı bir şeyin müqaviləyə daxil edilməsi bizim maraqlarımızdan, arsaxlıların maraqlarından irəli gəlirmi?”.
İlk baxışdan bu, Azərbaycanın mövqeyidir. Ancaq Simonyanın bu fikrinin arxasında tipik erməni məkri gizlənir. Məsələ ondadır ki, Ermənistan Qarabağı Azərbaycanın tərkib hissəsi kimi görmür. Sadəcə, bu cür ifadələr işlətməklə oyun oynayırlar.
“Azərbaycanda sadəlövhcəsinə bir çoxları bunu Ermənistanın Qarabağdan imtinası kimi kimi dəyərləndirir”
Məsələyə münasibət bildirən Böyük Azərbaycan Partiyasının sədri Elşad Musayev də hesab edir ki, Simonyan belə çəkici ifadələr işlətməklə hiyləgər gediş edir: “Azərbaycanda sadəlövhcəsinə bir çoxları bunu Ermənistanın Qarabağdan imtinası kimi dəyərləndirir. Ancaq bu əsla belə deyil. Erməni tərəfi Qarabağdan imtina etməyib və bu, Simonyanın hiyləgər siyasi gedişidir. Sadəcə, Avropa İttifaqı, ABŞ platformalarında təklif olunan variantlar var. Onların da məzmunu ondan ibarətdir ki, sözügedən məsələ Ermənistan-Azərbaycan məsələsi kimi müzakirə oıunsun. Yəni status məsələsi danışıqlara salınmasın. Erməni rəsmiləri də buna uyğun manevr edirlər. Ermənistan Qarabağın Azərbaycanın tərkibində qalması ilə razı deyil. Əgər bunun əksi olsaydı, o zaman Ermənistan Qarabağdakı separatçılara böyük həcmdə maliyyə yardımı ayırmazdı. Ermənistan təkcə 2023-cü il üçün Qarabağ ermənilərinə 375 milyon dollara yaxın büdcə vəsaiti ayırıb. Bu, kifayət qədər böyük vəsaitdir. Bir belə vəsait ayıran Ermənistan Qarabağın Azərbaycan tərkibində qalmasına razı olarmı? Əlbəttə, yox. Ona görə də arxayınlaşaraq Simonyanın dediklərinə səthi yanaşmaq, bunu Azərbaycanın mənafeyinə uyğun bir diplomatik gediş kimi dəyərləndirmək doğru olmaz. Proseslərin gedişi göstərir ki, Ermənistan sona qədər dirənir. Müharibədə məğlub olmalarına rəğmən, sülh sazişindən yayınırlar. Maksimum vaxtı uzatmaqla geosiyasi vəziyyətin onların xeyrinə dəyişəcəyinə ümid edirlər. Erməni tərəfi sona qədər müqavimət göstərəcək ki, Qarabağ Azərbaycanın tərkibində olmasın”.
Bu baxımdan partiya sədri hesab edir ki, erməni rəsmilərinin söz oyununun təsiri altına düşüb onlara inanmaq olmaz.
Vidadi ORDAHALLI
