Ermənistanın baş naziri Nikol Paşinyanın Rusiyanın Ermənistandakı hərbi mövcudluğu ilə bağlı son bəyanatları nəinki sonuncunun təhlükəsizliyinə zəmanət vermir, əksinə, Ermənistan üçün təhdid yaradır.
Bunu Bakıda səfərdə olan Rusiyanın xarici işlər naziri Sergey Lavrov Azərbaycanın xarici işlər naziri Ceyhun Bayramovla keçirdiyi mətbuat konfransında deyib.
Qeyd edək ki, bir müddət əvvəl Paşinyan Rusiya silahlı qüvvələrinin Ermənistanda olmasının ölkənin təhlükəsizliyinə təminat vermədiyini demişdi. Əksinə, bunun Ermənistanın təhlükəsizliyinə təhdid törətdiyini qeyd etmişdi. Ancaq onun bu fikirlərini Lavrov şərh etmədi. Sadəcə, “bu açıqlamanı tamamilə onun vicdanına buraxıram” deyib ötüşdürdü.
Maraqlıdır, Lavrov Paşinyanın bu açıqlamasına daha geniş və detallı şərh verə bilərdimi? O buna daha geniş şərh verməkdən niyə imtina etdi?
“Əslində Lavrov məhz Bakıda olarkən Paşinyanın həmin sözlərinə daha sərt münasibət göstərə bilərdi”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyev Lavrovun bundan yayınmasını bir sıra amillərlə əlaqələndirdi: “Lavrovun Paşinyanın Rusiyanın hərbi bazasının Ermənistana təhlükə yaratması barədə iddialarına yumşaq cavab verməsi Kremlin hələ də çıxış yolu axtarması, yəni regiondakı mövcudluğunu hansı yolla olursa-olsun saxlamaq cəhdinə söykənir. Bu baxımdan, Rusiyanın XİN başçısı Ermənistanın baş nazirinin sölərinə ehtiyatla yanaşıb. Əslində Lavrov məhz Bakıda olarkən Paşinyanın həmin sözlərinə daha sərt münasibət göstərə bilərdi. Əgər belə olsaydı, biz ümumilikdə Rusiyanın Cənubi Qafqazdakı roluna və müəyyən qədər səmimiyyətinə inana bilərdik. Çünki Lavrov Bakıda keçirdiyi görüşlərində Bakının Moskva üçün nə qədər əhəmiyyətli tərəfdaş olduğunu deyib. Ancaq onun həmin ifadələri fonunda uzun illər Rusiyadan asılı vəziyyətdə qalmış bir marionet ölkənin rəhbərinə yumşaq cavab verməsi kənardan səmimi təsir bağışlamır. Əksinə, Lavrov bunun yerinə Azərbaycanın suveren ərazisində istənilən vaxt qoyula biləcək nəzarət-buraxılış məntəqəsi ilə bağlı suala Ermənistanın marağından cavab verdi. Təbii ki, onun mövqeyinin necə olması Azərbaycan dövlətinin marağından üstün ola bilməz və lazım olan anda həmin məntəqə də yerləşdiriləcək. Yəni Azərbaycan nə Moskvaya, nə də Avropaya öz suveren ərzilərində hansı addımları atacağı ilə bağlı hesabat vermək məcburiyətində deyil. Amma bütün bunların müqabilində biz başqa mənzərəni - Rusiyanın hələ də Ermənistanın ondan imtina etməsi fonundakı çabalamalarını müşahidə etməkdəyik. Halbuki, yuxarıda da qeyd etdiyim kimi, Lavrov kifayət qədər qəti, net və sərt cavabla Paşinyanın bəyanatına münasibətini açıqlamaq imkanına malik idi”.
Politoloq hesab edir ki, Lavrovun səfərində yekun qərar verilmədi: “Rusiyanın Azərbaycanla münasibətlərinə gəldikdə, qeyd edim ki, Bakıda ümumi razılaşmalar, hər iki ölkəni ümimi maraqlandıran məsələlər müzakirə edildi, lakin yekun qərarlar verilmədi. Bu fakt bir sıra məsələlərin açq qaldığını göstərir. Eləcə də üçtərəfli Bəyanatdakı bəndlərin icrasında, sonrakı üçtərəfli görüşlərdə ədlə edilmiş razılaşmalarda (Soçi, Praqa, Brüssel) Ermənistanın sülh prosesini əngəlləməsi ümumilikdə regiondakı vəziyyətdi təhdid altında saxlamaqdadır. O üzdən, Moskva da bunu birmənalı olaraq dərk etməlidir. Hesab edirəm ki, artıq açıq qalmış məsələlərin birdəfəlik həll edilməsinin zamanı çatıb. Rusiya öz siyasi çəkisini saxlaması, vasitəçilik cəhdlərinin uğurlu nəticələnməsi üçün İrəvana qarşı daha çevik və daha sərt addımlar atmalıdır. Əks halda itirən yalnız Ermənistan deyil, həm də Rusiya ola bilər”.
Vidadi ORDAHALLI
