Şuşa Rayon İcra Hakimiyyətinin başçısı Bayram Səfərovun Xocalı faciəsinin ildönümü ilə bağlı keçirilən anım mərasimində jurnalistlə dialoqu sosial şəbəkələrdə müzakirəyə səbəb olub.
B.Səfərov jurnalistlərdən birinin “Şuşaya gedə bilirsiniz” sualına əsəbiləşib.
İcra başçısı cavabında “sənə dəxli var?” deyib. Sosial şəbəkələrdə təkcə B.Səfərovun tərzi deyil, eyni zamanda jurnalistin danışıq üslubu, “sizdən hesab soruram” deməsi də birmənalı qarşılanmayıb.
Məlum hadisədə jurnalistin və icra başçısının davranışları barədə ekspertlər nə düşünür?
Azər Həsrət: “Prezidentin etimad göstərərək vəzifəyə təyin etdiyi məmurun davranışı kobuddur, qabadır, etik deyil”
Media eksperti, əməkdar jurnalist Azər Həsrət “Bakı-Xəbər”ə açıqlamasında bildirdi ki, bu təəssüf doğuracaq hadisəni onun özü də izləyib: “Təəssüflər olsun ki, burada hər iki tərəfin günahı var. Birincisi, Prezidentin etimad göstərərək vəzifəyə təyin etdiyi məmurun davranışı kobuddur, qabadır, etik deyil. Onun verilən suallara cavab vermək kimi bir öhdəliyi var. Həmin suallara cavab verməliydi. Cavab verə bilmədiyi suallarla bağlı təmkin nümayiş etdirməliydi. Məsələnin ikinci aspekti jurnalistin yanlış davranışı ilə bağlıdır. Jurnalistin “hesab sormaq” kimi ifadə işlətməsi kökündən yanlışdı. Çünki media işçisi kimdənsə “hesab sora” bilməz. O, sadəcə sual verib, cavab almalıdır. Biz vəziyyətin orada əvvəlcədən necə olduğunu bilmirik. Əlimizdə yalnız qısa bir video var. Ola bilər ki, ona qədər də hansısa söz çəkişməsi olub. Bütün bunlarla bərabər o qənaətə gəlirik ki, istər jurnalist, istərsə də Bayram Səfərov adekvat davranmayıblar və hər ikisi qınanmalıdır”.
Rəfail Becanov: “Bu məsələdə jurnalistin mövqeyi birmənalı şəkildə müdafiə oluna bilməz”
“Cebhe.info” saytının baş redaktoru Rəfail Becanov “Bakı-Xəbər”ə açıqlamasında bildirdi ki, hər iki tərəfin münasibətlərində, yanaşmasında ciddi problemlər var. Birincisi, sual verən tərəf jurnalist olduğuna görə birinci ondan başlayaq. Çox qeyri - peşəkar verilmiş sualdır, qeyri - peşəkar yanaşmadır. Bu, jurnalistika adına qəbuledilməzdir. Jurnalist hesab soran, təftişçi deyil. Ona görə də, bu məsələdə jurnalistin mövqeyi birmənalı şəkildə müdafiə oluna bilməz. Amma eyni zamanda, bir məmurun o formada cavabı da etik deyil. Ona görə etik deyil ki, əgər qane etməyən hər hansısa bir sualdırsa, yanaşma normal deyilsə, o da eyni zamanda deyə bilərdi ki, mən bu suala cavab vermək istəmirəm. Bu da onun hüququ sayılır. Hesab edirəm ki, hər iki tərəfin yanaşmasında çox ciddi problemlər var. Bu məsələni müzakirəyə çıxartmaqla, hər iki tərəf öz səhvini etiraf etməlidir”.
Sahib Məmmədov: “O elə edə bilərdi ki, juranalist pis vəziyyətdə qalardı”
Hüquqşunas Sahib Məmmədov isə hesab edir ki, siyasi post tutan hörmətli Bayram müəllimin cavabı belə olmalıydı: “Mən Şuşa rayon icra hakimiyyətinin başçısıyam. Şuşa əhalisi də hələlik məskunlaşmayıb. Mən hazırda rayona rəhbərliyi kənarda edirəm. Bu baxımdan mənim tez-tez Şuşaya getməyimə ehtiyac yoxdur. Zərurət olanda gedirəm”. Sahib Məmmədov bildirir ki, 10 ildən çoxdur dövlət qulluğuna qəbulda olur: “Müsahibə aparıram. Bizim 4 qiymətləndirmə istiqamətindən biri də inzibati vəzifəyə iddia edənin emosiyalarını idarə edə bilməsi ilə bağlıdır. İcra başçısı vəzifəsi dövlət qulluğu deyil, amma siyasi postdur. Ora təyin olunan öz emosiyalarını daha yaxşı idarə etməyi bacarmalıdır. O elə edə bilərdi ki, jurnalist pis vəziyyətdə qalardı. Çünki birinci səhvi edən jurnalist adlanan şəxs idi”.
Qulu Məhərrəmli: “Elə bir nöqtə var ki, dalbadal verilən sualların heç bir əhəmiyyəti olmur və yersiz mübahisələrə gətirib çıxarır”
Media eksperti Qulu Məhərrəmli isə bildirib ki, jurnalist istənilən şəxsə istədiyi sualı verə bilər: “Jurnalistin hansı sualı verib-verməyəcəyi ilə bağlı məhdudiyyət yoxdur. Onun işlətdiyi ifadələrdə yerinə düşməyən sözlər ola bilər. Ola bilər ki, sualı emosianal səslənsin. Hər halda ictimai maraq kəsb edən mövzudursa, jurnalist istədiyi sualı istənilən şəxsə ünvanlaya bilər. Məmurun borcu onun suallarını cavablandırmaqdır. Ancaq məmurun cavab verməmək hüququnu da tanımaq lazımdır. Məmur cavab vermədiyi halda jurnalistlərin dirəniş göstərməsi heç də onların xeyrinə olmur. Buna görə də, sualları çox düzgün və etik çərçivə gözlənilməklə vermək lazımdır. Mən jurnalisti qınamıram. Auditoriya, oxucu üçün cavab almalıdır. Elə bir nöqtə var ki, dalbadal verilən sualların heç bir əhəmiyyəti olmur və yersiz mübahisələrə gətirib çıxarır. Jurnalistlər o məqamı mütləq nəzərə almalıdır”.
Məhəmmədəli QƏRİBLİ
