Avropa İttifaqı Ermənistana birtərəfli qaydada monitorinq missiyası göndərmək haqqında qərar qəbul edəndə bu addımın Cənubi Qafqazda sabitliyə, sülhə deyil, vəziyyətin daha da gərginləşməsinə xidmət edəcəyi haqqında fikirlər səslənirdi. Bu gün baş verənlər, sərhəddə atəşkəsin pozulması sübut edir ki, proqnozlar özünü doğruldur.
Xatırladaq ki, Azərbaycan Müdafiə Nazirliyinin məlumatına görə, fevralın 21-də saat 20:45-dən fevralın 22-də saat 01:20-dək Azərbaycan Ordusunun Tovuz rayonu və Naxçıvan MR-in Sədərək rayonundakı mövqeləri 15 dəfə atəşə tutulub. Bundan başqa, Rusiya sülhməramlı kontingentinin müvəqqəti yerləşdiyi Azərbaycan ərazisindəki erməni silahlı dəstələrinin üzvləri tərəfindən Azərbaycan Ordusunun Kəlbəcər rayonunun Təzəkənd yaşayış məntəqəsi, Şuşa şəhəri və Xocavənd rayonu istiqamətlərində yerləşən mövqeləri də atəşə tutulub. Ordumuzun bölmələri tərəfindən adekvat cavab tədbirləri görülüb.
Atəşkəsin pozulması missiyanın gəlişinə zərurətin olduğuna dair rəy formalaşdırmağa xidmət edə bilərmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Qarabağ məsələsinə görə olan münaqişəni ilkin dövrdə izləyənlər Ermənistanın Azərbaycana hərbi təcavüzünün şahidi olublar: “Bu təcavüzün ilkin dövrlərində SSRİ rəhbərliyi vasitəçilik edirdi. O zaman Azərbaycan da, Ermənistan da SSRİ-nin tərkibində idi. Həmin vaxt da Ermənistan hər zaman olduğu kimi ərköyün mövqe tuturdu. Çünki SSRİ rəhbərliyinə arxayın olub, Azərbaycan torpaqlarını işğal edirdi, azərbaycanlıları Qərbi Azərbaycandan köçürürdü. SSRİ rəhbərliyindən istifadə edib, böhtanlar, yalanlar danışırdı. SSRİ dağılandan sonra bu prosesi Qazaxıstanla Rusiya öz üzərinə götürdü. Hətta SSRİ dağılma ərəfəsində də Boris Yeltsinlə Nazarbayev qabağa gəlmişdilər və danışıqları onlar aparırdılar. Həmin ərəfələrdə, ondan sonrakı dövrlərdə azərbaycanlılara qarşı çox böyük haqsızlıqlar oldu. Hətta dövlət rəsmilərinin olduğu vertolyot vuruldu. Daha sonrakı dönəmdə isə ATƏT-in Minsk qrupu vasitəçilik etməyə başladı və ATƏT-in xüsusi missiyası bölgələrdə gedib tez-tez monitorinq aparırıdı. Ermənilər də ən çox atəşi monitorinq zamanlarında pozurdu. İndi də avropalıların gəlməsilə bu cür atəşkəsi pozması təsadüfi deyil”.
Ekspertin sözlərinə görə, Ermənistan nə etdiyini bilmir: “Keçən il öhdəlik götürdü ki, ilin sonu sülh müqaviləsini imzalayacaq. Azərbaycanın irəli sürdüyü şərtlər beynəlxalq hüquq normalarına uyğun olduğu üçün, Avropa ittifaqı da heç bir söz deyə bilmir. Belə atəşi pozmaqla da rəy yaratmaq istəyir ki, bu münaqişəni asan həll etmək mümkünsüzdür. Ermənistan bir tərəfdən istəyir ki, münaqişə bitsin, Türkiyə və Azərbaycanla münasibətlər normallaşsın. Çünki Ermənistanın iqtisadiyyatı da ağır durumdadır. Münaqişə həll olunmasa, Ermənistan daha ağır zərbələr alacaq. Digər tərəfdən isə illərdir Ermənistanda yaşayanların beyni zəhərlənib, onlar yüz illərdir ki, böyük Ermənistan xəyalları ilə yaşayıblar. Və biz hər dəfə çıxışımızda deyirdik ki, onların müalicəsi Azərbaycan əsgərinin qılıncından keçir. 44 günlük Vətən müharibəsində Azərbaycan əsgəri onların beyninin bir hissəsini əməliyyat edib və görünür ki, tam əməliyyat olunmayıb. Yüz illərdir beyinə yığılan o xam xəyallar, Azərbaycan və Türkiyə hesabına “böyük Ermənistan” yaratmaq xülyadır. Terrorçu, separatçı bir dövləti normal vəziyyətə gətirmək üçün növbəti əməliyyata ehtiyac var. Ermənistan elə bir xroniki xəstəliyə tutulub ki, onu tez-tez, iki-üç ildən bir vaksinləmək lazımdır. Yoxsa daha böyük problemlər yarada bilər”.
Məhəmmədəli QƏRİBLİ
