Ermənistanın Baş naziri Nikol Paşinyan Münhen Təhlükəsizlik Konfransı çərçivəsində KTMT barədə, eləcə də İrəvanın bu təşkilatda iştirakının zəruriliyi ilə bağlı müəyyən narahatlığı olduğunu bildirib: “Bizim KTMT ilə bağlı müəyyən narahatlıqlarımız var və bu narahatlıq ictimailəşdirilib. Biz tərəfdaşlarımızla bu məsələləri qaldırdıq. Və narahatlıq hələ də davam edir. Həll yollarının tapılması üzərində işləyirik”.
Bu, Rusiyaya açıq-aşkar meydan oxumaq anlamına gəlirmi və rəsmi Moskvanın buna reaksiyası necə olacaq?
Siyasi şərhçi Turab Rzayev “Bakı-Xəbər”ə açıqlamasında bildirdi ki, Paşinyan hakimiyyətə məxməri inqilabla gəlib: “Məxməri inqilabı Ukraynada, Gürcüstanda, Moldovada olduğu kimi, Qərbin liberal çevrələri digər ölkələrdə də həyata keçirilməyə çalışıb. Bütün məxməri inqilablar Rusiyaya qarşıdır və birbaşa Putinin nifrətini qazanıb. Yəni həm Ukraynada, həm Moldovada, həm Gürcüstanda olan məxməri inqilabları və onların liderlərinə şəxsən Putinin özünün münasibəti necədirsə, Paşinyana, onun rəhbərlik etdiyi hakimiyyətə də Rusiyanın münasibəti eyni cürdü. Putin böyük ehtimal bu hakimiyyətə nifrət edir. Rusiyanın Ermənistanda təzyiq alətləri çox böyükdür. Ermənistanın işıq, qaz, elektrik infrastrukrundan tutmuş dəmir yolları sisteminə qədər. Qaz paylayıcı şəbəkələrindən tutmuş, atom elektrik stansiyalarına qədər hamısı Rusiyanın nəzarətindədir. Rusiyanın Ermənistanda ordusu var, Ermənistan hava və quru sərhədlərinə Rusiya nəzarət edir. Hətta Paşinyan özü xaricə səfər edərkən belə, aeroportdan keçəndə, böyük ehtimal olunur ki, pasportuna Rusiya sərhəd xidmətinin nümayəndələri möhür vururlar. Paşinyanın qarşısına Qərbdə onun hakimiyyətə gəlməsinə dəstək verən qüvvələr konkret tapşırıqlar qoyublar. Bu tapşırıqların içərisində ən böyüyü rus ordusunun Ermənistandan çıxarılması və Ermənistanın Qərbə inteqrasiyasıdır. Əlbəttə, rus ordusunu çıxartmadan Qərba inteqrasiya çətindir. Qərbə inteqrasiya etməsi üçün də əvvəl rus ordusu çıxarılmalıdır. Biz bunu Paşinyan hakimiyyətə gələr-gəlməz gördük. Xatırlayırsızsa, Qarabağ məsələsinə çox da ciddi önəm vermirdi. Paşinyan hakimiyyətə gələn kimi Qarabağ məsələsini sülh yolu ilə həll edəcəyini bildirirdi, onun həyat yoldaşı sülh məktubları göndərirdi. Əsas diqqət rus ordusu ətrafında idi. Paşinyan hakimiyyətə gəldikdən sonra maraqlı hadisələr baş verdi. Gah rus ordusu qəza törətdi, gah kimisə öldürdü və qaçdı. Bunun nəticəsində kütləvi mitinqlər, etirazlar başladı kı, rus ordusu çıxarılsın. Qarabağ müharibəsi müəyyən qədər Paşinyanın əsas missiyasını ikinci plana atsa da, biz elə müharibə dövründə də Paşinyanın vaxtaşırı Rusiyanın nüfuzuna, KTMT - yə zərbə endirdiyini gördük. Rusiyanın raketlərinin partlamaması, Rusiyanın və KTMT-nin Qarabağla müharibədə Ermənistana kömək etməməsi, sərhəd münaqişələrində KTMT-nin müdaxilə etməməsi, verilən silahların keyfiyyəti ilə bağlı bir çox məsələlərdə biz bu dediklərimizi aydın gördük. Paşinyan müharibə dövründə də, sərhəd münaqişələri dövründə də Rusiyanın mövqeyini zəiflətməyə çalışdı. Sonuncu dəfə sentyabrda sərhəd münaqişəsindən sonra Paşinyan tamamilə bunu açıq müstəviyə çıxardı. Şanxay Əməkdaşlıq Təşkilatının, KTMT toplantılarına qatılmadı, Ermənistanda olan KTMT toplantısında yekun bəyanata imza atmadı. Bundan sonra isə Ermənistanda KTMT - nin növbəti hərbi təlimləri olmalı idi. Ermənistan isə hələ də bu məsələni uzadır. Görünən budur ki, Paşinyan hər fürsət düşdükcə Rusiyaya qarşı demarşını davam etdirir. Hələlik bunu xırda narazılıq səviyyəsində edir. Zamanı gələndə isə konkret addımlar atmağa çalışacaq”.
Məhəmmədəli QƏRİBLİ
