Qarabağa müvəqqəti yerləşdirilən Rusiya sülhməramlı kontingentinin məsuliyyət bölgəsində hələ də Ermənistan ordusunun qalıqları qalmaqdadır.
Teleqram kanalları Ermənistan ordusunun Qarabağdakı qalıqları və onların hərbi obyektlərinin xəritə koordinatlarını göstərən yeni siyahı hazırlayıb. Təqdim olunan siyahı və koordinatlara diqqət yetirdiyimiz zaman rus sülhməramlıların müvəqqəti məsuliyyət zonasında Ermənistan ordusunun qalıqlarının hərbi obyektlərinin əsasən Sırxavənd-Qarakənd-Şuşakənd üçbucağında yerləşdiyi məlum olur. Məhz bəhs etdiyimiz istiqamətdə onlara aid 13 hərbi obyekt aşkarlanıb.
Bütün bunlara Rusiya sülhməramlıları niyə göz yumur və Azərbaycanın bununla bağlı hansı addımları atma ehtimalı var?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki, Qarabağdakı erməni separatçılarının yenidən silahlanması, onların kənar güclər tərəfindən bu şəkildə stimullaşdırılmasının qarşısını almaq üçün Azərbaycan dövləti siyasi iradə nümayiş etdirməlidir:
“Tezliklə Qarabağdakı birləşmələrin çıxardılması üçün hərəkətə keçmək lazımdır. Paralel olaraq isə hələ də Qarabağda yerləşmiş Ermənistan Müdafiə Nazirliyinin 1-ci Əlahiddə Ordusunun hərbi birləşmələrinin və separatçı ermənilərin qanunsuz silahlı bölmələrinin çıxarılması (yaxud, tərkisilah edilməsi) üçün ciddi tələb irəli sürülməlidir. Bu tələblər icra olunmadığı təqdirdə həmin silahlı birləşmələrin hərbi hissələri aviasiya zərbələri və müvafiq hərbi əməliyyatla məhv edilməlidir”.
Hərbi ekspert xatırladır ki, Azərbaycan bu məsələ ilə bağlı dəfələrlə tələblərini irəli sürüb: “Hətta ötən il bu mövzu Prezident tərəfindən detallı şəkildə içtimaiyyətə açıqlandı. Prezident dedi ki, hətta yüksək çinli rus hərbçisi bununla bağlı üzərinə öhdəlik də götürüb, ancaq deyilən vaxt keçsə də, ortada nəticə yoxdur. Gəlin məsələyə bir qədər məntiqi aspektdən yanaşaq. Hər halda, Prezidentin bəhs etdiyi rus hərbçisi geniş səlahiyyətlərə malik bir adam olub ki, belə məsuliyyəti üzərinə götürüb. Digər tərəfdən, həmin hərbçi Rusiyanın ən ali rəhbərliyi ilə razılaşmadan belə məsuliyyətin altına girə bilməz. Onda bu nəticəyə gəlirik ki, siyasi manevr adı ilə cığallıq edən yenə Ermənistandır. Əslində, Rusiya öz sülhməramlılarını regiona gətirməklə öz istəyinə nail olub. Xüsusilə də, Ukrayna ilə baş verən müharibənin belə gərgin fazasında Rusiyaya ermənilərin cığallığından doğan əlavə problemlər lazım deyil. Bununla Ermənistan həm də Rusiyanı bir vasitəçi olaraq pis vəziyyətdə qoyur. Məsələ ondadır ki, 10 noyabr 2020-ci ildə imzalanan üçtərəfli bəyannamədə erməni silahlı birləşmələrinin Qarabağdan çıxarılması öz əksini tapıb. Burada söhbət ilk növbədə sənədin 4-cü bəndindən gedir. Reallıq odur ki, həmin bəndin ziddinə olaraq Qarabağda günü bu gün də erməni qanunsuz silahlı dəstələri qalır. Onların bir qismi çıxsa da digər qismi qalmaqdadır. Baxmayaraq ki, sentyabradək bütün silahlı birləşmələri çıxaracaqlarını vəd etmişdilər, amma buna əməl etmədilər. Halbuki, Rusiya sülhməramlı kontingenti Qarabağa yerləşən kimi erməni silahlı birləşmələri oranı tərk etməli idi. Bunu isə Rusiya icra etməli idi, çünki 4-cü bəndin birbaşa tələbidir. Bəyannamə 3 tərəf arasında imzalanıb və onlardan biri Rusiyadır. Yəni erməni silahlı birləşmələrin çıxarılmasını müşahidə edə bilərlər. Sülh sazişi imzalanana qədər bu reallaşsa, o zaman daha etibarlı etimad mühiti yarana bilər. Əks halda, Azərbaycan öz gücünə bu məsələni həll etmiş olacaq”.
Məhəmmədəli QƏRİBLİ
