Prezident İlham Əliyev fevralın 18-də Münhendə Amerika Birləşmiş Ştatlarının Dövlət katibi Entoni Blinken və Ermənistan baş naziri Nikol Paşinyanla birgə görüşdən sonra televiziya kanallarına müsahibəsində sülh sazişi ilə bağlı müzakirələrin aparıldığını deyib:
“Görüş yaxşı keçdi, məncə, konstruktiv oldu. Bir çox məsələlər müzakirə olundu, o cümlədən Ermənistanla Azərbaycan arasında sülh sazişinin imzalanması, sazişin imzalanması üçün lazım olan şərtlərin mövcudluğu. Əlbəttə ki, mən öz mövqeyimi bir daha bildirdim. Əsas məsələ ondan ibarətdir ki, bu sülh müqaviləsi beynəlxalq norma və prinsiplər əsasında tərtib edilməlidir. Qarabağ haqqında hər hansısa müddəanın olması qəbuledilməzdir. Bu haqda da Azərbaycanın mövqeyi bildirildi. Biz üç gün bundan qabaq Ermənistandan bizim təkliflərimizə yeni cavab təklifləri aldıq. İndi onları incələyirik. İlk baxışda Ermənistanın mövqeyində tərəqqi var, ancaq kifayət qədər deyil. Yəni, əsas bu məsələ müzakirə olundu. Laçın-Xankəndi yolundakı vəziyyət də, əlbəttə ki, müzakirə edildi. Mən bir daha Azərbaycanın mövqeyini bildirdim ki, hər hansı bir blokadadan söhbət gedə bilməz…”
Prezident bildirib ki, həm Avropada, həm Amerikada bizim bu təklifimiz məntiqli hesab olunur: “Bu, hər iki ölkə arasındakı əlaqələrin normallaşmasında da, əlbəttə ki, önəmli amildir. Çünki biz sərhədlərin delimitasiyası haqqında danışırıqsa, nəzarət-buraxılış məntəqələri olmadan bu mümkün deyil. Biz kommunikasiyaların açılması haqqında danışırıqsa, əlbəttə ki, həm Zəngəzur dəhlizinin hər iki başında, eyni zamanda, Laçın rayonu ilə Ermənistan arasındakı sərhəddə nəzarət-buraxılış məntəqələri yaradılmalıdır. Bu gün Dövlət katibi Blinkenin iştirakı ilə keçirilən görüşdə mən bunu rəsmən təklif kimi irəli sürdüm. Ermənistan tərəfindən cavab gözləyəcəyik”.
Blinkenin iştirakı ilə sülh sazişinin müzakirəsi ona gətirib çlxara bilərmi ki , sülh sazişi üzrə Moskvanın vasitəçiliyinə alternativ format yaransın? Rusiya bununla razılaşarmı?
Politoloq Yeganə Hacıyeva “Bakı-Xəbər”ə açıqlamasında bildirdi ki, ümumilikdə Münhen Təhlükəsizlik Konfransı çərçivəsində keçirilən görüş Azərbaycan rəhbərliyinin üstünlüyünün növbəti dəfə nümayişi oldu:
“Fevralın 18-də Münhen Təhlükəsizlik Konfransında Prezident İlham Əliyevin ABŞ Dövlət katibi Entoni Blinken və Nikol Paşinyanla birgə görüşdə Azərbaycan rəhbərinin qətiyyəti və liderlik keyfiyyəti bundan öncəki görüşlərdəki kimi bu görüşdə də öz sözünü dedi. Onu da qeyd edim ki, budəfəki görüşdə də bizim gözləntimizdən başqa yeni heç nə baş vermədi. Ermənistan tərəfinin ənənəvi görüşdən öncə səsləndirdiyi spekulyativ mesajları, görüşdə o fikirlərin əksinə gedən fikirləri və s. oldu. İlham Əliyevin qətiyyətli və Azərbaycanın milli maraqlarının ifadə edən mövqeyi qarşısında Ermənistan tərəfi həmin mesajları səsləndirmədi və ümumi yayındırıcı fikirlər bildirdi.
Bir sözlə, biz nə gözləyirdiksə, o da oldu.
Ümumiyyətlə isə, Fransanın Münhen Təhlükəsizlik Konfransında “Ermənistana dəstəyə davam edəcəyik” fikirini Fransanın Cənubi Qafqazda təxribatlara davam edəcəyinin anonsu kimi qəbul etmək lazımdır”.
Politoloq hesab edir ki, Prezidentin qətiyyətinə əsaslanan mövqeyimizə gəlincə, görüşdən sonra Azərbaycan kanallarına müsahibə verən Prezident İlham Əliyevin bəyan etdiyi kimi, Azərbaycanın mövqeyi birmənalı və açıqdır, Azərbaycan haqqın, ədalətin tərəfdarıdır və daxili işlərimizə kənar qüvvələrin qarışmasına heç vaxt imkan verilməyib və imkan verilməyəcək.
Münhen Təhlükəsizlik Konfransı çərçivəsində keçirilən “Dağları aşmaq? Cənubi Qafqazda təhlükəsizliyin qurulması” mövzusunda plenar iclas zamanı da eyni hal müşahidə edilib. Düzdür, o bundan öncəki konfransda olduğu kimi yenə də biabır olmamaq üçün sadəcə qısa çıxışa üstünlük verdi. Lakin bu halda belə Nikol Paşinyanın məğlub durumu beynəlxalq mətbuatın, xarici müşahidəçilərin diqqətindən yayınmadı. Ümumiyyətlə isə, hər iki tədbirdə Azərbaycan tərəfinin üstünlüyü və daha çox professionallığı ilə müşayiət olundu.
Diğər tərəfdən, Ermənistan tərəfinin mesajlarında Rusiyanın qıcığına səbəb olacaq hansısa yeni fikir və ya yeni təklif olmasa da, ümumi gedişat Rusiyanın etirazına səbəb olacaq.
Konfransda Rusiya prezidenti Putinin dostu Makronun fikirlərində daha çox anti-Rusiya mesajları və Rusiyanın Cənubi Qafqazda gələcəyə yönəlik maraqlarının əleyhinə işləyən fikirlər səsləndi. Bu isə o deməkdir ki, əslində Ermənistanın mesajları məhz Fransa prezidentinin nitqindən səsləndi”.
Məhəmmədəli QƏRİBLİ
