Rəsul Cahangirli: “Nəticədə Azərbaycanla bağlı verilən proqnozlar müsbətə doğru dəyişir”
2017-2018-ci illər ərzində Azərbaycan əhalisinin hər nəfərinə düşən ÜDM 4000 dollar təşkil edəcək. Bunu “Moody's” beynəlxalq reytinq agentliyinin bank qrupunun direktoru Yaroslav Sovqira “CIS bankers VI Ukrainian Banking Forum” adlı tədbirdə çıxışı zamanı bildirib.
O əlavə edib ki, qeyd edilən dövrdə Rusiyada bu göstərici 9000 dollardan, Qazaxıstanda 8000 dollardan, Belarusda 6000 dollardan, Ukraynada 2000 dollardan çox olacaq.
Halbuki, “Moody’s”-un daha əvvəlki hesabatlarında Azərbaycanla bağlı proqnozlar fərqli idi. Agentliyin avqustda yaydığı məlumatda Azərbaycan iqtisadiyyatının karbohidrogenlərdən asılı olduğu bildirilirdi: “Neft ucuzlaşdığı üçün yaxın illərdə sürətli artım gözləmək olmaz”.
Sənəddə deyilirdi ki, yeni qaz ixracı kəməri 1-3 il sonra fəaliyyətə başlayacaq, Avropa qaz tədarükünü şaxələndirəcək. Azərbaycan digər tədarükçülərlə rəqabətə girməli olacaq, onlar rəqabətli qiymətlər təklif edəcək: “Şahdəniz” layihəsi çərçivəsində qaz ixracı başlayanda, ölkənin gəlirləri ciddi artmayacaq. Əvvəla xarici şirkətlər investisiyalarını qaytarmalıdır; ikincisi, ortamüddətli perspektivdə qazın bahalanacağı gözlənilmir”.
Ancaq görünən odur ki, beynəlxalq reytinq agentliyi Azərbaycanla bağlı yenidən təhlillər aparıb və əvvəlki bədbin proqnozlar dəyişib. Belə olmasaydı, agentlik bu il və gələn il Azərbaycan əhalisinin hər nəfərinə düşən ÜDM-in 4000 dollar təşkil edəcəyini bəyan etməzdi. Ümumilikdə, bu nəyin göstəricisidir?
Məsələyə münasibət bildirən ekspert Rəsul Cahangirlinin sözlərinə görə, bu, ölkə iqtisadiyyatının inkişafının göstəricisidir: “Nəzərə almaq lazımdır ki, son vaxtlar qeyri-neft sektorunun inkişafı ilə bağlı həyata keçirilən müvafiq dövlət proqramları və görülən işlər öz nəticəsini verir. Bunun nəticəsində sözügedən sektorun həqiqətən də davamlı inkişafı, sahibkarlıq mühitinin yaxşılaşması, investisiyaların artması, yeni müəssisələrin və iş yerlərinin açılması istiqamətində uğurlar müşahidə olunur. Ölkədə istehsal olunan qeyri-neft məhsulları ixracını həm kəmiyyət, həm də çeşid baxımından genişləndirmək istiqamətində həyata keçirilən tədbirlər keçən ildən etibarən sürətləndirilib. Bu istiqamətdə qəbul olunan bir sıra qərarlar ölkədəki işgüzar mühitə müsbət təsir göstərib. Qeyri-neft məhsullarının ixracının stimullaşdırılması ilə bağlı əlavə tədbirlər haqda 2016-cı il yanvarın 18-də imzalanan sərəncamı qeyd etmək lazımdır. Sərəncamda qeyd olunur ki, hökumətə kənd təsərrüfatı və emalı məhsullarına ixracla bağlı geri ödəniş dəstəyi verilsin. Xarici ölkələrə ixrac missiyaları təşkil etmək, xarici bazarları araşdırmaq və marketinq fəaliyyəti barədə göstəriş verilir. Həmçinin, 2016-cı il martın 1-də isə qeyri-neft məhsullarının ixracının təşviqi ilə bağlı əlavə tədbirlər haqda sənəd də imzalanıb. Bu sənədlə isə 2016-2020-ci illər ərzində Azərbaycanda istehsal olunan qeyri-neft məhsullarının ixracı ilə məşğul şəxslərə dövlət büdcəsindən xüsusi ixrac təşviqi rüsumunun ödənilməsi qaydası müəyyən edildi. Bunlar hamısı stimullaşdırıcı əhəmiyyətli tədbirlər idi.
Məqsəd isə iqtisadiyyatın qeyri-neft sektoruna investisiya cəlb etmək idi. Prezidentin də hökumətin bu yaxınlarda keçirilən məlum iclasında qeyd etdiyi kimi, nəticədə 200-dən çox investisiya təşviqi sənədi verildi ki, bu da böyük nailiyyətdir. Belə ki, bu, yeni iş yerlərinin açılacağı deməkdir. O baxımdan bütün bunlar adambaşına düşən ÜDM-in artmasına öz təsirini göstərir. Nəticədə Azərbaycanla bağlı verilən proqnozlar müsbətə doğru dəyişir”.
Vidadi ORDAHALLI
