Mərkəzi Bankın may proqnozlarına əsasən, 2026 və 2027-ci illərdə illik inflyasiyanın hədəf diapazonunda (4±2%) qalacağı və müvafiq olaraq 5.9% və 4.5% olacağı proqnozlaşdırılır.
Azərbaycan Mərkəzi Bankından (AMB) bildirilib ki, 2026-cı ilin illik inflyasiya proqnozuna ticarət tərəfdaşlarında çəkili inflyasiyanın 2.59 faiz bəndi (f.b.), kənd təsərrüfatı istehsalçıları qiymətlərinin (KİQİ) 2.16 f.b., ev təsərrüfatlarının istehlakının 0.88 f.b. və digər amillərin 1.90 f.b. artırıcı təsir edəcəyi gözlənilir. Vurğulanıb ki, dövlət istehlakının və nominal effektiv məzənnənin (NEM) isə 2026-cı ilin illik inflyasiya proqnozuna müvafiq olaraq 0.50 f.b. və 1.13 f.b. azaldıcı təsiri gözlənilir.
“Qiymətləndirmələrə görə 2027-ci ildə proqnozlaşdırılan illik inflyasiyaya (4.5%) ticarət tərəfdaşlarında inflyasiya 1.92 f.b., Kənd Təsərrüfatı Məhsullarının İstehsalçı Qiymətləri İndeksi (KİQİ) 1.87 f.b., ev təsərrüfatlarının istehlakı 1.55 f.b., dövlət istehlakı 0.03 f.b. və digər amillər 0.90 f.b. artırıcı, NEM isə -1.77 f.b. azaldıcı təsir edəcəkdir. Proqnozların reallaşması həm xarici, həm də daxili mühitdə baş verə biləcək dəyişikliklərdən asılı olacaqdır. Xarici risklərin başlıca mənbəyi tərəfdaş ölkələrdə qiymətlərin artması ehtimalıdır ki, bu da davam edən geosiyasi gərginlik fonunda əmtəə və maliyyə bazarlarında dalğalanmalardan şərtlənə bilər. Xüsusilə, Yaxın Şərqdə baş verən münaqişə təchizat zəncirlərində maneələr yaradaraq nəqliyyat və sığorta xərclərini artırır, eyni zamanda qlobal enerji bazarlarında qiymət dəyişkənliyini gücləndirir. Bu proseslərin ilin qalan dövründə davam etməsi ticarət tərəfdaşlarında inflyasiyanın dinamikasına əsaslı təsir göstərən amil hesab olunur”, - məlumatda qeyd edilib.
Eyni zamanda bildirilib ki, bununla yanaşı, nominal effektiv məzənnənin ucuzlaşması da idxal inflyasiyasının daxili qiymətlərə ötürülməsinə təsir edən amil hesab olunur: “Digər tərəfdən, iqlim dəyişiklikləri istehsala mənfi təsir edərək qlobal inflyasiya təzyiqlərini artıra bilər. Daxili amillər üzrə əsas risk yerli xərclərin və tələbin artım meyilləri ola bilər”.
Bundan başqa, AMB qeyd edib ki, 2026-cı ilin mart ayında inflyasiya gözləntiləri sektorlar üzrə fərqli istiqamətlərdə dəyişib: “Mərkəzi Bank tərəfindən həyata keçirilən real sektorun monitorinqi nəticələrinə əsasən qeyri-neftqaz istehsal, ticarət və xidmət sektorları üzrə gözləntilərdə artım qeydə alınıb. Lakin tikinti sektoru üzrə növbəti 3 aylıq dövrdəki qiymət gözləntiləri ötən ilin müvafiq dövrü ilə müqayisədə əhəmiyyətli azalıb.
Mart ayında qeyri-neft-qaz istehsal sektorunda qiymət gözləntiləri indeksi 12.09 (ötən ilin eyni dövründə 5.36), ticarətdə 16.43 (ötən ilin eyni dövründə -0.01), tikintidə -1.11 (ötən ili eyni dövründə 17.70), xidmət sektorunda isə 20.25 (ötən ilin eyni dövründə 16.45) olub”.
ZÜMRÜD
