Ukrayna Moskva bölgəsində daha bir logistika mərkəzinə hücum edib. Podolsk yaxınlığındakı Koledinoda, Moskva bölgəsində Ukraynanın dron hücumundan sonra 3PL (Üçüncü Tərəf Logistikası) logistika şirkətinə məxsus anbarda yanğın baş verib.
Hadisə yerindən çəkilmiş görüntülərdə obyektin üzərində qalın qara tüstü qalxır. Ukraynanın monitorinq kanalı Supernova+ da 3PL anbarına edilən hücumu təsdiqləyib. Podolsk meri Qriqori Artamonov Koledinoda dron hücumundan bəhs edib, lakin yalnız şəxsi evin hasarına dəyən ziyan və "meşədə yanğın" barədə məlumat verib.
“Wildberries”in 200 min kvadrat metrdən çox ərazini əhatə edən ən böyük paylama mərkəzi 3PL anbarının yanında yerləşir. O, iyulun 20-də Ukrayna Silahlı Qüvvələri tərəfindən hücuma məruz qalıb.
Təsirə məruz qalan Koledino 3PL anbarı 10.000 kvadrat metr sahəni əhatə edir. Şirkət, bazarlar da daxil olmaqla, müştərilər üçün malların saxlanması, sifarişlərin yerinə yetirilməsi, qablaşdırılması, etiketlənməsi və çatdırılması ilə məşğul olan müstəqil operatordur. Logistika mərkəzinin veb saytında sadalanan tərəfdaşları arasında Lemana PRO, Perekrestok, Lenta, Auchan, Pyaterochka, Magnit, Svetofor, Fix Price, Globus və Detsky Mir pərakəndə satış şəbəkələri var.
Ukrayna monitorinq kanalları hesab edir ki, Ukrayna Silahlı Qüvvələrinin ehtimal olunan hədəfi Wildberries anbarı olub. 18 iyuldan bəri Ukrayna Silahlı Qüvvələri Elektrostal, Kotovsk, Krasnodar, Nevinnomıssk, Voronej və Yekaterinburq da daxil olmaqla, bazarın ən azı on logistika mərkəzinə hücum edib. Ən son uğurlu hücum 24 iyulda şirkətin Sankt-Peterburq, Leninqrad vilayəti və işğal olunmuş Simferopoldakı logistika komplekslərinə zərbə endirildiyi zaman baş verib.
Amerika Müharibə Tədqiqatları İnstitutu (ISW) bildirib ki, Moskva bölgəsindəki Wildberries obyektlərinə edilən hücumlardan sonra hakimiyyət orqanları təcili olaraq əlavə “Pantsir” hava hücumundan müdafiə sistemləri yerləşdirib.
Tahir TAĞIYEV
