Elyar İslamoğlu: "İmtahan tarixinin son günlərədək qeyri-müəyyən saxlanılması vətəndaşların planlaşdırma imkanlarını məhdudlaşdırır və əlavə çətinliklər yaradır"
Müəllimlərin İşə Qəbulu (MİQ) imtahanının növbəti mərhələsinin nə zaman keçirilməsinin vaxtının dəqiqləşməməsi bu prosesdə iştirak etmək istəyən namizədlər arasında narahatlıq doğurur. Redaksiyamızla əlaqə saxlayan müəllimlər bildirirlər ki, Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov bu ilin aprel ayında verdiyi açıqlamada MİQ imtahanlarının növbəti mərhələsinin iyulun 1-8-i arasında təşkil olunacağını bildirsə də, hələ də bu barədə hər hansı bir məlumat yoxdur. DİM-lə MÜTDA-nın imtahana yanaşmasını müqayisə edən müəllimlər qeyd edirlər ki, halbuki DİM çox əvvəlcədən imtahanların vaxtını təyin edir, cədvəli ictimaiyyətə açıqlayır, amma MÜTDA hələ bu barədə rəsmi bir açıqlama vermir. Bu da müəlimlərin narahatlığına səbəb olur.
Təhsil eksperti Elyar İslamoğlu baki-xeber.com-a bildirdi ki, son günlər imtahanda iştirak etmək istəyən müəllimlər narahatlıqlarını onunla da bölüşürlər. O, qeyd etdi ki,
MİQ imtahanının tarixinin açıqlanmaması narazılıq yaradır və namizədlər ETN-dən dəqiq tarix gözləyir.
"Müəllimlərin işə qəbulu (MİQ) müsabiqəsinin test imtahanının keçiriləcəyi tarixlə bağlı qeyri-müəyyənlik namizədlərin narazılığına səbəb olub.
Xatırladaq ki, Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov 2026-cı ilin aprel ayında jurnalistlər üçün keçirilən brifinqdə MİQ müsabiqəsinin test imtahanı mərhələsinin 1–8 iyul tarixlərində keçirilməsinin nəzərdə tutulduğunu bildirmişdi.
Lakin iyun ayı başa çatsa da, Elm və Təhsil Nazirliyi tərəfindən imtahanların dəqiq keçiriləcəyi tarix hələ də açıqlanmayıb. Bu vəziyyət imtahana hazırlaşan minlərlə namizəd arasında narazılıq yaradıb.
Namizədlər bildirirlər ki, imtahanın 1–8 iyul tarixlərində keçiriləcəyi ilə bağlı verilən məlumata əsasən yay məzuniyyətlərini həmin tarixlərdən sonraya planlaşdırıblar. Bir çox müəllim əvvəlcədən aviabiletlər alıb, hotellər bron edib və şəxsi planlarını buna uyğun qurub.
İndi isə imtahanların iyulun 10-dan sonraya keçirilə biləcəyi ilə bağlı ehtimallar səslənir. Namizədlərin sözlərinə görə, bu, əvvəlcədən qurulan planların pozulmasına və maddi itkilərə səbəb ola bilər.
Ölkə üzrə minlərlə şəxsin iştirak etdiyi belə mühüm imtahanın dəqiq tarixi ən azı bir ay əvvəl elan edilməlidir. İmtahan tarixinin son günlərədək qeyri-müəyyən saxlanılması vətəndaşların planlaşdırma imkanlarını məhdudlaşdırır və əlavə çətinliklər yaradır. Əgər imtahanların təşkili ilə bağlı hər hansı çətinlik mövcuddursa, uzun illər geniş təcrübəyə malik olan Dövlət İmtahan Mərkəzinin imkanlarından istifadə edilməsi daha məqsədəuyğun olardı. Burada əsas məqsəd imtahanların şəffaf, vaxtında və peşəkar şəkildə təşkil edilməsidir.
Elm və Təhsil Nazirliyi və MÜTDA tərəfindən MİQ imtahanının dəqiq keçiriləcəyi tarixlə bağlı hələlik rəsmi açıqlama verilməyib".
Məsələyə MÜTDA-nın mövqeyini öyrənməyə çalışdıq. Qurumdan bildirdilər ki, artıq MÜTDA rəhbəri Eşqi Bağırov bu barədə mətbuata açıqlama verib.
Bu həftə ərzində Müəllimlərin İşə Qəbulu (MİQ) imtahanlarının növbəti mərhələsinin tarixi ictimaiyyətə açıqlanacaq. Bunu mətbuata Elm və Təhsil Nazirliyi yanında Məktəbəqədər və Ümumi Təhsil üzrə Dövlət Agentliyinin (MÜTDA) direktoru Eşqi Bağırov bildirib.
Agentlik rəhbərinin sözlərinə görə, cari ildə imtahan üçün 40 mindən çox namizəd qeydə alınıb. Hazırda namizədlərin təhsil sənədləri, şəxsi məlumatları və digər zəruri sənədləri emal olunur. Bu proses başa çatan kimi, həftənin sonuna qədər müvafiq elan veriləcək.
Direktor tarixlərin elan olunmasındakı yubanma amillərinə də aydınlıq gətirib:"Gecikmənin səbəbi builki imtahanın ödənişli olması ilə bağlı deyil. Bundan əvvəl 20 mindən çox namizədin iştirak etdiyi sertifikatlaşdırma imtahanları təşkil olunmuşdu. Bundan əlavə, IV və VI sinif şagirdlərimiz üçün irimiqyaslı monitorinq imtahanları keçirmişdik. MİQ imtahanları ənənəvi olaraq iyul ayında keçirilir. Əvvəlki illərlə müqayisədə qeydiyyatın yoxlanılmasında 1-2 günlük gecikmə ola bilər. Lakin əsas hədəfimiz odur ki, sentyabrın 15-nə, yəni yeni tədris ilinin başlanmasına qədər ölkə üzrə müəllim ehtiyacını tam qarşılayıb, məktəblərimizin müəllim təminatını yüksək səviyyədə yerinə yetirək".
İradə SARIYEVA
