Aydın Xan Əbilov: "Azərbaycan Yazıçılar Birliyi peşəkar ədəbiyyat qurumudur..."
Emil Rasimoğlu: "Bu görüşü son günlər ictimai müstəvidə Mədəniyyət Nazirliyi ilə Yazıçılar Birliyi arasında yaranmış insidentin, qısaqapanmanın üzərindən təşkil olunmuş "pərdəarxası barış sazişi" də adlandırmaq olar"
Mədəniyyət naziri Adil Kərimlinim Azərbaycan Yazıçılar Birliyinin sədri, Xalq yazıçısı Anarla görüşü, bu görüşdə bir sıra məsələlər müzakirə olunub.
Görüşdə ölkədə ədəbi prosesin inkişafı, müasir Azərbaycan ədəbiyyatının dəstəklənməsi, kitabxana işinin təkmilləşdirilməsi, mütaliə mədəniyyətinin təşviqi, gənc yazarların yaradıcılıq imkanlarının genişləndirilməsi və bu istiqamətdə birgə əməkdaşlıq məsələləri müzakirə olunub.
Söhbət zamanı həmçinin dövlət sifarişli filmlər üçün ədəbi əsərlərin seçilməsi, ssenarilərin yazılması, Azərbaycan ədəbiyyatının təbliği, görkəmli ədiblərin həyat və yaradıcılığına həsr olunan filmlərin çəkilməsi ilə bağlı fikir mübadiləsi aparılıb.
Mədəniyyət nazirinin AYB sədri ilə görüşündə səsləndirilən bəzi məsələlər cəmiyyətdə də müzakirə olunur və bir sıra sualların yaranmasına gətirib çıxarır.
Anarın nazirlə görüşünün ədəbiyyata, mədəniyyətə, kitabxana işinə, mütaliə mədəniyyətinin inkişafına nə kimi formada təsiri ola bilər? Müzakirə olunan mütaliə mədəniyyətinin AYB-yə nə dəxli var? Yaxud kitabxana işinin təkmilləşdirilməsinin Yazıçılar Birliyinə nə aidiyyəti var? Kitabxana işi sırf Mədəniyyət Nazirliyinin işidir. Mütaliə mədəniyyətinin formalaşdırılması təkcə Yazıçılar Birliyinin işi deyil. Bunu ən geniş ictimaiyyətə müzakirə etmək daha yaxşı olmazdı? Düzdür, AYB də burada söz deyə bilər, amma mütaliə mədəniyyətinin möhkəmləndirilməsi o qurumun işi deyil.
Bu görüşdə müsbət bir ideya irəli sürülüb ki, dövlət sifarişi ilə film çəkilməsi üçün ədəbi əsərlərin seçiləcək.
Yeni Yazarlar və Sənətçilər Qurumunun sədri, kulturoloq Aydın Xan Əbilov baki-xeber.com-a bildirdi ki, əlbəttə, Mədəniyyət Nazirliyi son illər bir çox məsələlərlə bağlı müəyyən fəaliyyətlər və addımlar atır. "Amma Mədəniyyət Nazirliyi ilə bağlı hələ də ictimaiyyətdə, xüsusən də yaradıcı insanlar arasında çox böyük narazılıqlar var. Eyni adamlar eyni yerə, müxtəlif beynəlxalq tədbirlərə Mədəniyyət Nazirliyində şöbə müdirinin və yaxud müdirənin sevimli yazıçları, şairləri göndərilir. Sanki bu ölkədə iki-üç şair yazıçından başqa yaradıcı adam yoxdur. Bu istər yaşlı nəslin nümayəndəsi, istərsə də gənc və orta nəsilin nümayəndəsi olsun, məsələ belədir.
Biz dəfələrlə Mədəniyyət Nazirliyinə layihələr vermişik. Mütaliə mədəniyyəti, virtual mədəniyyət, internet ədəbiyyatı, elektron kitabxana, e-kitab, yeni vərdişlər və s. bunlarla bağlı layihələrimizin hamısından demək olar ki, imtina olunub.
Amma siz Mədəniyyət Nazirliyinin il boyu payladığı qrant layihələrinə fikir versəniz, görərsiz ki, burada mədəniyyətə dəxli olmayan təşkilatlar, mədəniyyətə dəxli olmayan layihələr seçilir. O layihələrin monitorinqini təəssüflər olsun ki, heç kim keçirmir. Biz bir ara Hesablama Palatasına təklif etmişdik ki, Mədəniyyət Nazirliyinin qrantları ilə bağlı bir hesabat xarakterli yoxlanış edilsin və cəmiyyətə və dövlət qurumlarına də bununla əlaqədar məlumatlar ötürülsün. Mən yenə də o fikrimin üstündə dururam və fikirləşirəm ki, Mədəniyyət Nazirliyi inzibati bir qurum olaraq cənab Prezidentin mədəniyyət siyasətini hər istiqamətdə reallaşdırmaqda ciddi addımlar atmalıdır. Nəinki sadəcə populist xarakterli bu tipli görüşlər və tədbirlər keçirməklə işini bitmiş saysın. Bəli, Azərbaycan Yazıçılar Birliyi peşəkar ədəbiyyat qurumudur və dövlətimiz də onunla bağlı çox ciddi maliyyə imkanları yaradıb. Jurnallar çıxır, qəzet çap olunur, saytlar var. Düzdür, elektronlaşma və elektron kitabxana ilə bağlı vaxtilə biz Kitabxana.neti katibliyin qərarı Azərbaycan Yazıçılar Birliyinin elektron kitabxanası kimi inkişaf etdirməyə başladıq. beş ilə yaxındır, hətta beş ilə yaxındır ki, Yazıçılar Birliyindən elektron kitabxana ilə bağlı bir qəpik də pul ayrılmayıb. Əksinə, dəfələrlə məktubla müraciət etsək də, müxtəlif səbəblər göstərilib. Xüsusən də Maliyyə Nazirliyi və Mədəniyyət Nazirliyinin maliyyə imkanları yaratmadığına görə bizim kitabxananın da az qala bağlanmaq təhlükəsi artıq yaxınlaşır. Kitabxana.net və Mir Cəlal Paşayev adında elektron kitabxana və Yeni Yazılar Sənətçilər İctimai Birliyi olaraq biz dəfələrlə Mədəniyyət Nazirliyinə yeni mütaliə mədəniyyətinin inkişafı, kitab satışı, yayımı ilə bağlı müraciət etmişik. Elektron kitab yayımı, beynəlxalq əlaqələr, o cümlədən Amazon.com kimi kitab yayımı ilə məşğul olan qurumlarla əlaqələr yaratmaqla bağlı, eyni zamanda bölgələrdə kitabxanaların inkişafı, onların pullu xidmətlərə keçməsi ilə əlaqədar layihələr təqdim etmişik. Qəribədir ki, bizim layihələrin bir çox ideyaları Mədəniyyət Nazirliyinin bu və digər dərəcədə cəmiyyətə açıqladığı müxtəlif bu tipli tədbirlərdə istifadə olunur. Amma nə layihələrimiz maliyyələşdirilir, nə də ki, bu tipli tədbirlərdə ölkənin sayılan-seçilən kulturoloqu və mədəniyyət hadisələrinin təşkilində xüsusi zəhməti olan şəxs olaraq biz unuduruq. Bu baxımdan, yəni Mədəniyyət Nazirliyinin bu tipli tədbirləri mənə çox qədər də maraqlı deyil. Amma ümumən götürəndə Azərbaycanın inkişafı üçün əlbəttə ki, mühüm addımlar atılmalıdır. Özü də mədəniyyət soyuq, sakit, XXI əsrin qlobal bir siyasi aləti olduğunu nəzərə alsaq, bu olmalıdır"-deyə A.X.Əbilov vurğuladı.
Bununla belə, A.X. Əbilov hesab edir ki, Azərbaycan yazıçılarının əsərləri əsasında bədii filmlərin çəkilməsi çox müsbət hal olardı. Kinodramarurgiya sahəsində yeniliklərin kinoya daşınmasının vacib olduğunu deyən A.X.Əbilov hesab edir ki, burada əsərlərin incəliklə seçilməsi çox vacibdir.
AYB üzvü, şair-publisist Emil Rasimoğlu baki-xeber.com-a bunları dedi: "Əvvəla, öncə onu deyim ki, ümumilikdə Mədəniyyət naziri ilə Anarın görüşü mahiyyətcə formal xarakter, sadəcə xəbər yükü daşıyır, vəssalam! Görüşlə bağlı bəlağətli təqdimə, təmtəraqlı informasiyaya da heç ehtiyac yoxdur. Necə deyərlər, belə görüşlər süni nəfəs aparatına qoşulmuş görüşlərdi...
Digər tərəfdən də, bu görüşü son günlər ictimai müstəvidə Mədəniyyət Nazirliyi ilə Yazıçılar Birliyi arasında yaranmış insidentin, qısaqapanmanın üzərindən təşkil olunmuş "pərdəarxası barış sazişi" də adlandırmaq olar.
Müzakirə olunan mövzulara gəldikdə isə hər zaman məhz bu kimi ictimaiyyətə, hətta kütləyə hesablanmış, formal görüşlərin fundamental ideyası, xətti, gerçək məqsədi, böyük praktik nəticəsi olmadığıdan görüş zamanı uyğun oldu, olmadı hansı mövzudan deyirsən söz açılır, danışılır, "müzakirə" aparılır.
Hələ bəlkə həmin görüşdən bu saat elə nüanslar, "müzakirə" olunmuş mövzular var ki, Anar da, həmçinin Adil Kərimli də artıq həmin nüansları, mövzuları dəfn də edib, unudub..."
İradə SARIYEVA
