Tural İsamyılov: “...TDT-nin fəaliyyətinin daha çevik və operativ qurulmasına yönəlmiş mühüm təşəbbüsdür”
Prezident İlham Əliyev TDT-yə üzv ölkələrin təhlükəsizlik üzrə rəhbər şəxslərini qəbul edərkən bildirib ki, Türk Dövlətləri Təşkilatına (TDT) üzv ölkələrin rəhbərlərinin ildə yalnız bir dəfə görüşməsini yetərli hesab etmir və bu səbəbdən Azərbaycanın təşəbbüsü ilə dövlət başçılarının qeyri-rəsmi Zirvə görüşlərinin də keçirilməsinə başlanılıb.
“Bildiyiniz kimi, Türk Dövlətləri Təşkilatının Zirvə görüşləri müntəzəm xarakter daşıyır. Azərbaycanın təşəbbüsü ilə yaxın vaxtlardan etibarən qeyri-rəsmi Zirvə görüşləri də keçirməyə başlamışıq. Çünki hesab etdik ki, dövlət başçılarının ildə bir dəfə məhz bu formatda görüşməsi kifayət deyil. Lakin dediyim kimi, ölkələrimizin hər birinin üzv ölkələrlə ikitərəfli gündəliyi kifayət qədər fəaldır. Ancaq biz birlikdə ildə bir dəfə toplaşırıq və hesab etdik ki, bu azdır. Həmkarlarımız da bunu dəstəklədilər və ilk qeyri-rəsmi Zirvə görüşü Şuşada, daha sonra isə digər ölkələrdə də keçirildi.
Beləliklə, rəhbərlik səviyyəsində ümumi maraqlarımızın, ümumi planlarımızın olduğu barədə ümumi anlayış mövcuddur və onların həyata keçirilməsi, yenə də daha çox ölkələrimizin mövcud və mümkün təhdidlərdən nə dərəcədə qorunmasından asılı olacaq.
Bugünkü təhdidlərin təkcə fiziki deyil, həm də ideoloji xarakter daşımasına gəldikdə isə hesab edirəm ki, bu barədə danışmağa ehtiyac yoxdur, hamımız bunu çox yaxşı bilirik. Ölkələrimizin ardıcıl inkişafını və konstitusiya quruluşunun qorunmasını təmin etmək üçün ölkələrimizə və xalqlarımıza zidd hər cür ideoloji təxribatlara qarşı birgə mübarizə aparmaq lazımdır. O cümlədən adətən ölkələrimizin hüdudlarından çox uzaqda yerləşən, lakin nədənsə məlum mərkəzlərdən maliyyələşən müxtəlif media strukturları vasitəsilə həyata keçirilən təxribatlara qarşı. Bu maliyyələşdirmə ölkələrimizin dövlət quruluşunun sarsıdılmasına, ictimai həmrəyliyin pozulmasına, yad narrativlərin və dəyərlərin aşılanmasına yönəlib. Biz buna qarşı Azərbaycanda çox fəal mübarizə aparırıq və deməliyəm ki, böyük uğurlar əldə etmişik”-deyə Prezident Əliyev qeyd edib.
İlham Əliyevin TDT Zirvəsinin ildə bir dəfə yox, azı iki dəfə-növbəti və növbədən kənar, qeyri - rəsmi Zirvə görüşü şəklində keçirilməsini zəruri hesab etməsi bir fəaliyyət üsulu kimi özünü nə dərəcədə doğrultdu?
Politoloq Tural İsmayılov baki-xeber.com-a bildirdi ki, İlham Əliyevin TDT Zirvə görüşlərinin ildə bir dəfə deyil, ən azı iki dəfə keçirilməsi ilə bağlı yanaşması təşkilatın inkişaf edən gündəliyinin tələblərinə tam uyğun gələn strateji baxışdır. “Türk Dövlətləri Təşkilatı artıq yalnız mədəni və humanitar əməkdaşlıq platforması deyil, siyasi, iqtisadi, nəqliyyat, enerji, təhlükəsizlik və geosiyasi məsələlər üzrə mühüm bir birlikdir. Belə geniş gündəliyin daha sıx liderlər dialoqu tələb etməsi tamamilə məntiqlidir.
Prezident İlham Əliyevin “ildə bir dəfə görüşməklə bunu həll etmək mümkün deyil” yanaşması əslində TDT-nin fəaliyyətinin daha çevik və operativ qurulmasına yönəlmiş mühüm təşəbbüsdür”.
T.İsamyılovun sözlərinə görə, növbəti Zirvə ilə yanaşı, növbədənkənar və qeyri-rəsmi liderlər görüşünün keçirilməsi dövlət başçılarına aktual məsələləri daha sürətli müzakirə etmək, yeni təşəbbüsləri razılaşdırmaq və qəbul edilmiş qərarların icrasını daim diqqətdə saxlamaq imkanı verir.
“Bu yanaşmanın mühüm tərəfi ondan ibarətdir ki, Azərbaycan Prezidenti TDT-yə sadəcə mövcud formatı qoruyan təşkilat kimi deyil, gələcəyin daha çevik, daha inteqrasiya olunmuş və daha təsirli türk dövlətləri platforması kimi yanaşır. Liderlər arasında birbaşa və davamlı dialoqun gücləndirilməsi isə bu prosesin əsas şərtlərindən biridir.
Bu baxımdan ildə iki Zirvə ideyası sadəcə görüşlərin sayının artırılması deyil, TDT-nin siyasi çəkisinin, qərarvermə sürətinin və institusional imkanlarının gücləndirilməsi baxımından mühüm fəaliyyət modelidir. Azərbaycanın bu təşəbbüsü təşkilatın qarşıdakı mərhələdə daha aktiv və nəticəyönümlü fəaliyyət göstərməsinə ciddi töhfə verə bilər”-deyə T.İsmayılov bildirdi.
İradə SARIYEVA
