Əli Mustafa: “Bu yöndə koordinasiyalı fəaliyyətə və inteqrasiyanın qurulmasına ehtiyac var”
Prezident İlham Əliyev Türk Dövlətləri Təşkilatına üzv ölkələrin təhlükəsizlik üzrə rəhbər şəxslərini qəbul edərkən bildirib ki, TDT çərçivəsində məhz gənclər təşkilatlarımızın qarşılıqlı fəaliyyətinə daha çox diqqət yetirməliyik:
“Əminəm ki, hər biriniz öz ölkənizdəki vəziyyəti çox yaxşı bilirsiniz. Təbii ki, ölkələrimizdə vəziyyət eyni deyil. Lakin müəyyən beynəlxalq mərkəzlərdən ölkələrimizin dövlət maraqlarının sarsıdılmasına yönəlmiş fəaliyyət prinsipləri dəyişməz olaraq qalır. Həm metodlar, həm də məqsədlərinə nail olmaq cəhdləri kifayət qədər şablon xarakter daşıyır, deyərdim ki, primitivdir. Bir sözlə, bədxahlarımızda, deyərdim ki, yaradıcılıq çatışmır. Əlbəttə ki, onlar əsas səylərini hələ formalaşmamış, formalaşma mərhələsində olan və manipulyasiya etməyin daha asan olduğu gənc nəslə yönəldirlər. Məhz buna görə deyirəm, bilirəm ki, ölkələrimizin hər birində fəal gənclər siyasəti həyata keçirilir. Lakin hesab edirəm ki, TDT çərçivəsində məhz gənclər təşkilatlarımızın qarşılıqlı fəaliyyətinə daha çox diqqət yetirməliyik, müntəzəm tədbirlər, forumlar, konfranslar keçirməliyik ki, gənc vətəndaşlarımız bir-biri ilə ünsiyyət qursunlar. Onlar qohum xalqlara bizim nəslin münasibət göstərdiyi kimi münasibət göstərsinlər. Bunu, əlbəttə, öz nümunəmiz, uğurlu fəaliyyətimiz, təşkilatımızın möhkəmləndirilməsi ilə yanaşı, düzgün ideoloji iş vasitəsilə onlara ötürməliyik”.
Ümumilikdə, TDT-də gənclər təşkilatlarının fəaliyyətlərinin daha yaxşı əlaqələndirilməsi üçün bundan sonra nə işlər görülməlidir?
Sözügedən məsələni baki-xeber.com-a şərh edən siyasi şərhçi Əli Mustafanın fikrincə, TDT-nin indiyə qədər siyasətində daha çox dövlətlərarası münasibətlər öndə idi: “Yüksək səviyyəli rəsmi görüşlər keçirilirdi. Rəsmi şəxslərin təmasları olur, amma bu münasibətlərin cəmiyyətə nüfuz etməsi, bu çərçivədə təmasların qurulmasına ehtiyac var. Prezident Əliyevin çıxışında məhz bu yöndə çağırış etməsi müsbət haldır. Belə görünür ki, artıq sözügedən məsələ gündəmdədir. Əlbəttə, gənclərin əlaqəli olması, koordinasiyalı fəaliyyəti olduqca vacibdir. Ancaq hesab edirəm ki, təkcə gənclər təşkilatlarının fəaliyyətlərinin əlaqələndirilməsi ilə kifayətlənmək olmaz. Bütünlüklə cəmiyyətlərarası münasibətlərin də qurulmasına önəm verilməlidir. Yəni TDT-nin daha güclü olması üçün həm də cəmiyyətlərarası münasibətlərin inkişafı zəruridir. Bu, türk dövlətlərinin daha ciddi inteqrasiyasını şərtləndirə bilər. Bu yöndə daha effektiv metodlar tapılmalıdır. Bir çox istiqamətlərdə əlaqələrin güclənməsinə önəm verilməlidir. Xüsusən gənclərin yaxından əlaqələrinin qurulması, digər təsirlərdən qorunması üçün bir biri ilə koordinasiyalı formada təmasda da olması olduqca faydalıdır. Bütün bunlar ardıcıl və sistemli təmasların qurulmasından keçir. Bu yöndə koordinasiyalı fəaliyyətə və inteqrasiyanın qurulmasına ehtiyac var. Hesab edirəm ki, belə olarsa, TDT-də gənclər təşkilatlarının fəaliyyətlərini daha yaxşı əlaqələndirmək mümkün olacaq”.
Vidadi ORDAHALLI
