Ramil Məmmədli: “Cəmiyyətimiz ona görə antimilli satqınları qəbul etmir ki, onların əsil simasını yaxşı bilir”
Prezident İlham Əliyev Türk Dövlətləri Təşkilatına üzv ölkələrin təhlükəsizlik üzrə rəhbər şəxslərini qəbul edərkən bildirib ki, Azərbaycanda xain, antimilli, satqın strukturlar mahiyyət etibarilə son dərəcə marjinal xarakter daşıyır:
“Ən başlıcası isə onlar xalqımızın mütləq əksəriyyəti tərəfindən ittiham olunur. Çünki Azərbaycanda mənəvi dəyərlərə, ənənələrə, həyat tərzimizə sadiqlik, yenə də əsas istiqamətdir, başlıca tendensiyadır. Buna zərər vurmağa çalışan hər şey cəmiyyətimiz tərəfindən son dərəcə mənfi qarşılanır. Lakin bu, bütün işləri başa çatdırdığımız anlamına gəlmir, çünki ölkələrimizdə sabitliyi pozmaq cəhdləri davam etdiriləcək”.
Ümumilikdə marjinallaşma nədir? Eyni zamanda cəmiyyət onlardan niyə imtina edir?
Sözügedən məsələni baki-xeber.com-a şərh edən hərbi ekspert Ramil Məmmədli bununla bağlı bir sıra məqamlara toxundu: “Marjinallaşma cəmiyyətdə müəyyən hissənin milli dəyərlərdən uzaqlaşması, dövlətçilik maraqlarına son dərəcə biganə, laqeyd yanaşması deməkdir. Xüsusən də gənclər arasında belə tendensiyaların olması çox təhlükəlidir. Əfsuslar olsun ki, bəzi hallarda müəyyən xarici dairələr buna nail olurlar. Necə? Müəyyən QHT, təhsil proqramları çərçivəsində gəncləri milli-mənəvi dəyərlərdən uzaqlaşdırmağa çalışırlar. Keçmişdə baş verənlərə indiki prizmadan yanaşıb böyük sərkərdələri mühakimə edirlər, xalqın yaddaşında olan qəhrəmanları aşağılayırlar. Onları cəmiyyətin gözündə kiçiltməyə, bu minvalla gəncləri marjinallaşdırmağa çalışırlar. İnsanların təsəvvüründə şübhələr yaradırlar və s. Məsələn, Şah İsmayıl Xətaiyə qarşı ara-sıra bəzi şəxslərin timsalında aparılan kampaniya bunlardan biridir. Cəmiyyətimiz ona görə antimilli satqınları qəbul etmir ki, onların əsil simasını yaxşı bilir. Xüsusən də zamanla bellərinin kimliyi ortaya çıxır. Görürlər ki, pula görə xaricdən gələn sifarişləri necə həyata keçirirlər. Bunlar həmin şəxslərdir ki, bir zamanlar torpaqlarımızın hərb yolu ilə geri qaytarılmasının mümkün olmadığını cəmiyyətə təlqin edirdilər. Hətta elə təəssürat yaratmağa çalışırdılar ki, əraziləri geri qaytarmaq mümkün deyil. O üzdən, xalqımız belələrini tanıdığı üçün həmin antimilli ünsürləri rədd edir, onların təbliğatına uymur. Bütün bunlara rəğmən arxayınlaşmaq olmaz. Zamanında gənclərlə geniş və keyfiyyətli, dövrün tələblərinə uyğun maarifləndirmə işi aparmaq lazımdır”.
Vidadi ORDAHALLI
