"Bakı-Xəbər" Media Qrupunun rəhbəri, politoloq Aydın Quliyev Facebookda Ermənistanda vaxtilə qondarma "Arsax" qurumunun guya prezidenti olmuş şəxsin 2023-cü ilin sentyabrın 28-də imzaladığı bir kağız parçasının çox qiymətli bir sənəd olması barədə aparılan təbliğatlar və bunun üstündə qurulan oyunlarla bağlı rəy yazıb
A.Quliyevin yazdığı rəyi təqdim edirik:
Qondarma "Arsax" qurumunun "prezidenti" kimi bic doğulmuş bir adla bir vaxtlar leksikonlara zorla dürtüşdürülən Şahramanyanın 2023-cü ilin 28 sentyabrında imzaladığı hansısa kağızın bu gün gündəmə gəlməsi hər şeydən qabaq belə bir sualın yenidən araşdırılmasını zəruri edir - Bu Şahramanyan adlı cinayətkar separatçının imzaladığı hansısa kağızın Azərbaycana qarşı təcavüz faktının bitirilməsində, ərazi bütövlüyümüzün və suverenliyimizin qəti təmin edilməsində, qanunsuz silahlı dəstələrin ləğv edilməsində və işğalçı Ermənistan ordu birləşmələrinin ərazilərimizdən çıxıb getməsində hansısa hüquqi, ya legitim siyasi statusu varmı? Qətiyyən yoxdur, biz 91-ci iln 10 sentyabrından taa 2023-cü ilin 19-20 sentyabr əməliyyatına qədər özünü "dövlət" kimi mövcud hesab etmiş qondarma “Arsax”ı, onun " prezidenti", ya " spikeri", ya "naziri" kimi özünü təqdim edən hansı şəxsi, onların imzası olan hansı kağızı legitim olaraq tanıdıq ki, Şahramanyanı və onun 28 sentyabr tarixli "kağızını" da legitim tanıyaq?!
Bizim nəzərimizdə təcavüzə son qoyan hüquqi, siyasi və hərbi əsaslar təcavüzkar silahlı qruplaşmaların döyüş meydanında darmadığın edilməsi, imzaladıqları 9 noyabr kapitulyasiya sənədi, rus sülhməramlılarının icra etdikləri missiyanı yerə qoyaraq ərazilərimizdən çəkilib getmələri, Paşinyanın 2022-ci ilin oktyabrında Praqa sammitində "Dağlıq Qarabağı rəsmən Azərbaycanın tərkib hissəsi kimi tanıması, sərhədlərin delimitasiyası üzrə Komissiyanın əsasnaməsinin parlamentdə ratifikasiyası və digərləridir. Ermənistanda yenidən fəallaşmaq istəyən separatçı-revanşçı qüvvələr üçün Şahramanyanın 28 sentyabr şousu və qaçıb İrəvanda bir müddət sonra köhnə imzasından imtina etdiyini bəyan edən yeni "kağız"ı nəsə bir məna kəsb edə bilər. Ancaq o "kağızlar" bizim üçün işğala və təcavüzə son qoyduğumuz şərəfli Zəfər tarixində hər hansı legitim status daşımır.
Şahramanyanın 2023-cü ilin 28 sentyabrında altına imza qoyduğu "tabelikdə olan dövlət qurumları və orqanlar özlərini buraxır və "Arsaxın” mövcudluğuna son qoyulur" sözlərinin bizim üçün heç bir hüquqi, siyasi, tarixi məzmunu yoxdur, tarix kitablarımızda isə onun adı olsa-olsa belə çəkilə bilər - separatçılar sentyabrın 28-də şərəfsiz təslimiyyət müqabilində canlarını satın aldılar. Guya Şahramanyan sentyabrın 28-də o kağıza imza atmasaydı, nə baş verəcəkdi? İtirən kim olacaqdı? Biz, ya çıxılmaz bir küncə sıxılmış separatçı-təcavüzkar canilər?
Sualın cavabını hər kəs bilir. Ermənistanın bəzi "elit dairələri" səhvən elə bilirlər ki, Azərbaycan Şahramanyanın 28 sebtyabr imzalı kağızını hansısa rəsmi hüquqi-siyasi sənəd kimi qəbul etdi. Xeyr! O imzalı kağız təslim olmağın, silahı yerə qoymağın, labüd fiziki məhvolmanın bir addımlığından qayıtmaq, aman diləməyin bir əlaməti idi. İntəhası bizim dövlətin və Prezidentin humanistliyi idi ki, bu aman diləməyə hər bir ədalətli qüvvəyə yaraşan reaksiyanı verdik.
Paşinyan hakimiyyəti, onun guya mübarizə apardığı revanşçılar dəstəsi bizim Prezidentin liderliyi altında Azərbaycanda həmişəlik söndürdüyümüz separatizm odunun közünü İrəvanda yenidən üfürərək od qalamağın mənasız olduğunu anlayar, anlamaz, özləri bilər. Biz gözləyirik ki, Ermənistan rəhbərləri "sülh prosesi hələ hər şeyin həll olunması deyil, Qərbi Azərbaycan narrativi Ermənistanın təhlükəsizliyinə təhdiddir" kimi əslində revanşçılara dolayı dəstək və real sülhə zərbə vuran mövqedən əl çəksin. Eləcə də Ermənistanda bu gün qondarma “Arsax” ideyasını yenidən körükləyənlərə Ermənistan dövlətinə xəyanət, sülh və təhlükəsizlik prosesinə qəsd, Ermənistanı yeni müharibələrə sürükləmək və sair ittihamlarla hüquqi təqib prosesinə başlanılsın. Yoxsa revanşçılara yumşaq tövsiyələr bizi Ermənistan rəhbərliyinin real sülh prosesinə sadiqliyinə inandıra biıməz.
Ancaq o od Ermənistanda yenidən qalansa…
1. Ermənistanın özünü yandıracaq.
2. Bunun məsuliyyətinin böyük hissəsi Paşinyanın da üzərinə düşəcək
3. Sülhə vasitəçilik edən dövlət və beynəlxalq dairələr İrəvanda Şahramanyanın ölü 28 sentyabr kağızını yenidən "oksigen balonuna" çevirmək cəhdlərinə susmamalıdırlar. Birinci növbədə bu, 8 avqust sənədinə imza atmış Tramp administrasiyasına, BMT-yə, AB-yə və sairlərə ünvanlanıb.
Onu da deyim ki, İrəvanda qaniçənlərin yenidən dirçəliş üçün istifadə etmək istədikləri o Şahramanyanın 28 sentyabr imzalı kağızını tam şəkildə yenidən ictimailəşdirmək və dünyəviləşdirmək lazımdır...
Tahir TAĞIYEV
